MARKUS 11 - SURAT TUHAN Dahun Kayan 1990

Tuhan Yesus tei ha' daléh Yerusalem

¹ Tegu daha' atih jeleng té' béh Yerusalem, jeleng dahin Betfage dahin Betania ha' ngalang Zaitun, Yesus nyihu dua' anak sekulah Na',

² ken Na' men dawa', “Tei nah kua' ha' uma aleng ha' unan kua'. Tana' kua' ateng hinan iha' nah kua' seng pesuk ji keledei tenak aleng uh daha' nyatoh aleng em payan kelunan pakei. En kua' uvan nah hatoh na', geri iha' hinih.

³ Tana' té' kelunan kuma' men kua', ‘Na' nun kua' na nunan nan?’ sayu kua' kuma' men iha', ‘Avin Tuhan ngenep iha', Iha' pah pelalau menei iha' uli,’ ken kua' si',” ken Yesus.

⁴ Lun tei nah dawa anan dih, pesuk nah dawa' ji keledei tenak daha' nyatoh té' béh ketamen, bah hawang té' béh alan, pelalau dawa' muvan hatoh na'.

⁵ Té' kelunan aleng nekring titih kuma' men dawa', “Na' nun kua' makau keledei tenak anan?” ken dalo'.

⁶ Dawa' pah nyu'ei dalo', bara dahun Yesus dih, pelalau dalo' mun dawa' kelunan atih tei.

⁷ En dawa' geri nah keledei tenak atih pala Yesus, pelalau mekah kanan dawa' hujung keledei atih, pelalau Iha' melo' té' hujung na'.

⁸ Kahum daha' mekah kanan daha' té' alan, té' pah aleng ha' béh patah-patah da'an kayo' aleng en daha' ala men luma'.

⁹ Daha' aleng panau una' dahin daha' aleng baya pah, medéng-medéng nah daha', ken daha', “Hosana! Meju lelan nah Iha' aleng nei alem aran Tuhan.

¹⁰ Meju lelan keligem sepun tam Daud aleng nei anih! Hosana alem ngavan aleng kelalau bau!” ken daha'.

¹¹ Tei nah Iha' ateng ha' Yerusalem, pelalau tei halem Uma Allah dahin ngeje'au nyineng ket lim-lim. Avin dau hu'uh seng lidem, leka' nah Iha' la'an tei ha' Betania, dalo' pulu-dua' pah té' dahin Na'.

Bua ara tulan té' dahun Tuhan Yesus. Iha' muga daha' aleng pebelé alem Uma Allah

¹² Dau malah ji la'an, alem dalo' panau men Betania, la'o nah Iha'.

¹³ En Na' nyineng men su té' ji iung bua ara aleng kapan lan ujung na'. Tei nah Iha' nyineng, jukdau té' nun-nun seng en Na' ala té' iha'. Tegu Iha' ateng tinan, ji-ji pah em té' bua pesuk Na', ito' tua, avin nusi' payan jaka' ha' ngebua'.

¹⁴ Ken Yesus men iha', “Meng nah ji kelunan kuman nun-nun men ika' ateng-ateng baya.” Kitan dalo' anak sekulah Na' nah Iha' na daho' atih.

¹⁵ Ateng nah dalo' ha' Yerusalem. Yesus pah tei alem Uma Allah, pelalau muga daha' aleng pebelé' alem Uma Allah atih, dahin mayah mija' daha' aleng ngalui ligit dahin ladung daha' aleng pebelé' manuk sepukun.

¹⁶ Iha' en mun ji-ji kelunan pah geri ket nun-nun tei halem seng lebau Uma Allah.

¹⁷ Pelalau Iha' katuk, ken Na' men daha', “Nusi' ha' té' kalung iah, ‘Uma Kui seng en daha' kuma' uma ngavan sebayang men lim ha'ut na'an kelunan'? Bi ikam anih uh na na' luvang kelunan nakau,” ken Na'.

¹⁸ Kelenghen daha' imam aya' dahin daha' aleng puboh surat Tuhan daho' atih, pelalau daha' ilau alan seng ngenep lematei Iha'. Daha' takut Iha', avin lim-lim kelunan ngeniheng té' katuk Na'.

¹⁹ Levi nah dau tei nah Iha' musang men daléh atih.

²⁰ Dau malah alem dalo' panau, dalo' nyineng bua ara atih uh kelubei nah men pakat na'.

²¹ Nei nah kenep Petrus, pelalau kuma' men Iha', “U Guru, nyineng Im, iung bua ara aleng tulah té' Dahum arei dih uh kelubei nah.”

²² Nyu'ei nah nah Yesus, kuma' men dalo', “Nginah nah té' Allah.

²³ Dahuk lan men kelo', hi-hi aleng kuma' men ngalang anih, ‘Tei nah im, nesau halem banget,’ nusi' pah kenep na' nei duhei, bi iha' nginah dahun na' seng lan, adang iha' seng ala.

²⁴ Avin ha' nunan, Akui kuma' men kelo', ket nun aleng en kelo' ilau lelan dahin akei, nginah nah kelo' uh ala na', adang kelo' ala.

²⁵ “Tegu kelo' nekring sebayang, tana' té' nun-nun ji'ek kenep ka' té' ji-ji kelunan kah, sayu im masi iha' marung sala na' atih, ja Taman kelo' aleng ha' Surga pah masi kelo' marung sala kelo' lahuh.

²⁶ Iha' kelo' em masi, nusi' nah Taman kelo' ha' Surga masi kelo' marung sala kelo' lahuh.”

Pepteng marung tingan Tuhan Yesus

²⁷ Nei nah dalo' nekulah ha' Yerusalem. Alem Yesus panau-panau té' alem Uma Allah, nei nah daha' imam aya' dahin daha' aleng puboh surat Tuhan dahin daha' kelunan aya' pala Iha',

²⁸ ken daha' men Iha', “Kenan sihu ano' kah Ika' na lim hadui anih? Hi aleng nyihu Ika' na hadui anih?”

²⁹ Pelalau Yesus nyu'ei daha', “Akui pah seng meteng té' kelo'. En kelo' nyu'ei nah Akui, iha' nah Akui bara men kelo' té' sihu aleng Ngavak na hadui anih.

³⁰ Duh Yohanes atih, men ino' pa'un na', men Surga iah, men kelunan iah? Nyu'ei nah Akui,” ken Na'.

³¹ Petengaran nah daha' atih pedeng daha' dep, ken daha', “Awi itam kuma', ‘Men Surga,’ adeng Iha' seng kuma', ‘Iha' nunan, na' nun ikam em nginah té' iha'?’

³² Awi itam pah kuma', ‘Men kelunan,’ ken tam ké', bi takut pah itam té' daha' kahum,” avin lim-lim daha' kuma' Yohanes atih ji nabi.

³³ Iha' nah daha' nyu'ei Yesus, ken daha', “Nusi' kamé' jam.” Ken Yesus men daha' la'an, “Nusi' pah Akui bara men ikam té' sihu aleng Ngavak na hadui anih” ken Na'.