MARKUS 6 - SURAT TUHAN Dahun Kayan 1990

Tuhan Yesus en daha' ha' Nazaret uau

¹ Leka' nah Yesus men inan, tei ha' daléh Na' dep, anak sekulah Na' pah ngioh Iha'.

² Tegu Dau Kelarah, tei nah Iha' katuk daha' alem uma sebayang. Kahum daha' aleng kelenghi dahun Na' melak, ken daha', “Men ino' kah kelunan anih ala katuk aleng nunih?” Té' pah, “Ugé' ano' aleng en Na' ala anih?’ Nuno' tuk Iha' na hadui aleng ningan anih?

³ Awi laké' tukeng kayo' arei di kah laké' taman Na' di, dahin anak Maria dih, harin Na' kah Yakobus dahin Yoses dahin Yudas, dahin Simon pah, té' pah harin-doh Na' tinih té' hang tam lahuh,” ken daha'. Daha' pah heléh dahin muau Iha'.

⁴ Bi ken Yesus men daha' atih, “Ji la'ung nabi adang en daha' hino'-hino' ju, beka' alem daléh na' dep daha' em kelenghi dahun na', nurei pah daha' harin na' dahin uma na' dep lahuh,” ken Na'.

⁵ Tinan nusi' nah Iha' deng na hadui aleng ngavan daha' ngeniheng, bi kanya tua kelunan aleng perah en Na' petagéh, aleng en Na' tei usu Na' té' ujung daha' atih.

⁶ Ngeniheng nah Iha' avin daha' atih em nginah. Tei nah Iha' ha' uma-uma ha' béh, katuk daha'.

Tuhan Yesus nyihu dalo' pulu-dua' anak sekulah Na' tei

⁷ En Na' uvui nah dalo' pulu-dua' la'ung, dahin nyihu dalo' tei pehiget dua'. En Na' uk nah men dalo' tingan gem to',

⁸ dahin em mun dalo' geri nguyo', bi ji hekun tua, peksak pah meng geri, ajat pah meng geri, meng geri ligit alem senang,

⁹ deng kah pakei kasut, bi meng pakei basung petbin.

¹⁰ Ken Na' men dalo', “Hino'-hino' kelo' lebau uma daha' hinan nah kelo' melo' ateng kelo' leka' men inan la'an.

¹¹ Daha' ano' aleng em ala kelo', em kaséh kelenghi dahun kelo' lahuh, hiran kelo' musang men uma atih, sayu kelo' negak pup kudek kelo', anan nah tada' daha' em ala dahun kelo' anan,” ken Na'.

¹² Musang nah dalo' tei pekatuk kelunan, dahin nyihu daha' ngelisah kenep.

¹³ Dalo' pah mesau kuri-kuri to', dahin musut kenyu té' kahum kelunan aleng perah, dahin petagéh daha'.

Marung Yohanes aleng Meduh matei kenan laja' Herodes

¹⁴ Kitan Herodes nah dengah marung Yesus, avin uh putat dengah marung aran Na'. Ken na', “Uh peju nah Yohanes aleng Meduh men hang kelunan aleng matei. Atih nah tavit tingan nei tula men alem Na'.”

¹⁵ Té' pah kelunan ha' béh aleng kuma', “Anih nah Elia,” té' pah aleng kuma', “Iha' anih nah ji nabi men hang daha' nabi menuna' dih.”

¹⁶ Bi tegu Herodes kelenghi dengah atih, ken na', “Yohanes anih nah aleng uh ek ngulem kahung na' di. Iha' uh peju murip nah anih la'an.”

¹⁷ Avin batung Herodes aleng uh nyihu daha' tei mapuh Yohanes en na' ngaput nah iha' metei iha' alem jin avin kenan Herodias aleng hawan harin na' Filipus, avin Herodes pah uh pehawa' dahin na'.

¹⁸ Avin tavit Yohanes uh kuma' men Herodes, “Nusi' tekep ika' ala hawan harim,” ken na'.

