ESTER 7 - SURAT TUHAN Dahun Kayan 1990

Haman en laja' lematei

¹ Lun tei nah laja' dawa' Haman pahlung dahin Ester.

² Kedua' dau na' atih, alem dalo' du'i, laja' pah meteng Ester la'an, “Kerei inih Ester, nun nah aleng kenep ka' di, im bara nah men akui tua, akui pah seng ma'uk na'. Ika' pah akei ji i'ang keligem kui nih, ju ek uk kah tua men ika',” ken laja'.

³ Lun ken Ester men iha', “Tana' kui ji'ek tei té' kenep ka' lan laja', tana ha' lan kenep ka' seng ma'uk ket nun-nun aleng ek akei té' ika', akui seng akei asi lan-lan anih té' ika' ja ika' masi akui dahin daha' aleng bengsa'-bengsa' kui lahuh, im pekurip nah kamé'.

⁴ Akui kuma' nuréh, avin daha' seng lematei akui dahin lematei lim-lim kamé' bengsa' kui nih lahuh. Awi daha' mebet kamé' tei dipen tua, laké' dahin doh lim pah, adang kui tepaka' tua. Bi lan pah kamé' anih tei pah matei na'a peletu ta' em deng petyah na' dahin lugi aleng seng nei té' laja'.

⁵ En laja' Ahasyweros teng nah Ester, ken na', “Hi aleng na hadui nunan du? Hino' kelunan anan té'?”

⁶ Ester pah nyu'ei, “Ji bunu amé! Ji kelatang amé' atih! Haman anih nah iha' aleng ji'ek atih!” Pelalau ngetiwet takut lan-lan nah Haman nan ha' unan dawa'.

⁷ Pelalau perah lelan nah kenep laja' anan, pelalau biti men ngavan na' melo' du'i ata' agun atih dahin tei musang ha' latan. Kitan Haman nah iha' seng ga' ukum tavit barik na' atih, lun melo' nah iha' akei asi lan-lan té' Ester, akei iha' pekurip iha'.

⁸ Tegu laja' nei men latan, nei huma la'an ha' ngavan dalo' du'i atih dih, beka' Haman nyepukun akei asi té' béh kelesi' avan Ester melo'. Iha' nah laja' kuma', “Iha' seng kejingan doh kui si' anih iah alem uma kui nih?” Uh daha' jam dahun laja' kuma' nunan, pelalau dalo' aleng masi iha' nabun neng Haman nan.

⁹ Té' nah ji la'ung men hang dalo' atih,iha' tih Harbona, ji aleng masi-masi laja' atih, ken na', “Jihé' bau ngavan ukum tekayung atih aleng en Haman nemei men Mordekhai, Mordekhai aleng pekurip ika' arei dih amei, té' loh kah jihé' atih té' béh uma Haman, aleng dua'-pulu-telo' meter bau na' atih.

¹⁰ Ken laja', “En tekayung nah iha' tinan tua.” Iha' nah daha' nekayung Haman té' jihé' tekayung anan dih, aleng uh en na' petmei men Mordekhai arei dih. Iha' nah unget laja' atih tei lu'au.