LUKAS 6 - SURAT TUHAN Dahun Kayan 1990

Dalo' ngu'en beluha' jelei pasé' té' Dau Kelarah

¹ Té' ji Dau Kelarah Yesus panau lalau luma' jelei pasé', anak sekulah Na' pah ngu'en beluha' jelei dahin masé' na' té' usu dalo' dahin kuman na'.

² Bi balei men daha' Farisi kuma', “Nun tavit na' kelo' na ket aleng em tekep tegu Dau Kelarah?”

³ Nyu'ei nah Yesus dahin kuma' men daha' atih, “Nusi' kah payan ikam basa' marung tuk hadui Daud iah, tegu iha' la'o, iha' dahin dalo' aleng dahin na' lahuh,

⁴ tegu iha' tei alem Uma Allah dahin ala dahin kuman luti aleng en daha' atah atih, aleng em tekep daha' kani, bi imam dep kah aleng deng kuman na' di? Bi iha' kani na' dahin ma'uk na' men daha' aleng dahin na' lahuh.”

⁵ Ken Yesus la'an men daha' atih, “Anak-kelunan Iha' nah Tuhan hujung Dau Kelarah lahuh.”

Iha' petagéh laké' aleng matei usu na

⁶ Té' ji hangun, tegu Dau Kelarah loh kah, tei nah Yesus alem uma sebayang pelalau pekatuk daha'. Hinan té' nah ji laké' aleng matei uhat usu na' pedah ta'o.

⁷ Kelunan aleng puboh surat Tuhan dahin kelunan Farisi pah nyiring Iha' bahi Iha' petagéh kelunan atih té' Dau Kelarah, ja daha' deng pesala Iha'.

⁸ Bi kitan Na' alem kenep daha' atih, pelalau Iha' kuma' men laké' aleng matei uhat usu atih, “Peju nah im nekring té' hang daha'.” Peju nah iha' nekring té' hang daha'.

⁹ Ken Yesus men daha' atih, “Akui ngenep meteng ikam, Tekep kah tegu Dau Kelarah na sayu iah, na ji'ek iah? Tekep pekurip hengan kelunan iah, nasa' na' iah?”

¹⁰ Pelalau Iha' nyineng teliling daha' atih, dahin kuma' men laké' atih, “Jei nah usu ka'.” En na' jei nah usu na', pelalau sayu nah usu na'.

¹¹ Busek lan nah kenep daha' atih dahin pepteng pedeng daha', nun aleng tekep en daha' na té' Yesus.

Tuhan Yesus mili pulu-dua' anak sekulah Na'

¹² Tegu atih lahuh musang nah Yesus tei ha' ji ngalang, ngenep sebayang. Pahmalem anan Iha' sebayang té' Allah.

¹³ Tegu dau uh malah en Na' uvui nah anak sekulah Na', en Na' mili nah té' hang daha' atih pulu-dua' la'ung, aleng en Na' na aran dalo' sihu Na' lahuh,

¹⁴ iha' tih Simon, en Na' na aran na' Petrus, dawa' Andreas harin na', dahin Yakobus dawa' Yohanes harin na', dahin Filipus dahin Bartolomeus,

¹⁵ Matius dahin Tomas, dahin Yakobus anak Alfeus, dahin ji Simon pah la'an en daha' na aran na' Zelot,

¹⁶ dahin Yudas anak Yakobus, dahin Yudas Iskariot aleng nebau ma'uk Tuhan Yesus.

Katuk Tuhan Yesus ha' ngalang

¹⁷ Ngiléh nah Yesus dahin dalo' atih, nekring nah Iha' té' ji tana kasut, té' pah kuri-kuri kahum daha' anak sekulah Na', dahin kahum pah kelunan nei men tana Yudea dahin men Yerusalem dahin men benghé' banget jeleng Tirus dahin Sidon aleng ngenep kelenghi dahun Na' dahin akei Iha' petagéh kelunan men perah daha'.

¹⁸ En Na' petagéh pah kelunan aleng té' to' nilung alem daha' lahuh.

¹⁹ Lim kelunan aleng kahum pah ngenep seng gem Iha', avin té' tingan musang men Iha', aleng ngavan daha' lim nei magéh.

Sayu dahin tusah

²⁰ En Na' nyineng nah dalo' anak sekulah Na', ken Na', “Sayu lan nah men kelo' kelunan aleng humé', avin kelo' nah aleng hipun keligem Allah.

²¹ “Sayu lan nah men kelo' aleng la'o kerei inih avin kelo' nah aleng seng besoh. “Sayu lan nah men kelo' aleng nangih kerei inih, avin kelo' seng kesing.

²² “Sayu lan nah men kelo' tegu kelunan heléh té' kelo', dahin mukéh kelo' men hang daha', dahin pesala dahin peji'ek aran kelo' kuma' kelo' ji'ek, avin tavit Anak-kelunan.

²³ Sayu nah kelo' melu dahin pekelu'an té' dau atih, avin aleng lan na' dekaya' nah tibah kelo' ha' Surga, avin nunan pah lahuh sepun daha' menuna' na té' daha' nabi.

²⁴ “Bi asi-asi nah kelo' aleng kaya', avin kelo' uh ala lim besoh kelo'.

²⁵ “Asi-asi nah kelo' u kelunan aleng besoh kerei inih, avin kelo' nah aleng seng la'o. “Asi-asi nah kelo' aleng kesing kerei inih, avin kelo' nah aleng seng katé' kenep dahin nangih.

