LUKAS 4 - SURAT TUHAN Dahun Kayan 1990

Iha' en Iblis pesek

¹ Tegu Yesus uli men Yordan, penu nah Iha' té' Belua' Ma'ang, Belua' anan pah geri Iha' ha' tana ngahit pat-pulu dau dara na'. Hinan nah Iblis pesek Iha'.

² Dara-dara anan ji nun-nun pah em té' ket en Na' kani. Uh pat-pulu dau anan la'o nah Iha'.

³ Lun ken Iblis men Iha', “Tana' Ika' Anak Allah lan, nyihu nah bato' anih balui luti.”

⁴ Bi Yesus kuma' men iha', “Té' kah uh kalung, ‘Nusi' ha' kenan luti tua kelunan seng murip,’ ” ken Na'.

⁵ Men'uh atih, en Iblis geri nah Iha' hujung ji ujet bau, pelalau alem ji kejep mata' iha' bara Iha' lim-lim keligem ha' usun tana.

⁶ Ken Iblis men Iha', “Ika' aleng seng ek uk lim tingan anih dahin aren na', avin lim anan uh té' alem usu kui, dahin hi-hi aleng kenep kui seng ek uk, adang kui ma'uk na'.

⁷ Avin anan, iha' Ika' nyepukun sebayang ha' unan kui, lim anan pah Ika' seng hipun na' lim-lim.”

⁸ Nyu'ei nah Yesus dahin kuma' men iha', “Té' kah uh kalung, ‘Sayu nah im nyepukun ngelu'ep sebayang ha' unan Allah Tuhan ka' dahin nyepida té' Iha' telesen,’ ” ken Na'.

⁹ Men'uh atih la'an, en Iblis atih geri pah Iha' ha' Yerusalem, pelalau metei Iha' hujung mubung Uma Allah, dahin kuma' men Iha', “Tana' Ika' Anak Allah lan, sayu nah Im nesau men inih tei hida,

¹⁰ avin té' kah uh kalung, ‘Iha' seng nyihu meliket Na' jaga ika', ja daha' petuboh ika',’

¹¹ Té' pah, ‘Daha' seng nyidah usu daha' dahin meju ika', bahi kudek ka' netung té' bato'.’ ”

¹² Nyu'ei nah Yesus dahin kuma' men iha', “Té' kah daho', ‘Meng nah im pekayuh pesek Tuhan Allah ka',’ ” ken Na'.

¹³ Tegu Iblis uh pekpah ha'ut na'an pesek, leka' nah iha' men béh Yesus tegu anan.

Hadui Tuhan Yesus ha' Nazaret

¹⁴ Men'uh anan Yesus tei uli ha' Galilea alem tingan Belua', pelalau putat nah dengah Na' ha' lim-lim daléh anan.

¹⁵ En Na' pekatuk nah daha' alem lim uma sebayang daha', daha' lim pah meju Iha'.

Yesus en daha' uau ha' Nazaret

¹⁶ Tei nah Iha' ha' daléh Nazaret, ngavan Na' men alem Iha' kahang. Dau Kelarah tei nah Iha' halem uma sebayang, awi alei Na' pa'en, pelalau biti nah Iha' seng basa' surat Tuhan.

¹⁷ En daha' jei nah surat nabi Yesaya men Iha', pelalau Iha' muah na' ha' ngavan aleng uh kalung,

¹⁸ “Beluan Tuhan té' hujung Kui, avin Iha' uh ngenyu Akui ja Akui pedengah dengah aleng sayu men kelunan aleng humé'. Iha' nyihu Akui bara alan avan daha' aleng salut tei takau, dahin meting matan daha' aleng buta', dahin makau daha' aleng bemah,

¹⁹ dahin pedengah duman ngavan Tuhan ma'uk asi Na' uh nei ateng.”

²⁰ Pelalau en Na' lulun nah buhup anan, en Na' uk uli men laké' aleng puboh na', pelalau melo' nah Iha'. Lim daha', alem uma sebayang atih ngehaneng nyineng Iha'.

²¹ Pelalau Iha' bara men daha', “Men dau anih huang surat Tuhan aleng kam kelenghi anih uh la'ung.”

²² Lim-lim daha' pah menglan jam dahun Na', dahin ngeniheng kelenghi daho' aleng sayu lelan aleng musang men ba Na'. Ken daha', “Bi anih nah anak Yusuf dih keta'?”

²³ Iha' nah Yesus kuma', “Adang nunih kah dahun kam men Akui na daho' pivun, ‘U duktun, Im petagéh nah batung Ka' dep. Ket aleng uh Im na ha' Kapernaum arei dih, Im na nah ha' Ngavam hinih lahuh,’ ken kam kah.”

