MATIUS 2 - SURAT TUHAN Dahun Kayan 1990

Ket en kelunan nyemugen ih

¹ Té' pah kanak Yesus ha' Betlehem alem daléh Yudea, tegu anan Herudes aleng laja'. Men'uh kanak na' nunan, nei nah kuri-kuri la'ung kelunan nyemugen ha' Yerusalem aleng nei men tana béh matan dau pa'un,

² ken dalo', “Hino' anak aleng Laja' daha' Yahudi, aleng uh kanak jarun inih? Avin kalo' uh nyineng kelawing na' men béh matan dau pa'un, iha' nah kalo' nei nih seng nga'um sebayang ha' unan Na'.”

³ Kelenghen Herudes nah dengah anan, iha' pah tekjet ngihau dahin lim-lim huang daléh Yerusalem pah ngihau lahuh.

⁴ Pelalau en na' peng nah lim daha' imam aya' dahin daha' aleng gem surat, pelalau meteng daha' hino' ngavan kanak Kristus.

⁵ Iha' daha' kuma', “Ha' daléh Betlehem ha' tana Yudea,” ken daha', “avin uh té' kalung nabi nunih,

⁶ ‘U Betlehem ha' tana Yudea, em peletu ika' da'uk aran ka' té' hang daha' aleng dekaya' ha' daléh Yudea, avin men alem ka' seng nei nyemau ji bangur aleng seng puboh pahu Kui Israel,’ ken surat anan.”

⁷ Uh anan en Herudes uvui nah dalo' kelunan aleng nyemugen atih nyilem, ngetneng marung tegu kelawing anan nei nyemau.

⁸ Pelalau ha' nyihu dalo' anan tei ha' Betlehem, ken na', “Tangen nah kelo' ilau marung tuk anak atih. Tegu kelo' uh pesuk Iha' na'a, nei kelo' bara men akui, ja si' akui tei nyepukun sebayang ha' unan Na' lahuh,” ken na'.

⁹ Uh dalo' kelenghi dahun laja' nunan, leka' nah dalo' tei. Beka' kelawing aleng dalo' nyineng men béh matan dau pa'un atih pah tei una' té' dalo', ateng ha' ngeta' nyelibau ngavan nyam uk atih.

¹⁰ Tegu dalo' nyineng kelawing atih, melu lelan nah kenep dalo'.

¹¹ Tei nah dalo' alem uma atih, pelalau dalo' nyineng nyam uk atih dahin Maria hinan Na', pelalau nga'um nah dalo' sebayang té' Iha'. En dalo' ala nah daven dalo' aleng mahen, dahin ma'uk men Iha' met, dahin kemanyan dahin kenyu mur.

¹² En Allah bara nah dalo' alem nyupin dalo', em mun dalo' uli la'an men ngavan laja' Herudes, iha' nah dalo' tei uli pelui men alan ha' béh.

Yusuf dawa' Maria geri anak dawa' lap ha' Mesir

¹³ Lepah avut kelunan nyemugen atih tei uli, tula nah té' Yusuf alem nyupin na' ji meliket Tuhan aleng kuma', “Ma'un nah, ala nyam uk atih dahin hinan Na', geri lap ha' daléh Mesir. Melo' nah kelo' hinan ateng akui bara ika', avin Herudes seng ilau nyam uk anan, ngenep lematei iha',” ken na'.

¹⁴ Pelalau ma'un nah iha' geri nyam uk atih dahin hinan Na' tegu malem, pelalau leka' tei ha' daléh Mesir.

¹⁵ Melo' nah dalo' hinan ateng Herudes matei, ja la'ung nah ket aleng uh en Tuhan bara men ba ji nabi, dahun na', “Men daléh Mesir Akui uh muvui anak Kui,” ken Na'.

Laja' Herudes nyihu daha' lematei daha' nyam

¹⁶ Tegu Herudes jam dalo' aleng nyemugen atih uh peluvat iha', bunget lelan nah iha', pelalau ha' nyihu daha' tei lematei lim-lim daha' anak-laké' aleng urip dua' duman dahin aleng da'uk té' anan aleng ha' daléh Betlehem dahin ha' lim uma aleng jeleng daléh anan; iha' ngioh dara aleng kitan na' ngetneng dalo' aleng nyemugen atih.

¹⁷ Tegu anan la'ung nah dahun Tuhan men nabi Yeremia, dahun na',

¹⁸ “Kelenghi nah! Ha' Rama tula nah dahun angih, tirau aleng kelalau lalé' katé', iha' tih Rahel hi'en nangih nirau namu anak na', nusi' ha' mun tei halau, avin anak na' uh em té' la'an,” ken nabi anan.

Yusuf dawa' Maria uli ha' daléh Nazaret

¹⁹ Hu'uh Herudes matei, tula nah ji meliket Tuhan té' Yusuf alem nyupin na' ha' daléh Mesir,

²⁰ aleng kuma' men iha', “Ma'un nah, geri nyam uk atih dahin hinan Na', tei ha' daléh Israel, avin uh matei nah lim daha' aleng ngenep lematei nyam uk anih di,” ken na'.

²¹ Ma'un nah iha', en na' geri nah nyam uk atih dahin hinan Na', pelalau tei ha' daléh Israel.

²² Kitan na' dengah Arkhelaus uh jadi' laja' ha' tana Yudea, kalui taman na' Herudes, takut pah iha' tei hinan. Té' pah Allah bara iha' alem nyupin na', avin anan pelalau nyayang nah iha' tei ha' daléh Galilea.

²³ Tei nah iha' ha' ji daléh aleng aran na' Nazaret, ja la'ung nah dahun Tuhan men ba daha' nabi, dahun daha', “Iha' nah aleng seng en daha' kuma' kelunan Nazaret.”