MARKUS 12 - SURAT TUHAN Dahun Kayan 1990

Ivun kelunan aleng siwa' lida bua agun

¹ Yesus matoh dahun Na' men daha' na ivun. “Té' ji kelunan nuvuh ji lida bua agun, en na' ngelehen nah teliling na', en na' ngalé' na lesung ngavan ngera bua agun, en na' na nah ji uma bau-bau, uh anan en na' siwa' nah men kuri-kuri daha' aleng puboh lida na', uh anan leka' nah iha' tei ha' daléh ha' béh.

² Tegu jaka' na', iha' nyihu ji nyam-panyin na' tei ha' daha' aleng tuboh lida anan, ja iha' deng ala bua té' lida agun na' atih.

³ Pelalau daha' gem iha' dahin nukun iha', dahin muga iha' halah tua.

⁴ Uh nunan di, iha' nyihu ji panyin na' la'an tei pala daha', iha' pah ga' kahung na' kenan daha' atih lahuh, daha' peha'éh iha' tua.

⁵ Uh pah anan, en na' nyihu nah ji aleng ha' béh la'an, laké' atih pah en daha' lematei. Kahum pah daha' tei la'an en na' nyihu, kelunan atih pah balei en daha' nyaman, balei en daha' lematei.

⁶ Bi té' pah ji anak na' aleng atek en na' nyalam lan aleng seng en na' nei la'an, lun en na' nyihu nah iha' tei ha' daha', ken na', ‘Adang daha' atih seng takut té' anak kui anih,’ ken na'.

⁷ Bi ken daha' aleng puboh lida atih pedeng daha' dep, ‘Iha' anih nah aleng seng hipun na' na'a. Nei nah telo', tei nah telo' lematei iha', ja telo' hipun tulan na',’ ken daha'.

⁸ Pelalau daha' gem iha', en daha' lematei nah iha', en daha' sau iha' hawang lida bua agun atih.

⁹ Men'uh anan ket nun nah aleng seng en laké' aleng hipun lida bua agun atih na? Adang iha' nei lematei kelunan aleng tuboh lida na' atih, pelalau ma'uk lida atih men daha' aleng ha' béh.

¹⁰ “Nusi' payan kam basa' surat Tuhan anih iah, dahun na', ‘Bato' aleng uh en tukeng uma sau, atih nah uh jadi' bato' tuvu.

¹¹ Anih nah hadui Tuhan, itam pah ngeniheng nyineng na'?’ ken surat atih.”

¹² Pelalau daha' ilau alan seng ngenep mapuh Yesus, bi takut nah daha' daha' kahum, avin kitan daha' Iha' uh na ivun atih mega' marung daha' atih dep. En daha' lek nah Iha', pelalau leka'.

Marung bayen sukei men Kaisar

¹³ En daha' nyihu nah kuri-kuri kelunan Farisi dahin kelunan aleng ngioh Herodes tei pala Iha', seng ngenep pikep dahun Na'.

¹⁴ Nei nah daha' pala Yesus, pelalau kuma' men Iha', “U Guru, kamé' jam Ika' ji kelunan aleng teneng, nusi' pah Ika' na kenep ngetuman té' kelunan, avin adang Ika' em nyineng jam kelunan, alan Allah pah Im katuk dahin teneng. Tekep kah kamé' ma'uk sukei men Kaisar iah? Nusi' iah?”

¹⁵ Bi kitan Na' daha' atih uh dua' jela', iha' nah Iha' kuma' men daha', “Na' nun kelo' seng pesek Akui? Geri nah ji li'ap pirek men Akui, ja Akui nyineng na'.”

¹⁶ En daha' geri nah. Ken Yesus men daha', “Gaben hi aleng anih, dahin kalung hi aleng anih?” ken Na'. Nyu'ei nah daha' atih, “Gaben Kaisar aleng anan dahin kalung na' kah anan lahuh.”

¹⁷ Ken Yesus, “Iha' nunan, en uk nah men Kaisar ket aleng anun Kaisar, dahin men Allah ket aleng anun Allah,” ken Na'. Ngeniheng nah daha' té' Iha'.

Marung daha' matei nei peju

¹⁸ Nei nah daha' Saduki pala Iha', aleng kuma' ha' em té' daha' aleng nei peju murip nekulah. Daha' meteng Iha', ken daha',

¹⁹ “U Guru, Musa uh ngalung tebara men itam, iha' laké' ji doh matei, bi nusi' payan té' anak na' dahin doh na' atih, bi laké' atih té' kah daha' harin-aké' na', sayu kah harin-aké' na' ala doh na' ja iha' na anak men iha' aleng uh matei atih.

²⁰ Té' dalo' peharin tusu la'ung. Aleng una' atih ala hawa', matei nah iha', alem iha' em té' anak.

²¹ Aleng kedua' atih pah ala doh atih, matei nah iha' lahuh, em payan té' anak na'. Aleng ketlo' atih, urei loh kah,

²² matei em té' anak, nunan lim nah dalo' tusu peharin anan dahin doh anan. Men'uh anan matei pah doh anan lahuh.

²³ Tegu dau daha' nei peju murip, seng hawan hi nah iha' men dalo' tusu atih? Avin dalo' tusu la'ung atih hu'uh ngehawa' iha',” ken dalo'.

