MARKUS 14 - SURAT TUHAN Dahun Kayan 1990

Ji doh musut kenyu té' Tuhan Yesus

¹ Té' dua' dau la'an em payan dau kuman aya' Paskah dahin dau aya' Kuman Luti Aleng em Té' Tavah, daha' imam aya' dahin daha' aleng puboh surat Tuhan ilau alan ngavan daha' seng peluvat mapuh Yesus dahin seng lematei Iha'.

² Avin ken daha', “Meng nah na na' tegu dau aya', bahi daha' jevang nei segiwan.”

³ Alem Iha' té' ha' Betania alem uma Simon aleng perah malin, alem Iha' melo' kuman, nei nah ji doh geri ji gutun kenyu narwastu, aleng bau legah na', en na' mi'ang nah, pelalau muak na' té' ujung kahung Yesus.

⁴ Té' pah daha' aleng heléh, ken dalo', “Nun tuman kenyu aleng sayu anih tei java' nunan?

⁵ Iha' itam belé' kenyu atih, adang legah na' huwi telo' atuh li'ap pirek, deng en uk men daha' aleng humé'.” Nunan dahun daha' ngelebeng iha'.

⁶ Bi ken Yesus, “Bei ha'. Na' nun kam pekawah kenep na'? Iha' uh na ji hadui aleng sayu té' Akui.

⁷ Avin kelunan humé' té' pa'en kah daha' dahin kam, hiran-hiran kam kaséh deng kah ikam na sayu men daha'. Akui anih, nusi' Kui té' pa'en dahin kam.

⁸ Doh anih uh na aleng deng kenep na', iha' uh musut ket anih té' batung Kui em payan daha' nepiha' Akui.

⁹ Lan Akui kuma' men ikam, hino'-hino' ha' usun tana anih dengah sayu anih seng en daha' pedengah, hadui doh anih pah seng en daha' nira lahuh, avan hituk té' iha'.”

Hadui Yudas

¹⁰ Yudas Iskariot, iha' tih ji men hang daha' pulu-dua', tei pala daha' imam aya', seng nebau ma'uk Yesus.

¹¹ Kelalau sayu nah kenep daha' tegu daha' kelenghi daho' atih, pelalau daha' na jaji ma'uk ligit men iha'. Men'uh anan iha' ilau ji jaka' aleng sayu ja iha' ma'uk Yesus men daha'.

Kuman aya' Paskah dahin pahlung malem

¹² Dau aleng aring daha' kuman luti aleng em té' tavah, iha' nah tegu daha' nevek Paskah, dalo' anak sekulah pah kuma' men Yesus, “Hino' kenep Ka' kalo' nemei Ngavam kuman Paskah?”

¹³ En Na' nyihu nah dua' la'ung anak sekulah Na', ken Na' men dawa' atih, “Tei nah kua' alem daléh, hinan ji laké' aleng geri tajau penu ata' seng pepsuk dahin kua', en kua' ngioh nah iha'.

¹⁴ Uma ano' aleng ngavan na' tei, sayu kua' bara men laké' aya' uma atih, ‘Ken Guru, Hino' amin Ngavak seng kuman Paskah dahin dalo' anak sekulah Kui?’ ken kua'.

¹⁵ Iha' pah seng bara men kua' ji amin aya' aleng hujung, aleng té' uvung na' uh temei. Hinan nah kua' nemei men telo'.”

¹⁶ Tei nah dawa' anak sekulah anan, tei alem daléh, pesuk nah dawa' piah awi aleng uh Yesus bara men dawa', dawa' pah nemei Paskah anan.

¹⁷ Tegu dau uh lidem, nei nah Yesus dahin dalo' pulu-dua' anak sekulah Na'.

¹⁸ Alem dalo' melo' kuman, Yesus kuma', “Dahuk lan men kelo', ji men hang kelo' seng nebau ma'uk Akui, iha' tih ji aleng melo' kuman Dahik.”

¹⁹ Ji'ek lelan nah kenep dalo', dalo' kuma' ha'ut la'ung men Iha', “Akui iah?” ken dalo'.

²⁰ Ken Na' men dalo' atih, “Iha' ji men hang kelo' pulu-dua', iha' nah iha' aleng petugung medet Dahik.

²¹ Anak-kelunan adang seng tei, piah aleng uh kalung, bi em té' loh nah bang na' men kelunan aleng nebau Anak-kelunan atih. Pulang sayu hinan na' em nganak iha',” ken Na'.

Pahlung dahin Tuhan

²² Alem dalo' kuman, en Yesus ala nah luti, uh nah Iha' sebayang, en Na' mi'ang-mi'ang nah, en Na' uk nah men dalo', ken Na', “Ala nah, anih nah batung Kui.”

²³ En Na' ala pah ji tebuk, uh nah Iha' bara sayu kenep en Na' uk nah men dalo', dalo' lim pah du'i té' tebuk atih.

