LUKAS 3 - SURAT TUHAN Dahun Kayan 1990

Hadui Yohanes aleng Meduh. Teksi' na' marung tuk Tuhan Yesus

¹ Té' kepulu-lima' duman té' alem Kaisar Tiberius jadi' laja', tegu anan Pontius Pilatus pah aleng gabnur daléh Yudea, Herodes pah aleng gem alem daléh Galilea, Filipus harin Herodes pah aleng gem daléh Iturea, Trakhonitis dawa' Lisanias pah aleng gem daléh Abilene.

² Tegu anan Hanas dawa' Kayafas aleng imam aya'. Lun nei nah dahun Allah men Yohanes ha' tana ngahit tih, Yohanes anan anak Zakharia.

³ Lun ateng nah Yohanes tih alem lim-lim daléh aleng sepipah hungei Yordan tih, iha' ha' medéng, “Pekuli nah kenep kam dahin duh nah ikam, Allah pah seng mebet sala kam,”

⁴ awi aleng uh kalung alem surat nabi Yesaya, aleng nunih dahun na', “Té' dahun kelunan aleng medéng ha' tana ngahit: Nemei nah alan Tuhan, dahin nutau nah avan Na' panau.

⁵ Ha'ut-ha'ut abek seng nei ngesin, dahin ha'ut-ha'ut ngalang dahin kela'ung pah seng ngedatah piah, aleng kawi pah seng nei tutau, dahin aleng ngela'ung-ngela'ung en Na' na piah,

⁶ lim kelunan pah seng nyineng urip aleng nei men Allah.”

⁷ Ken Yohanes men daha' kelunan kahum aleng tei ngenep duh té' iha' atih, “U pahu nyipa', hi kah aleng nyihu ikam lap men unget Allah aleng seng ateng?

⁸ Usang nah bua barik kam aleng bara ikam uh ngelisah kenep, dahin meng kam seng kuma' té' alem kenep kam, ‘Abraham iha' nah taman tam,’ avin akui kuma' men ikam, Allah aleng té' tingan aleng haman na bato' anih jadi' anak Abraham.

⁹ Bi kerei inih pah hu'uh té' nah kapek hu'uh en Na' lo' té' pa'un kayo', ha'ut-ha'ut pa'un kayo' aleng em ngebua aleng sayu atih nah seng en teveng en sau alem apui.”

¹⁰ Kelunan kahum atih pah meteng iha' dahin kuma', “Tana' ha' nunan, nun kah aleng tekep en amé' na sika?”

¹¹ Iha' ha' nyu'ei dahin kuma' men daha' atih, “Kelunan aleng hipun dua' basung, sayu nah iha' ma'uk ji men kelunan aleng em té', dahin kelunan aleng hipun kuman, sayu nah iha' na awi nunan dih lahuh.”

¹² Alem anan pah lahuh nei nah daha' aleng mepeng sukei, akei duh, dahin kuma' men iha', “U Guru, nun aleng tekep en amé' na?”

¹³ Ken na' men daha' atih, “Meng kam akei huwi men'uh aleng kurin pelitah men ikam.”

¹⁴ Lun nei pah kuri-kuri seladu la'an meteng iha', ken daha', “Nun kah aleng tekep en amé' na?” Ken na' men daha' atih, “Meng nah ikam tenup nyilé' ketanun kelunan dahin meng kam petkuh kelunan em tuman-tuman, ji pah la'an sayu nah ikam sayu kenep dahin gaji' kam.”

¹⁵ Alem daha' kahum atih penga dahin lim daha' pelemana' alem kenep daha' marung Yohanes bahi iha' Kristus,

¹⁶ nyu'ei nah Yohanes dahin kuma' men daha', “Akui anih meduh ikam té' ata', bi té' nah Ji aleng seng ateng, Iha' aleng kelalau dekaya' men'uh akui, muvan talé' kasut Na' pah akui em tekep. Iha' seng meduh ikam té' Belua' Ma'ang dahin apui.

¹⁷ Tapan ngavan Na' tap uh té' alem usu Na', Iha' seng ngem'ang lim ngavan Na' ngilik, seng mepeng parei Na' dahin metei na' alem lepau, bi upéh na' seng ne Na' pahun alem apui aleng em deng tei parem.”

