IBRANI 1 - SURAT TUHAN Dahun Kayan 1990

Anak Allah aleng Kelalau Bau

¹ Kuri-kuri hangun dahin kuri na'an alan Allah nebara daha' sepun tam men ba daha' nabi alem urip menuna',

² bi alem dau aleng baya anih Iha' uh duan itam alem Anak Na' aleng uh Na' petneng hipun ket lim-lim, kenan Na' pah Iha' uh ngelengunan lim-lim ket nun-nun.

³ Iha' nah aleng Malah aren Allah, dahin atek katah Allah lan, Iha' pah gem lim-lim tuk té' dahun Na' aleng ningan. Tegu Iha' uh na ngavan tam nei ma'ang men lim sala', iha' nah Iha' melo' bah ta'o Allah aleng Kelalau Maren alem ngavan aleng bau,

⁴ nunan Iha' tula Iha' kelalau sayu men'uh lim meliket, ngioh awi Aran Na' aleng uh Na' ala atih uh kelalau sayu men'uh aran daha'.

Kristus lalau maren men'uh meliket

⁵ Avin men hiran dahin men meliket aleng ano' Allah uh kuma', “Ika' nah Anak Kui, dau anih nah Akui uh nganak Ika'”? dahin kuma' lahuh, “Akui nah aleng jadi' Taman Na', Iha' pah jadi' Anak Kui”?

⁶ Tegu Anak aleng una' atih en Na' geri té' alem usun tana anih Iha' kuma', “Sayu nah ketu-ketu meliket Allah nga'um sebayang ha' unan Na'.”

⁷ Marung daha' meliket atih, nunih dahun Na', “Iha' na lim meliket Na' awi dih, dahin lim sihu Na' kelat apui.”

⁸ Bi marung Anak atih, Iha' kuma', “Ladung aren Ka', u Allah, aleng té' pa'en-pa'en; dahin hekun barik tutau atih nah hekun keligem Ka'.

⁹ Ika' nyalam aleng teneng, dahin heléh té' aleng nyelalang, avin atih nah Allah, iha' tih Allah Ka', uh ngenyu Ika' té' kenyu lu lalau men'uh daha' bakéh Ka'.”

¹⁰ Nunih pah dahun na' lahuh, “U Tuhan, Ika' hu'uh ngelengunan usun tana anih, men menaring, dahin langit atih pah hadui usu Ka'.

¹¹ Lim na' atih seng tasa', bi Ika' nah aleng pa'en-pa'en, lim na' atih seng tei lumei awi basung,

¹² dahin awi keluma' Ika' seng lulun na', dahin awi ji basung lim na' atih seng pekalui. Bi Ika' pa'en em pebalui, dahin duman-duman Ka' nusi' té' ka'uh na'.”

¹³ Bi men hiran dahin men meliket aleng ano' pah Iha' kuma', “Melo' nah Im bah ta'o Kui, ateng Akui na lim bunu Ka' jadi' hamak kudek Ka'”?

¹⁴ Nusi' lim daha' atih belua' aleng masi-masi iah, aleng en Na' nyihu tei masi daha' aleng seng hipun urip atih ké?