²⁶ “Asi-asi nah kelo' tegu kelo' en lim kelunan hek, nunan pah sepun daha' menuna' mahek daha' nabi amoh.

Nyalam bunu kelo'

²⁷ “Bi Akui kuma' men kelo' aleng kelenghi Dahuk anih: “En kelo' nyalam nah bunu kelo', dahin na sayu men kelunan aleng heléh té' kelo',

²⁸ dahin akei nah sayu nei té' kelunan aleng nulah kelo', dahin sebayang men kelunan aleng peketuréh na kelo'.

²⁹ Men kelunan aleng nebip pingah ka', in uk nah pingah ka' pedah ji pah lahuh. Men kelunan aleng ala basung aru ka', meng nah im ma'eng basung ba'ik ka' lahuh.

³⁰ Uk nah men ha'ut la'ung aleng akei té' ika', dahin kelunan aleng ala ketanum, meng akei na' uli.

³¹ Awi jam tuk hadui aleng kenep kelo' kelunan na men kelo', nunan pah lahuh kelo' na men daha'.

³² “Awi kelo' nyalam kelunan aleng nyalam kelo', nun kah tibah na'? Avin kelunan aleng sala pah nyalam kelunan aleng nyalam té' daha'.

³³ Awi kelo' na sayu men kelunan aleng na sayu men kelo', nun kah tibah na' lahuh men kelo'? Avin kelunan aleng sala pah na nutih lahuh.

³⁴ Awi kelo' ma'uk tuyu men kelunan, dahin nginah seng ala na' uli la'an, nun kah tibah na' men kelo'? Avin kelunan aleng sala tih pah ma'uk tuyu men kelunan dahin nginah seng ala awi kahum na' atih lahuh.

³⁵ Bi sayu nah kelo' nyalam té' bunu kelo' dahin na sayu dahin ma'uk tuyu dahin em mekilau seng ala na' uli nekulah, nurei tibah kelo' seng dekaya', kelo' pah seng jadi' anak Allah aleng Kelalau Bau, avin Iha' masi kelunan aleng em bara sayu kenep dahin aleng ji'ek lahuh.

³⁶ Sayu nah kelo' masi awi jam tuk Taman tam masi.

Meng ngema' kelunan

³⁷ “Meng kelo' ngema' kelunan, nurei kelo' seng em ga' kema' lahuh. Meng kelo' pesala kelunan, nurei kelo' pah seng em ga' sala. Masi daha' marung sala daha', nurei kelo' pah ala asi.

³⁸ “Uk nah, adang kelo' seng té' ket en daha' uk, ji tebeng aleng teneng aleng seng en daha' nedah dahin megoh-megoh ateng iha' nyungei, seng en daha' uk men kelo'. Avin awi tebeng aleng kelo' uk, nunan pah tebeng en daha' uk men kelo' la'an.”

³⁹ Iha' na ji ivun men dalo', ken Na', “Seng deng kelunan buta' mayak kelunan buta' du? Seng nusi' dawa' lim legak alem luvang iah?

⁴⁰ Nusi' anak sekulah lalau té' guru na', bi ha'ut-ha'ut anak sekulah aleng hu'uh lebau té' pekalei atih seng piah awi guru na'.

⁴¹ “Na' nun ika' nyineng pelem aleng té' alem matan harim, bi berit kayo' aleng alem matam dep nusi' nah ika' pelemana' na'.

⁴² Nuno' nah ika' deng kuma' men harim, ‘U harik, bei nah akui muéh pelem atih men alem matam,’ bi ika' em jam berit aleng té' alem matam. U ika' aleng dua' jela', usang nah una' berit aleng alem matam dep, men'uh anan uréh im nyineng teneng mebet pelem men alem matan harim atih.

Kayo' en tam nelana' men bua na'

⁴³ “Avin nusi' iung kayo' aleng sayu ngebua bua aleng ji'ek, iung kayo' aleng ji'ek pah nusi' ha' ngebua bua aleng sayu.

⁴⁴ Avin ha'ut-ha'ut iung kayo' en tam nelana' men bua na'. Avin men uleng nusi' kelunan ala bua na' bua ara, dahin men uket uleng lahuh nusi' nah daha' ala bua agun.

⁴⁵ Kelunan aleng sayu musang ket aleng sayu men alem daven na' aleng sayu aleng alem kenep na', dahin kelunan aleng ji'ek musang ket ket aleng ji'ek men daven na' aleng ji'ek aleng alem kenep na', avin ket aleng uh penu alem kenep atih seng nyungei men ba na'.

Uma té' ujung bato'

⁴⁶ “Avin nun ikam duan Akui ‘Tuhan, Tuhan,’ beka' nusi' ikam na ket aleng hu'ek?

⁴⁷ Akui ngenep bara men ikam ji katah marung kelunan aleng nei ha' Akui dahin kelenghi Dahuk dahin ngioh na'.

⁴⁸ Iha' awi jam tuk ji kelunan aleng negreng ji uma, dahin ngalé' na' dalem, dahin metei na' té' avan aleng bato'. Tegu siho' tei lempa meté' uma atih, nusi' nah iha' nei pahnoh, avin hadui na' atih atek tageng lan.

⁴⁹ Bi kelunan aleng kelenghi dahin em ngioh, iha' nah awi jam tuk ji kelunan aleng negreng uma na' té' ujung tana aleng em na tageng avan na', siho' pah meté' uma atih, pelalau ha' puva, dekaya' nah tasa' uma atih.”