²⁴ Ken Na' nah men dalo', “Anih nah daha Kui, daha aleng bara jaji Kui, aleng Ek uak men kelunan ngahum.

²⁵ Dahuk lan men kelo', nusi' nah Akui du'i ata' bua agun anih la'an ateng dau Akui du'i ata' bua agun aleng maring té' alem keligem Allah.”

Tuhan bara pekuna Petrus seng pamoh Iha'

²⁶ Uh nah dalo' nyanyi, musang nah dalo' tei ha' ngalang Zaitun.

²⁷ Ken Yesus men dalo', “Kelo' lim seng duhei kenep té' Akui, avin té' uh kalung, ‘Akui seng jeliket laké' aleng puboh duba atih, ateng daha' duba tei petat-purat tua.’

²⁸ Bi hu'uh Kui nei peju, Akui seng panau una' té' kelo' ha' Galilea.”

²⁹ Ken Petrus men Iha', “Pulu hangun pah kelunan lim duhei kenep té' Ika', batung kui nusi' kui duhei.”

³⁰ Ken Yesus men iha', “Dahuk lan men ika', men malem anih nusi' payan hiap ngeturut dua' hangun, ika' uh pamoh Akui telo' hangun.”

³¹ Sa' petajen Petrus kuma', “Pulu hangun pah akui matei dahin Tuhan, peletu-letu akui em pamoh Ika'.” Nunan pah dahun dalo' lim.

Yesus sebayang alem lida Getsemani

³² Nei nah dalo' té' ji ngavan aleng aran na' Getsemani. Ken Na' men dalo' anak sekulah Na', “Melo' nah kelo' tinih alem Akui sebayang.”

³³ En Na' geri nah Petrus dahin Yakobus dahin Yohanes dahin Na'. Iha' pah nei ngeniheng lelan dahin kawah lélan kenep Na',

³⁴ ken Na' men dalo', “Kenep Kui kelalau lalé' bahat, awi seng matei dih henoh Kui anih. Melo' nah kelo' tinih mengan nah kelo'.”

³⁵ Men'uh anan tei nah Iha' su uk, pelalau Ha' nga'um ha' tana dahin sebayang, awi ha' deng, jukdau Iha' pebet men tusah anan.

³⁶ Ken Na', “U Amei, Ika' aleng gem ket lim-lim, Im ukéh nah tebuk anih men Akui, bi alem ha' nutih pah meng ngioh kenep Kui, bi sayu nah ngioh kenep Ka' tua.”

³⁷ Nei nah Iha', kitan Na' dalo' anan tudu, ken Na' men Petrus, “U Simon, tudu ka' ia? Nusi' ka' deng mengan alem ji jam tua iah?

³⁸ Mengan nah kelo' dahin sebayang, ja kelo' em ga' pesek. Lan kenep kelo' ngenep, bi batung kelo' lema.”

³⁹ Lun tei nah Yesus ngelua' sebayang, nunan loh kah dahun Na'.

⁴⁰ Nei nah Iha' nekulah, beka' tudu loh kah dalo' avin maké' lan-lan henoh matan dalo', nusi' pah dalo' jam nyu'ei Iha'.

⁴¹ Men'uh anan tei nah Iha' ketlo' hangun na', ken Na' men dalo', ‘Tudu nah kelo' kerei inih, ja ngelarah pek'uh la'ei kelo'. Deng nah anih, jam na' uh ateng; nyineng, Anak-kelunan uh en daha' uk alem usu daha' aleng sala'.

⁴² Ma'un nah kelo', tei nah telo'. Nyineng, kelunan aleng ma'uk Akui uh jeleng.”

Yudas nebau Tuhan Yesus

⁴³ Pelalau alem Iha' duan, nei nah Yudas, ji men hang dalo' pulu-dua' atih, kelalau kahum pah kelunan dahin na' aleng paget malat dahin tukun, aleng hu'en daha' aleng imam aya' dahin daha' aleng puboh surat Tuhan dahin daha' aleng dekaya'.

⁴⁴ Kelunan aleng uh ma'uk Yesus atih uh bara tada' men daha' atih, ken na', “Ano' aleng ek marek na'a, iha' nah aleng Iha'. Apuh nah Iha', geri nah Iha' sayu-sayu.”

⁴⁵ Tegu iha' uh ateng, pelalau iha' tei ha' Yesus, dahin kuma' men Iha', “U Guru,” ken na', pelalau ha' marek Iha'.

⁴⁶ Daha' pah pelalau metei usu daha' té' Iha', pelalau mapuh Iha'.

⁴⁷ Ji kelunan men hang dalo' aleng nekring tinan mejat malat na', en na' miteng panyin imam aya', mebet iling na'.

