ESTER 9 - SURAT TUHAN Dahun Kayan 1990

Daha' Yahudi pekalah daha' aleng bunu daha'

¹ Pulu-telo' dua' bulan pulu-dua', bulan Adar atih, jaka' anan nah jaka' daha' ngioh dahun laja' atih dih. Daha' bunu daha' Yahudi atih uh nginah lan seng pekalah daha' Yahudi, bi kenan dahun laja' aleng uh na' na ngelua' atih dih, dau anan pah pebalui jadi' jaka' daha' Yahudi seng pekalah bunu daha' nan.

² Tegu dau atih daha' Yahudi alem ha'ut daléh alem lim keligem laja' Ahasyweros nei pepeng seng meté' lim daha' hi-hi aleng na ji'ek té' daha'. Ji-ji la'ung pah em deng nyakat daha', avin lim-lim kelunan hino'-hino' uh takut lelan té' daha' Yahudi.

³ Daha' kelunan aya' dahin daha' gabnur dahin lim daha' aleng geri daléh atih pah masi daha' Yahudi avin daha' uh jiha' dahin takut té' Mordekhai atih dih.

⁴ Avin Mordekhai atih aleng uh dekaya' alem uma laja', aran na' pah uh putat alem lim-lim daléh, iha' pah sa'-sa' tei dekaya' alem hadui na'.

⁵ Daha' kelunan Yahudi atih pah pejoh na nun-nun tua té' daha' aleng bunu daha' atih, avin daha' heléh té' daha'. Daha' meté' miteng daha', lematei daha', dahin nasa' daha'.

⁶ Alem Susan dep, daléh aleng dekaya' atih, daha' Yahudi lematei lima' atuh la'ung daha' laké'.

⁷ Pulu la'ung dalo' aleng anak Haman aleng anak Hamedata aleng bunu daha' Yahudi atih dih pah en daha' Yahudi lematei lahuh. Aran dalo' atih Parsandata, Dalfon, Aspata,

⁸ Porata, Adalya, Aridata,

⁹ Parmasta, Arisai, Aridai dahin Waizata,

¹⁰ bi ji ketanun dalo' pah daha' Yahudi nan em ala.

¹¹ Dau anan pah daha' tei bara laja' kahum kelunan aleng uh en daha' lematei alem daléh Susan atih.

¹² Laja' pah bara Ester, “Alem daléh Susan dep kelunan Yahudi uh lematei lima' atuh la'ung laké' dahin dalo' pulu la'ung anak Haman lahuh. Nun la'an aleng en daha' na ha' daléh aleng ha' béh? Bara im men akui, nun aleng kenep ka' la'an? Akui seng mekoh na' tua.”

¹³ Ester pah nyu'ei, “Tana ha' sayu kurim, kelung nah kelunan Yahudi aleng alem Susan nih pejoh hadui daha' atih jima la'an, dahin nekayung patei dalo' pulu anak Haman atih té' jihé' ngavan ukum tekayung.”

¹⁴ Laja' atih pah mekoh daha' na nunan la'an, en laja' tei nah daho' la'an alem daléh Susan, dalo' pulu la'ung anak Haman dih pah en daha' tekayung.

¹⁵ Pepeng nah daha' pahu Yahudi aleng alem daléh Susan atih la'an té' pulu-pat dau bulan Adar atih, daha' pah lematei telo' atuh la'ung daha', bi ketanun daha', nusi' daha' pahu Yahudi kaséh ala na' peletu.

¹⁶ Té' pah kelunan Yahudi aleng alem daléh ha' béh lahuh pepeng mengan batung daha'. Daha' pah lematei tusu-pulu-lima' libu' la'ung daha' aleng ngenep na ji'ek atih, bi nusi' peletu daha' Yahudi kaséh ala ketanun daha' tavan.

¹⁷ Daha' pah na nunan té' pulu-telo' dau bulan Adar, té' pulu-pat dau bulan anan nah daha' na dau aya' dau ngavan daha' pekelu'an dahin na pahlung aya'.