²⁴ Ken Yesus, “Nusi' anih tavit kelo' nyayang iah, iha' tih avin kelo' em jam alem surat Tuhan, dahin tingan Allah lahuh?

²⁵ Avin tegu kelunan nei peju murip men hang kelunan matei, nusi' daha' ngehawa', nusi' pah daha' na hawa' daha' lahuh, bi daha' piah awi meliket aleng ha' Surga.

²⁶ “Marung tuk patei kelunan nei peju murip, nusi' payan kelo' basa' té' alem surat Musa iah, ha' ngavan marung kelukung uleng atih, marung Allah duan iha' nunih, ‘Akui anih nah Allah Abraham, dahin Allah Ishak, dahin Allah Yakub?’ ken Na'.

²⁷ Allah atih, nusi' Ha' Allah kelunan aleng uh matei. Iha' Allah daha' aleng murip. Aleng lan na' ikam tei lingo' nah anan,” ken Na'.

Marung tebara aleng dekaya' lan

²⁸ Nei nah ji men daha' aleng puboh surat Tuhan, en na' kelenghi nah dahun kelunan atih pepteng. Kitan na' Yesus uh teneng ma'uk hu'ei men daha' atih, en na' teng nah Iha', “Tebara ano' aleng dekaya' lan?” ken na'.

²⁹ Yesus nyu'ei, “Tebara aleng kelalau dekaya', ‘Kelenghi nah ikam, u Israel, Tuhan Allah tam Iha' nah Tuhan aleng ji tua.

³⁰ Tekep ika' nyalam Tuhan Allah ka' dahin ji tua kenep ka', dahin lim-lim urip ka', dahin ketu-ketu hituk ka', dahin lim tu'a ka' lahuh.’

³¹ Aleng kedua' pah, nunih, ‘Tekep nah ika' nualam té' kelunan aleng ha' béh piah awi ika' nyalam batung ka' dep.’ Nusi' té' tebara aleng dekaya' men'uh dua' tebara anih,’ ken Na'.

³² Nyu'ei nah laké' aleng puboh surat Tuhan atih men Iha', “Lan kah, Guru, teneng kah Dahum anan kuma', ‘Allah aleng ji tua, nusi' té' aleng dep men'uh Iha'.’

³³ Tana' ita' nyalam Iha' dahin ji tua kenep ta' dahin lim-lim jam ta', dahin lim-lim tu'a ta', ita' pah nyalam daha' aleng ha' béh piah awi ita' nyalam batung ta' dep, atih nah aleng kelalau dekaya' men'uh lim-lim ket en daha' pahun ih men Tuhan, dahin ket en daha' tevek tei laluh pah lahuh,” ken na'.

³⁴ Tegu Yesus jam iha' nyemugen kenep nyu'ei Iha', Iha' kuma' men iha', “Ika', nusi' nah ika' su men keligem Allah,” ken Na'. Men'uh anan ji kelunan pah em makang meteng Iha' la'an.

Kristus anak Daud iah?

³⁵ Té' ji hangun alem Yesus pekatuk alem Uma Allah, iha' Ha' meteng, “Nuno' tuk daha' aleng puboh surat Tuhan kuma' Kristus anak Daud?

³⁶ 13 Avin batung Daud dep pah aleng uh kuma' alem Belua' Ma'ang, ken na', ‘Tuhan Allah kuma' men Tuhan kui, Melo' nah Im peduh ta'o Kui ateng Kui na bunu Ka' temek kudek Ka',’ ken na'.

³⁷ Batung Daud pah aleng na aran Na' Tuhan na', seng nuno' kah tuk Iha' anak na'?” Kaséh lan daha' kelunan kahum atih kelenghi dahun Yesus tih.

Mengan daha' Farisi

³⁸ Alem Iha' katuk iha' Ha' kuma', “Mengan nah batung kam men daha' aleng puboh surat Tuhan, aleng kaséh panau pakei basung aru-aru atih, kaséh daha' kelunan jamat daha' ha' pasen,

³⁹ kaséh pah daha' melo' té' ujung ladung aleng sayu alem uma sebayang, dahin té' ngavan aleng sayu tegu daha' na kuman aya'.

⁴⁰ Daha' pekpah daven daha' debalo', dahin metuk sebayang daha' aru ja kelunan nyineng daha' tua. Kelunan anih nah aleng seng ga' ukum aleng kelalau bahat.”

Sin en ji debalo' uk

⁴¹ Melo' nah Iha' té' béh ngavan daha' melo' sin Tuhan, en Na' nyineng nah daha' metei sin halem. Té pah daha' aleng kaya' tih kahum lan pah en daha' tei lahuh.

⁴² Nei nah ji doh debalo' aleng humé', en na' tei nah dua' li'ap iha' tih aleng sin ji tua.

⁴³ En Na' duan nah dalo' anak sekulah Na', pelalau kuma' men dalo', “Dahuk lan men kelo', doh aleng debalo' aleng humé' anih uh metei ngahum lalau men'uh daha' lim aleng metei ligit alem ngavan sin Tuhan.

⁴⁴ Daha' aleng kaya' atih kahum kah en daha' tei bi huwin na tua atih, bi doh atih uh ma'uk ketu-ketu aleng hengan na',” ken Na'.