ESTER 8 - SURAT TUHAN Dahun Kayan 1990

Laja' nyihu daha' Yahudi nyakat la'an

¹ Dau anan, en laja' Ahasyweros ih men Ester ketu ketanun Haman nan dih, iha' tih laké' aleng heléh té' kelunan Yahudi atih dih. En Ester bara nah laja' iha' harin higet Mordekhai, iha' nah laja' muvui Mordekhai nei ha' unan na'.

² En laja' ala pah selegem aran na' aleng uh na' ala uli la'an men usu Haman tih, en na' uk nah men Mordekhai. Ester pah meju Mordekhai, nyihu iha' gem lim-lim hadui alem uma matei Haman tih.

³ Men'uh anan Ester ngeluven tua nangih té' béh kudek laja' tih, meté' akei asi té' iha', ja iha' pekta' hadui ji'ek aleng uh en Haman kelunan Agag na arei dih, aleng ngavan daha' seng lematei lim-lim kelunan Yahudi dih.

⁴ En laja' jei nah hekun met na' pala Ester, iha' nah Ester nei biti dahin nekring ha' unan na'.

⁵ Pelalau ken Ester, “Awi ha' sayu kurim, amei laja', awi akui uh tei té' kenep ka', awi ha' teneng kurin kenep ka' lahuh, in na nah ji daho' la'an. Im ngalung nah surat, ja dahum alem surat anan lematei daho' aleng alem surat aleng en Haman anak Hamedata kelunan Agag atih na, surat aleng en na' na arei dih nyihu lematei lim-lim kamé' Yahudi alem lim-lim daléh alem keligem ka' nih.

⁶ Seng nuno' tuk kui deng kelung hadui aleng ji'ek aleng seng nei té' daha' bengsa' kui nih kurim du? Seng sayu kui nyineng tua té' daha' harik seng ga' tasa' nunan iah?”

⁷ Laja' Ahasyweros pah kuma' men Ester dawa' Mordekhai kelunan Yahudi atih, “Nyineng kua', akui uh mukum Haman té' jihé' tekayung aleng en na' na arei dih tavit hadui ji'ek na' aleng seng en na' na té' ikam Yahudi, nurei pah lahuh, akui uh ma'uk lim-lim ketanun na' men ika' Ester.

⁸ Marung ikam Yahudi nan, sayu kua' ngalung nun-nun aleng kenep kua' alem aran kui, dahin nada' na' té' selegem aran kui. Avin nun-nun daho' aleng uh kalung alem aran kui dahin aleng té' tada' selegem kui nusi' daha' deng masan na' la'an.”

⁹ En dawa' duan nah dalo' kerani-kerani laja', iha' tih té' dua'-pulu-telo' dau bulan telo', bulan Siwan atih. Mordekhai duan dalo', nyihu dalo' ngalung ji daho' maring ja surat atih tei ha' daha' pahu Yahudi dahin ha' lim daha' aleng geri daléh-daléh laja', dahin ha' daha' gabnur dahin ha' lim daha' aleng dekaya' alem lim matuh dua'-pulu-tusu daléh atih, iha' tih men India ateng ha' Etiopia. En dalo' ngalung nah surat atih alem ha'ut na'an kalung dahin alem ha'ut na'an dahun kelunan alem ha'ut-ha'ut daléh, nunan pah anun daha' Yahudi tih lahuh en dalo' ngalung alem dahun daha' dep.

¹⁰ Surat atih en dalo' ngalung alem aran Laja' Ahasyweros dahin metei tada' selegem na' té' iha' lahuh. Daha' pah petajen metei surat atih, nyihu daha' aleng panau té' guda' tei geri na', pakei guda' aleng salet panau aleng uh en laja' pekanak.

¹¹ Alem surat atih laja' nyihu daha' Yahudi aleng alem ha'ut daléh pepeng dahin pekurip batung daha' dep, dahin nyihu daha' nasa' dahin lematei bunu daha', daha' hi-hi tua aleng seng nei meté' daha'. Daha' laké', daha' doh nurei pah daha' nyam lahuh aleng men béh bunu daha' deng en daha' lematei tua, dahin nyilé' daven daha'.

¹² Hadui atih deng en daha' na petugung tua alem ji dau alem lim-lim daléh alem keligem laja' Ahasyweros, iha' tih té' pulu-telo' dau bulan Adar, bulan pulu-dua' anan.

¹³ Daho' aleng uh kalung atih jadi' ji udang en daha' mutat men lim kelunan alem ha'ut daléh dahin en pedengah men ha'ut na'an bengsa', ja kelunan Yahudi mengan té' dau anan seng nyulei lim-lim bunu daha' atih.

¹⁴ Daha' sihu-sihu aleng panau ujung guda' aleng tu'a atih aleng en daha' pakei alem hadui laja', petajen lelan nah daha' tei ngioh dahun laja'. Tebara atih pah putat alem daléh Susan daléh aya' atih lahuh.

¹⁵ Mordekhai pah tei musang men alem uma laja', kanan na' basung aleng nyemit awi langit dahin puti, té' pah balun sup tebin na' puti dahin nyemit mavoh lahuh, té' pah lavung met aleng dekaya' té' kahung na'. Lim daha' ha' daléh Susan medéng melu dahin ngelu'an lelan.

¹⁶ Lim daha' kelunan Yahudi nyi'an kenep dahin melu dahin ngelu'an dahin en daha' ju lahuh.

¹⁷ Alem ha'ut-ha'ut daléh dahin ha'ut-ha'ut uma alem daléh atih, hino'-hino' tua surat laja' atih tei putat, hitih nah kelunan Yahudi petenglu dahin pekelu'an lelan dahin na pahlung aya' dahin na dau aya'. Té' pah lahuh, kahum lan kelunan men ha'ut bengsa' ha' béh tei masuk dahin daha' kelunan Yahudi, avin daha' takut lan-lan té' daha' Yahudi atih.