¹⁸ Kahum na'an alan-alan dahun Yohanes katuk daha' alem iha' pedengah dengah sayu men daha' atih.

¹⁹ Bi Herodes, aleng gem hida laja' atih, aleng en Yohanes mano' tavit Herudias, hawan harin na' atih, té' pah avin lim hadui aleng ji'ek aleng en Herodes na,

²⁰ en na' mi'at pah lim hadui ji'ek atih metei Yohanes alem jin.

Marung tuk duh Tuhan Yesus

²¹ Bi tegu lim daha' atih uh duh, Yesus pah duh lahuh. Hu'uh Iha' duh, alem Iha' sebayang, langit pah nei pawang.

²² Belua' Ma'ang pah nei ngiléh té' ujung Na' pela'ung awi jam tuk ji manuk sepukun, nei nah ji daho' men langit aleng kuma', “Ika' anih nah Anak Kui aleng Ek nyalam. Té' Ika' pah Akui melu.”

Pahu Tuhan Yesus Kristus

²³ Tegu aring Yesus pekatuk, urip Na' kio'-kio' telo'-pulu duman. Daha' ngio' Iha' anak Yusuf aleng anak Eli,

²⁴ Eli anak Matat, Matat anak Lewi, Lewi aleng anak Malkhi, Malkhi aleng anak Yanai, Yanai aleng anak Yusuf,

²⁵ Yusuf aleng anak Matica, Matica aleng anak Amos, Amos aleng anak Nahum, Nahum aleng anak Hesli, Hesli aleng anak Nagai,

²⁶ Nagai aleng anak Maat, Maat aleng anak Matica, Matica aleng anak Simei, Simei aleng anak Yosekh, Yosekh aleng anak Yoda,

²⁷ Yoda aleng anak Yohanan, Yohanan aleng anak Resa, Resa aleng anak Jerubabel, Jerubabel aleng anak Sealtiel, Sealtiel aleng anak Neri,

²⁸ Neri aleng anak Malkhi, Malkhi aleng anak Adi, Adi aleng anak Kosam, Kosam aleng anak Elmadam, Elmadam aleng anak Er,

²⁹ Er aleng anak Yesua, Yesua aleng anak Eliezer, Eliezer aleng anak Yorim, Yorim aleng anak Matat, Matat aleng anak Lewi,

³⁰ Lewi aleng anak Simeon, Simeon aleng anak Yehuda, Yehuda aleng anak Yusuf, Yusuf aleng anak Yonam, Yonam aleng anak Elyakim,

³¹ Elyakim aleng anak Melea, Melea aleng anak Mina, Mina aleng anak Matata, Matata aleng anak Natan, Natan aleng anak Daud,

³² Daud aleng anak Isai, Isai aleng anak Obed, Obed aleng anak Boas, Boas aleng anak Salmon, Salmon aleng anak Nahason,

³³ Nahason aleng anak Aminadab. Aminadab aleng anak Admin, Admin aleng anak Arni, Arni aleng anak Hezron, Hezron aleng anak Peres, Peres aleng anak Yehuda,

³⁴ Yehuda aleng anak Yakub, Yakub aleng anak Ishak, Ishak aleng anak Abraham, Abraham aleng anak Terah, Terah aleng anak Nahor,

³⁵ Nahor aleng anak Sarug, Sarug aleng anak Rehu, Rehu aleng anak Peleg, Peleg aleng anak Eber, Eber aleng anak Salmon,

³⁶ Salmon aleng anak Kenan, Kenan aleng anak Arpakhsad, Arpakhsad aleng anak Sem, Sem aleng anak Nuh, Nuh aleng anak Lamekh,

³⁷ Lamekh aleng anak Metusalah, Metusalah aleng anak Henokh, Henokh aleng anak Yaref, Yared aleng anak Mahalaleel, Mahalaleel aleng anak Kenan,

³⁸ Kenan aleng anak Enos, Enos aleng anak Set, Set aleng anak Adam, Adam aleng anak Allah.