¹⁹ Avin anan Herodias pa'en heléh té' iha' dahin kenep na' ngenep lematei iha', bi nusi' ha' deng,

²⁰ avin Herodes takut té' Yohanes. Kitan na' iha' ji kelunan aleng teneng dahin ma'ang, iha' nah iha' pa'en mengan-mengan puboh iha'. Kaséh pah iha' kelenghi dahun Yohanes tih, bi tegu iha' kelenghi dahun na', kawah lan nah kenep na'.

²¹ Té' jaka' ji dau aya', iha' tih dau kanak Herodes, iha' na ji kuman aya' men daha' aleng ja dahin daha' kepala' seladu dahin daha' aleng dekaya' ha' daléh Galilea.

²² Tegu anak Herodias aleng doh tei nyivan, sayu lan kenep Herodes, dahin daha' aleng pahlung dahin na' atih pah sayu kenep nyineng iha' nyivan. Ken laja' men nyemdoh atih, “Ket nun aleng kenep ka' aleng seng ek uk men ika', in akei nah.”

²³ Tevah nah Herodes men iha', ken na', “Ket nun aleng seng in ilau té' akui adang kui ma'uk men ika', aleng ji unang keligem kui pah ek uk loh kah.”

²⁴ Tei nah nyemdoh atih meteng hinan na, “Ket nun aleng seng ek akei?” ken na'. Nyu'ei nah hinan na', “Akei nah kahung Yohanes aleng Meduh,” ken na'.

²⁵ Tei nah iha' salet-salet pala laja' atih tei akei té' iha', “Kahung Yohanes aleng Meduh, iha', aleng ek kahi té' ika', in uk men akui alem ji uit,” ken na'.

²⁶ Pelalau laja' anan kelalau ji'ek kenep, bi avin iha' uh tevah, té' pah avin iha' hituk té' daha' aleng melo' dahin na' lahuh, iha' nah iha' em deng pamoh iha'.

²⁷ Pelalau iha' nyihu ji seladu aleng pian uma na' tei ala kahung Yohanes. Kelunan atih pah tei ngulem kahung Yohanes alem jin.

²⁸ En na' geri nah kahung na' atih alem uit, en na' uk nah men nyemdoh atih, nyemdoh atih pah ma'uk na' men hinan na' lahuh.

²⁹ Tegu dalo' anak sekulah jam tuk atih, tei nah dalo' ala putut na', en dalo' lo' nah alem tanem.

Tuhan Yesus makan lima' libu' kelunan

³⁰ Pepeng nah dalo' lim aleng sihu Tuhan, tei pala Yesus, En dalo' bara lim-lim nah marung tuk ket aleng uh kenan dalo' dahin aleng uh en dalo' katuk.

³¹ Ken Na' nah men dalo' atih, “Tei nah telo' dep ha' ngavan aleng henung, ja pek'uh la'ei kelo' hitih,” ken Na'. Avin kahum kelunan liwet-liwet, tei kuman pah dalo' em havah.

³² Tei nah dalo' peharuk tei ha' ngavan aleng henung.

³³ Daha' aleng kahum pah nyineng dalo' atih tei, kahum pah daha' nelana' dalo', musang nah daha' atih men daléh lim, panau tana tepurung tei pepeng hitih. Ateng nah daha' una' té' dalo' aleng men haruk atih.

³⁴ Napah nah Yesus, en Na' nyineng, beleka' bangu lelan kelunan uh pepeng, perah henga' Ha' masi daha', avin daha' awi duba aleng em té' gebala, iha' nah Iha' pekatuk daha', kahum na'an katuk en Na' na men daha'.

³⁵ Jeleng dau herep dalo' anak sekulah Na' pah nei pala Iha', ken dalo', “Anih ngavan aleng henung, dau pah seng lidem.

³⁶ Nyihu nah daha' anih uli ja daha' tei ha' lepau-lepau dahin uma-uma, ja daha' melé' ket en daha' kani.”

