MARKUS 15 - SURAT TUHAN Dahun Kayan 1990

Tuhan Yesus ha' unan Pilatus

¹ Tegu jihima pesun-pesun, lim-lim daha' imam aya' dahin daha' aleng dekaya' dahin daha' aleng puboh surat Tuhan, dahin lim daha' kemiti atih pakat nah daha'. En daha' ngaput nah Yesus, en daha' geri nah Iha', en daha' uk men Pilatus.

² Pilatus pah meteng Iha', “Ika' aleng Laja' daha' Yahudi iah?” Iha' nyu'ei, “Awi dahum anan kah.”

³ Kahum lan na'an kema' daha' imam aya' anan té' Yesus.

⁴ En Pilatus teng nah Iha' ngelua', ken na', “Nusi' té' Ika' nyu'ei nun-nun iah? Kelenghi Im kuri-kuri kahum kema' daha' té' Ika' nih.”

⁵ Ji-ji pah Iha' em nyu'ei, ateng Pilatus ngeniheng.

Yesus en daha' uk ja daha' nyelepang Iha'

⁶ Tegu dau kuman aya' atih, Pilatus mengalei makau ji kelunan men daha' men alem jin, iha' nah hi-hi aleng en daha' akei.

⁷ Té' ji kelunan aleng aran na' Barabas aleng en daha ngaput dahin daha' aleng uh nyudung lawan perintah, daha' aleng lematei kelunan alem tegu atih.

⁸ Daha' kahum atih tei akei Pilatus na awi kalei na' men daha'.

⁹ Nyu'ei nah Pilatus daha' atih, ken na', “Kaséh kam akui seng makau Laja' daha' Yahudi iah?”

¹⁰ Avin kitan na' daha' imam aya' uh ma'uk Iha' avin daha' mi'en té' Iha'.

¹¹ Bi daha' imam aya' atih pah tei nusuk-nusuk daha' kahum atih, kuma' tekep iha' makau Barabas men daha'.

¹² Nyu'ei pah Pilatus la'an, ken na' men daha', “Nun aleng kaséh kam ek na té' kelunan aleng kam kuma' Laja' daha' Yahudi anih?”

¹³ Medéng nah daha' atih la'an, “Selepang nah Iha'.”

¹⁴ Ken Pilatus men daha', “Avin nun? Ket nun aleng ji'ek aleng uh Na' na?” Sa'-sa' petajen pah daha' atih medéng, “Selepang nah Iha'.”

¹⁵ Pilatus ngenep ngesayu kenep daha' kahum atih, iha' nah iha' makau Barabas men daha', en na' jeliket nah Yesus, en na' uk nah Iha' ja daha' nyelepang Iha'.

Daha' seladu muau Tuhan Yesus

¹⁶ Daha' seladu geri nah Iha' hujung latan, iha' tih ha' latan uma ngavan kemiti besara', pelalau en daha' peng nah daha' seladu lim-lim.

¹⁷ En daha' tei nah ji basung bela té' Yesus, en daha' anyam pah ji lavung uleng men Iha', en daha' tei té' kahung Na'.

¹⁸ Uh anan daha' tabi' Iha', ken daha', “Ju nah Laja' daha' Yahudi.”

¹⁹ Pelalau en daha' nukun nah kahung Na' té' ji iung bulu, daha' lemura pah iha', pelalau daha' nyepukun sebayang té' Iha'.

Tuhan Yesus matei té' kayo' salip

²⁰ Uh daha' ngejau-ngejau Iha' nunan, en daha' bet nah basung bela atih, en daha' tei nah basung Na' dep té' Iha' ngelua', en daha' geri nah iha' musang ja daha' nyelepang Iha'.

²¹ Té' ji kelunan aleng lalau tinan nei men daléh ha' béh, iha' atih Simon, kelunan Kirene, taman Aleksander dahin Rufus, daha' ngepden iha' nyi'un kayo' salip Yesus.

²² Daha' geri nah Iha' ha' ji ngavan, aran na' Golgota, aleng aran daho' atih, Avan Tukang Kahung.

²³ En daha' uk nah men Iha' ata' bua agun aleng peklet taban malin, bi nusi' Ha' ala na'.

²⁴ Uh anan en daha' nyelepang nah Iha'. Ket en Na' pakei daha' petulan, en daha' tikem surat, hi kah aleng seng hipun na' ha'ut-ha'ut la'ung.