⁴⁸ Ken Yesus men kelunan atih, “Ikam anih uh musang piah awi ala ji kelunan nakau, dahin geri malat dahin tukun seng ngenep mapuh Akui iah?

⁴⁹ Bi ha'ut-ha'ut dau kah Akui té' dahin kam alem Uma Allah dahin pekatuk ikam di, beka' nusi' pah ikam mapuh Akui. Bi lim anih uh nei la'ung nunih piah aleng uh kalung alem surat Tuhan,” ken Na'.

⁵⁰ Lim dalo' anak sekulah pah lap nah, melek Iha'.

⁵¹ Té' ji nyemaké' ngioh Yesus, besahan na' tua en na' té'. Daha' atih gem iha',

⁵² iha' pah melek besahan na' atih, pelalau lap utoh.

⁵³ En daha' atih geri nah Yesus pala imam aya'. Lim daha' imam aya' dahin daha' aleng dekaya' dahin daha' aleng puboh surat Tuhan pah pepeng dahin na'.

⁵⁴ Petrus pah ngioh Iha' men su, uh nei halem, ateng ha' latan imam aya', tinan nah iha' melo' dahin daha' pulis, nyido' béh apui.

Tuhan Yesus ha' unan Kayafas

⁵⁵ Daha' imam aya' dahin lim daha' kemiti ilau teksi' aleng pesala Yesus, ja daha' deng lematei Iha', bi em té' loh teksi'.

⁵⁶ Kahum kelunan nei teksi' pamoh na Iha', bi lim teksi' atih nusi' té' ha' piah.

⁵⁷ Té' kuri-kuri kelunan nekring, dahin na teksi' pamoh marung Iha', ken daha',

⁵⁸ “Kamé' uh kelenghi dahun Na' anih, ‘Akui seng mayah Uma Allah anih, aleng kenan usu daha' kelunan, alem telo' dau Akui seng meju Uma Allah ha' béh, aleng em kenan usu kelunan.’ ”

⁵⁹ Iha' pah nutih teksi' daha' atih, nusi' loh kah iha' piah.

⁶⁰ Nekring nah imam aya' té' hang daha' atih, pelalau meteng Yesus, ken na', “Ji-ji Ika' seng em nyu'ei iah? Nun aleng teksi' kelunan anih té' Ika'?”

⁶¹ Bi Yesus pah tepaka' tua', nusi' té' Iha' nyu'ei nun-nun. Meteng pah imam aya' Iha' la'an, ken na', “Lan kah Ika' Kristus iah, Anak Allah aleng en daha' ju lelan atih?”

⁶² Nyu'ei nah Yesus, “Akui nah Iha'. Ikam pah seng nyineng Anak-kelunan melo' pedah ta'o Allah aleng Ningan, dahin nei alem avun men langit.”

⁶³ Pelalau nah imam aya' atih mirak kanan na', ken na', “Nun bang na' teksi' la'an?

⁶⁴ Ikam uh kelenghi dahun Na' peji'ek Allah. Nuno' kurin kelo'?” Pelalau daha' atih lim mutet daho' kuma' Iha' tekep matei.

⁶⁵ Té' balei daha' lemura Iha' dahin ngetutuk hineng Na', dahin napeng Iha', dahin kuma' men Iha', “Bara nan Im!” Daha' pulis pah ala Iha' dahin mukut Iha' lahuh.

Petrus pamoh Tuhan Yesus; iha' pekuli kenep

⁶⁶ Té' pah alem Petrus té' hida ha' latan, nei nah ji nyemdoh panyin imam aya' anan,

⁶⁷ en na' nyineng Petrus nyido', pelalau iha' nyineng iha' dahin kuma', “Ika' pah té' dahin Yesus, kelunan Nazaret atih.”

⁶⁸ Nyu'ei nah Petrus, ken na', “Nusi' kui jam ket aleng kurim anan.” Pelalau musang nah iha' tei ha' ladang ba ketamen, hiap pah ngeturut lahuh.

⁶⁹ En nyemdoh anan nyineng pah iha', kuma' nah iha' la'an men daha' aleng nekring hinan, “Iha' anih pah ji men dalo' atih dih.”

⁷⁰ Pamoh pah iha' nekulah. Men'uh anan, daha' aleng nekring hinan kuma' men Petrus, “Lan kah ika' ji men dalo' atih, avin ika' kelunan Galilea.”

⁷¹ Bi iha' nunu dahin tevah, “Nusi' té' kui jam kelunan aleng kurin kam anan,” ken na'.

⁷² Tegu anan pah hiap ngeturut kedua' hangun. Pelalau hituk nah Petrus té' dahun Yesus men iha', iha' atih, “Nusi' payan hiap ngeturut dua' hangun, ika' uh pamoh Akui telo' hangun.” Tegu iha' hituk anan, pelalau nangih nah iha'.