¹⁸ Bi daha' Yahudi alem Susan pejoh loh tei kebiteng té' pulu-telo' dahin pulu-pat dau bulan anan, té' pulu-lima' dau bulan atih, iha' nah daha' ngeta', dau anan nah daha' pekelu'an dahin na pahlung aya'.

¹⁹ Iha' nah tavit daha' bengsa' Yahudi aleng murip alem daléh-daléh uk atih melo' té' pulu-pat dau bulan Adar atih, na dau ngavan daha' ngeta' men hadui daha' dahin na kelu'an dahin pahlung, tegu jaka' anan daha' pah pep'uk ket en daha' kani pedeng daha'.

Pahlung aya' té' Dau Purim

²⁰ En Mordekhai ngalung nah lim tukit atih, en na' kato' nah surat lahuh men lim kelunan Yahudi alem ha'ut-ha'ut daléh aleng ha' Persia nan, men daha' aleng jeleng nurei pah aleng su lahuh.

²¹ Iha' nyihu daha' puboh dau atih, iha' tih pulu-pat dahin pulu-lima' dau bulan Adar ha'ut-ha'ut duman, itung na dau aleng ngavan daha' hituk pa'en-pa'en té' ket aleng uh jadi' atih.

²² Avin dau dahin bulan anan dih kelunan Yahudi uh deng ala kenep dena' marung bunu daha', dau aleng avan daha' seng ga' katé' aya' arei dih uh balui dau ngavan daha' melu, dahin dau aleng seng jadi' dau tirau arei di uh balui dau daha' petenglu sayu. Iha' nyihu daha' na dau anan dau pahlung dahin pekelu'an, dahin pep'uk ket en daha' kani pedeng daha', dahin hituk té' daha' aleng humé' lahuh.

²³ Nunan nah kelunan Yahudi na pa'en, ngioh dahun Mordekhai aleng uh en na' ngalung atih.

²⁴ Avin Haman anak Hamedata kelunan pahu Agag atih men'a, aleng bunu lim daha' Yahudi, hu'uh mesau Pur, iha' tih na udi, seng lematei daha' pahu Yahudi kurin na'.

²⁵ Bi tegu Ester tei pala laja' Ahasyweros, laja' pah na surat nyihu daha' nekayung Haman dahin anak aké' na hulei sala na' aleng seng na' na té' daha' Yahudi atih di.

²⁶ Anan nah tavit aran na' dau atih dau Purim kurin daha', ngioh Pur atih. Avin anan nah, tavit na' surat en Mordekhai na, dahin tavit tuk-tuk aleng uh nei té' daha',

²⁷ daha' Yahudi petneng dua' dau atih itung na ji jaka' aleng en daha' tuboh pa'en ateng anak sau daha' dahin men hi-hi aleng tei ngioh adet daha' Yahudi, ngioh adet na' dahin ngioh jaka' na' alem ha'ut duman, awi dahun Mordekhai alem surat na' na anan.

²⁸ Tekep ha'ut-ha'ut amin alem ha'ut uma kelunan Yahudi dahin alem ha'ut-ha'ut daléh, ha'ut-ha'ut tebin daha' puboh dau anan pa'en-pa'en. Sayu daha' hituk pa'en té' dau Purim atih ateng-ateng sau daha' baya ateng hiran-hiran atih.

²⁹ Men'uh anan, en Ester aleng doh laja', aleng anak Abihail atih, dahin Mordekhai kelunan Yahudi, ngalung nah ji surat aleng nageng daho' marung tuk-tuk Purim atih awi aleng uh en Mordekhai ngalung una' atih dih.

³⁰ En dawa' kato' nah surat men lim-lim daha' pahu Yahudi alem matuh dua'-pulu-tusu daléh alem keligem laja' Ahasyweros atih, daho' atih daho' dena' dahin daho' aleng bara sayu kenep.

³¹ Nunan nah dawa' nyihu daha' hituk té' dau Purim atih, ngioh jaka' aleng uh en dawa' petneng, aleng uh en Mordekhai kelunan Yahudi dahin Ester doh laja' katuk daha' dahin sau-sau daha' marung dau pelien dahin dau daha' pasi lahuh.

³² Nunan nah dahun Ester petneng nageng adet Purim atih, uh anan en na' ngalung nah dahun na' alem buhup tebara.