ESTER 6 - SURAT TUHAN Dahun Kayan 1990

Laja' meju Mordekhai

¹ Tegu malem anan, laja' anan pah em deng tudu, segut nah iha' nyihu duan dalo' sihu na' atih geri buhup lung-lung alem daléh atih dahin basa' na' men iha'.

² En dalo' basa' nah joh-joh na' lim, iha' nah dalo' basa' marung dahun Mordekhai nengaran marung dawa' dua' la'ung aleng pakat ngenep seng lematei laja', iha' tih Bigtan dawa' Teresy arei dih, dawa' kelunan atih aleng jaga ba ketamen kelahen uma laja'.

³ En laja' teng nah dalo' anan, “Nun tibah aleng uh en tam uk men Mordekhai nan, marung daho' anan dih?” Lun nyu'ei nah dalo' aleng sihu na', “Nusi' payan té' nun-nun ket en tam uk men iha' di,” ken dalo'.

⁴ Lun meteng nah laja', “Hi aleng ha' latan uma kui anih du?” Bi petgu té' pah Haman nei seng ngenep akei Mordekhai té' laja' ja lematei iha' té' jihé' aleng uh en na' na atih.

⁵ Dalo' sihu atih pah nyu'ei laja', “Haman aleng nei nekring hawa aréh pa.” “Nyihu nah iha' nei halem ké',” ken laja'.

⁶ Lun nei nah Haman halem, iha' nah laja' meteng iha', “Té' ji laké' aleng kenep kui lelan seng ek ju. Nun aleng seng ek na té' iha' lo?” ken laja'. Haman nan kio' iha' tua nah kelunan aleng kurin laja' atih.

⁷ Iha' nah Haman kuma' men laja' atih, “Men laké' aleng seng im ju anan,

⁸ sayu im ma'uk kanan aren ka' men iha' en na' té', dahin guda' aleng uh im pakei, dahin metei lavung aren té' kahung guda' nan lahuh.

⁹ Sayu nah im ma'uk kanan anan dahin guda' anan men ji kelunan aya' aleng pahu kelunan aya' pa'en. Kanan anan nah en na' tei té' kelunan aleng seng im ju anan na'a, dahin melo' iha' hujung guda' atih dahin mayak iha' tei panau-panau alem daléh nih, dahin medéng té' unan na', kuma', ‘Nunih nah tuk na' laja' na kelunan aleng en na' ju!’ ” ken Haman.

¹⁰ Lun ken laja' pah men Haman, “Tei nah im ajen ala basung dahin guda' awi kurim anan, petmei na' men Mordekhai laké' Yahudi atih aleng nyadui men akui ha' ba ketamen uma kui nih. Meng im melek nun-nun men lim hadui aleng uh in tira anan.”

¹¹ Tei nah Haman ala basung anan dahin guda', en na' nganan nah Mordekhai dahin geri iha' panau-panau alem daléh atih. Alem dawa' tei iha' pedengah iha', ken na', “Nunih nah tuk itam na kelunan aleng en laja' ju.”

¹² Men'uh anan Mordekhai pah tei uli ha' ba ketamen kelahen uma laja' atih. Haman pah petimah tua tei uli ha' uma na', katé' nah kenep na', en na' nabun nah kahung na' tua.

¹³ En na' bara nah doh na' Zeresy dahin lim dalo' bakéh na' marung lim tuk atih dih. Iha' nah dalo' aleng nyemugen atih dahin Zeresy doh na' lahuh kuma' men iha', “Iha' Mordekhai kelunan Yahudi anan, tehari ha' anan, ika' uh payah kenan na' nah anan, nusi' sebaya' la'an, adang ka' payah lan nah anan.”

¹⁴ Alem dalo' tengaran dahin na' loh, nei nah dalo' aleng sihu laja' atih najen duan Haman tei japa' pahlung aleng uh en Ester na atih.