³⁷ Nyu'ei nah Yesus, ken Na', “En kelo' makan nah daha' lim arin,” ken Na'. Ken dalo' men Iha', “Kalo' pah tei melé' luti dua' atuh li'ap pirek belin na', en uk men daha' anih en daha' kani, seng deng men daha' iah?” ken dalo'.

³⁸ Kuma' nah Iha' men dalo', “Kuri li'ap luti té' té' kelo'? Tei kelo' nyineng.” Kitan dalo' nah, “Té' kah luti lima' li'ap, dahin masik dua' husau,” ken dalo'.

³⁹ En Na' nyihu nah daha' melo' na ukup té' hujung uro' aleng murip atih.

⁴⁰ Pelalau melo' nah daha' atih na ukup, té' aleng ji atuh, té' aleng lima'-pulu kahum daha'.

⁴¹ En Yesus ala nah luti lima' li'ap dahin masik dua' husau atih, dahin neng'o ha' langit, bara sayu kenep. Uh anan en Na' mi'ang-mi'ang nah luti atih, en Na' uk nah men dalo' anak sekulah Na', ja dalo' tei matah na' men daha'. Masik aleng dua' husau atih pah, en Na' petulan men daha' lim.

⁴² Kuman nah daha' lim-lim ateng besoh.

⁴³ En dalo' peng nah la'an daha', pulu-dua' dayah penu, té' pah la'an masik lahuh.

⁴⁴ Té' pah daha' aleng kuman luti anan, lima' libu' kelunan laké'.

Tuhan Yesus panau hujung ata' bawang

⁴⁵ Pelalau en Na' neven nah dalo' anak sekulah Na' tei alem haruk lawat una' ha' daléh Betsaida, alem Iha' nyihu daha' ngahum anan tei uli.

⁴⁶ Uh anan leka' nah Iha' lahuh tei ha' ngalang seng ngenep sebayang.

⁴⁷ Uh lidem nah dau, haruk atih pah uh ateng ha' belua bawang, Yesus dep kah hujung tana.

⁴⁸ En Na' nyineng nah dalo' atih la'ei lelan mesei, avin bahui nyura' haruk atih. Lalau pukun telo' malem tei nah Iha' ha' dalo', panau ujung ata' bawang, seng lalau dalo' atih.

⁴⁹ Bi tegu dalo' jam Iha' panau ujung ata' bawang dalo' kuma' Iha' to', pelalau medéng nah dalo',

⁵⁰ avin kitan dalo' lim Iha', tekjet pah dalo' nyineng Iha'. Bi pelalau Iha' duan dalo', ken Na', “Petneng nah kenep kelo', Akui nah anih, meng takut.”

⁵¹ Tei nah Iha' alem haruk dahin dalo'. Pelalau ngeta' nah bahui atih, lim dalo' atih pah ngeniheng alem kenep dalo',

⁵² avin dalo' em payan betut marung tuk luti atih, avin kenep dalo' avi tageng.

Yesus petagéh daha' kahum

⁵³ Tegu dalo' uh dapit, nyangei nah dalo' ha' Genesaret, dahin ngatung haruk dalo'.

⁵⁴ Tegu dalo' uh napah men haruk, pelalau daha' nelana' Yesus,

⁵⁵ pelalau daha' tei tepurung té' alem daléh anan, dahin tei geri daha' aleng perah, pektang daha' paget ngavan daha' miri, tei pala Yesus ha' ngavan Na' aleng kitan daha'.

⁵⁶ Hino'-hino' kayeng anau Na', halem daléh kah, ha' uma-uma kah, ha' lepau-lepau kah aleng avan Na' tei, hinan kah daha' meté' geri lim daha' aleng perah melo' daha' té' béh alan, té' jenawa kah, dahin kahi asi lelan té' Yesus, seng ngenep gem lirin basung Na' tua. Kuri-kuri daha' aleng gem Iha', daha' pah magéh.