²⁴ Iha' Ha' kuma' la'an, “Dahuk lan men ikam, ji-ji la'ung nabi pah em té' aleng uh en daha' ju té' alem daléh na' dep.

²⁵ Bi Akui kuma' men ikam, aleng lan na'. Alem urip Elia té' kahum debalo' té' hang daha' Israel tegu taga' aya' telo' duman nem bulan dara na' arei di, aleng na kelunan daléh anih katé' matei na té' lien daha' dih.

²⁶ Bi nusi' Tuhan nyihu Elia tei pala kelunan ha' béh, té pah Iha' nyihu iha' tei pala ji doh aleng debalo' ha' Saripta alem daléh Sidun.

²⁷ Men alem urip nabi Elisa pah té' kahum kelunan aleng ga' perah malin té' hang kelunan Israel, bi ji la'ung pah men daha' atih iha' em petagéh, ketu na' nah Naaman kelunan Siria atih tua.”

²⁸ Lim kelunan atih pelalau bunget alem uma sebayang tegu daha' kelenghi daho' atih.

²⁹ Pelalau peju nah daha' muga Yesus dahin mebet Iha' men daléh, dahin geri Iha' té' behilak ngalang aleng ngavan uma-uma daléh atih, tinan nah daha' ngenep mesau Iha' hida.

³⁰ Bi uh lalau nah Iha' leka', nesak men hang daha' atih.

Tuhan Yesus ha' Kapernaum. Iha' petagéh ji la'ung aleng té' to' nilung

³¹ Uh anan Iha' ngiléh tei ha' Kapernaum, ji daléh ha' Galilea. Alem Iha' pekatuk daha' té' Dau Kelarah,

³² ngeniheng nah daha' atih té' katuk Na' atih, avin dahun Na' atih té' tingan.

³³ Té' pah ji la'ung alem uma sebayang atih aleng té' to' nilung, medéng nah iha' dahin mennyik dahun na',

³⁴ ken na', “Nuno' kah tuk kamé' seng piah kenep Ka' lo, u Yesus kelunan Nazaret? Ika nei seng ngenep nasa' kamé' anih iah? Akui jam Ika' anih, Ika' nah Iha' Aleng Ma'ang aleng nei men Allah.”

³⁵ Pelalau Yesus mano' iha', ken Na', “Tepaka', musang nah im men kelunan anih.” Tegu to' atih uh mayah kelunan atih té' hang kelunan kahum atih, pelalau musang nah to' atih men alem na', dahin em ngeprah iha'.

³⁶ Ngeniheng lelan nah daha' atih dahin petengaran pedeng daha', ken daha', “Bei-nei, melak ta' té' tingan dahun kelunan anih! Avin kenan tingan dahun Na' tua nah Iha' muga to' anih ateng daha' musang.”

³⁷ Putat nah dengah marung tuk Yesus atih alem lim-lim daléh daha' tih.

Tuhan Yesus petagéh hinan-divan Petrus dahin kuri-kuri kelunan ha' béh lahuh

³⁸ Peju nah Iha' tei musang men alem uma sebayang atih, pelalau tei alem uma Simon. Hinan-divan Simon pah ngelepéng tua avin iha' larem aya' lelan, pelalau daha' kahi Yesus masi iha'.

³⁹ Nekring nah Iha' té' béh na' pelalau duan larem atih, pelalau larem atih puéh kenan Na', pelalau peju nah iha' tegu atih dahin nyamah té' dalo' atih.

⁴⁰ Tegu dau tei herep, en daha' geri nah lim-lim kelunan aleng té' perah pala Yesus, na'an-na'an perah en daha' geri ha' Iha', en Na' tei nah usu Na' ujung ha'ut—ha'ut la'ung daha' atih, dahin petagéh daha'.

⁴¹ To' pah musang men kelunan atih, dahin medéng, ken daha', “Ika' anih nah Anak Allah.” Pelalau Yesus mano' to' atih dahin em mun daha' duan, avin daha' jam Iha' Kristus.

⁴² Dau malah ji musang nah Iha' men inan tei ha' ji ngavan aleng henung, kelunan kahum atih pah ilau Iha', pelalau daha' atih tei ateng ha' Iha' ngenep ma'eng Iha', ja meng Iha' leka' men béh daha'.

⁴³ Bi ken Na' men daha', “Adang men daha' daléh ha' béh lahuh Akui seng pedengah dengah sayu marung tuk keligem Allah, avin atih nah tavit na' Akui en Na' nyihu nih.”

⁴⁴ Iha' nah Iha' pedengah dengah sayu alem lim-lim uma sebayang ha' Galilea.