²⁵ Tegu na' atih, tegu daha' nyelepang Iha', pukun pitan jihima.

²⁶ Té' pah surat selema' Na' en daha' na en daha' tei nyelibau Na', “Laja' daha' Yahudi.”

²⁷ En daha' selepang pah dahin Na' dua' kelunan nakau, ji la'ung bah ta'o Na', ji la'ung bah ulei.

²⁸ Iha' nah surat Tuhan nei la'ung, aleng kuma', “Iha' en daha' ujap té' hang daha' aleng nyelalang.”

²⁹ Daha' aleng lalau tinan meté' nuten-nuten Iha', daha' meté' mileng kahung daha', ken daha', “Bei! Ika' aleng deng mayah Uma Allah dahin meju na' la'an alem telo' dau,

³⁰ pekurip nah batung Ka' dep, ngiléh nah Im men kayo' salip anan.”

³¹ Nurei pah daha' imam aya' dahin daha' aleng puboh surat Tuhan lahuh nuten Iha' pedeng daha', ken daha', “Kelunan ha' béh, uh Im pekurip, beka' batung Ka' dep, nusi' Ka' deng pekurip na'.

³² Sayu nah Kristus Laja' daha' Israel nei ngiléh kerei inih men salip, ja kamé' nyineng pelalau nginah.” Kelunan aleng en daha' selepang dahin Na' atih pah nuten Iha' lahuh.

³³ Ateng nah dau negreng, pelalau lidem nah té' lim usun tana, ateng pukun telo' levi.

³⁴ Tegu pukun telo' atih medéng nah Yesus, dekaya' dahun Na', ken Na', “Eloi, Eloi, lama sabaktani,” aleng aran daho' atih, “U Allah Kui, u Allah Kui, na' nun nah Ika' melek Akui?”

³⁵ Kelenghen daha' aleng nekring hitih daho' atih, balei men daha' kuma, “Nyineng, Iha' muvui Elia anan.”

³⁶ Lun tepurung nah ji kelunan tei mesup lumut karang alem ata' agun aleng sem, en na' tei té' ujung bulu, en na' uk nah Iha' du'i, ken na', “Kelung nah. Sek tam nyineng kelung si' Elia nei mebet Iha'.”

³⁷ Pelalau medéng nah Yesus dahin daho' aya', pelalau ma'uk hengan Na'.

³⁸ Pelalau liding balun Uma Allah pah birak men ujung ateng hida.

³⁹ Tegu laké' kopral aleng nekring jeleng béh Na' nyineng Iha' ma'uk hengan Na' nunan, iha' ha' kuma', “Lan kah kelunan anih Anak Allah.”

⁴⁰ Kahum pah daha' doh aleng nyineng men su, Maria Magdalena, dahin Maria hinan Yakobus aleng da'uk, dahin Yoses dahin Salome pah té' dahin daha'.

⁴¹ Dalo' atih ngioh Yesus dahin masi Iha' alem Iha' té' ha' Galilea. Té' pah kahum daha' doh ha' béh lahuh, aleng uh tei ha' Yerusalem dahin Na'.

Yusuf nanem Tuhan Yesus

⁴² Avin atih dau Petmei, iha' atih dau em payan Dau Kelarah, tegu dau uh levi,

⁴³ nei nah Yusuf, kelunan Arimatea, laké' atih aleng en daha' ju, iha' atih ji kelunan men dalo' kemiti aya', iha' pah aleng pidah keligem Allah. Laké' atih ngelemudum tei ha' unan Pilatus akei patei Yesus.

⁴⁴ Melak nah Pilatus avin Iha' salet matei, en na' duan nah laké' kopral, iha' nah iha' meteng iha' marung Iha' seng uh matei.

⁴⁵ Uh kitan na' men kopral atih, en na' uk nah patei atih men Yusuf.

⁴⁶ Yusuf pah melé' balun alut lanih, en na' uéh nah patei Yesus, en na' nutun nah Iha' té' balun alut lanih atih dih, en na' tei nah Iha' alem tanem aleng en daha' ngeluvang alem bato', uh anan iha' muvin ji bato' en na' tei ben luvang tanem atih.

⁴⁷ Bi jam kah Maria Magdalena dahin Maria hinan Yoses ngavan daha' metei Yesus titih.