ESTER 5 - SURAT TUHAN Dahun Kayan 1990

Ester mavéh laja' dahin Haman nei pahlung

¹ Ketlo' dau men'uh Ester pelien, en na' té' nah Kanan aren na' dahin tei nekring alem awa uma ngavan laja' Ahasyweros tih, nelunga' pala ladung aren na'. Laja' pah té' melo' halem, melo' ujung ladung aren na', nelunga' pala ba hawa.

² Tegu laja' nyineng Ester nekring hawang, iha' pah sayu lan kenep, pelalau en na' ju nah hekun met na' aleng en na' gem atih. Pelalau Ester tei halem dahin gem bulan hekun met na' atih.

³ “Ket nun kenep ka' Ester?” ken laja' meteng iha'. “Bara im men akui ket aleng kenep ka', akui pah seng mekoh na' tua. Ika' pah akei ji i'ang keligem kui nih, ek uk kah tua men ika'.”

⁴ Ester pah nyu'ei, “Awi ha' deng kurim, sayu kua' Haman nei ha' uma kui anih, avin té' kui na pahlung men ika',” ken na'.

⁵ Lun ken laja' nah, “En uvui nah Haman dih salet, kawa' tei si' japa' dahun Ester nih.” Lun tei nah laja' dawa' Haman nan pahlung, kuman dahin Ester.

⁶ Alem dalo' du'i ata' agun, en laja' teng nah Ester, “Bara nah aleng kenep ka' men akui ké Ester. Nun aleng kenep ka' nan, akui pah seng mekoh na' tua men ika'. Ika' pah akei ji i'ang keligem kui nih, ju ek uk kah tua men ika',” ken laja' men iha'.

⁷ Lun ken Ester nah men iha', “Anih nah aleng kenep kui ek akei té' ika'.

⁸ Tana' akui tei té' kenep ka' kurim, sayu im ma'uk ket aleng seng ek akei anih, akui ngenep akei kua' Haman nei pahlung jima la'an. Tegu anan kah akui bara ika' ket aleng kenep kui.”

Haman ngenep lematei Mordekhai

⁹ Dau anan, musang nah Haman dahin sayu lelan kenep na' dahin melu ju na', bi tegu iha' nyineng Mordekhai melo' té' ba kelahen uma laja', en na' nyineng nah ju Mordekhai em kaséh awi jamat iha', dahin em awi takut té' iha', perah lelan nah kenep Haman nan.

¹⁰ Bi iha' pa'eng kenep na' dahin lalau iha' tua tei uli. Lun en na' uvui nah dalo' bakéh na' tei ha' uma na' dahin nyihu hawan na' Zeresy tei dahin dalo' lahuh.

¹¹ Iha' pah ngelaham kaya' na', dahin ngelaham daha' anak-anak aké' na' dahin lim hadui laja' aleng uh kuri-kuri hangun uh meju iha' dekaya' alem hadui na', dahin na iha' dekaya' men'uh lim daha' aleng hida laja' atih.

¹² Lun kuma' pah iha' men dalo' lahuh, “No Ester em duan kelunan ha' béh, akui loh-loh kah aleng en na' duan tei dahin laja' pahlung, jima pah la'an tei loh kah kawa' laja',” ken na'.

¹³ “Bi lan poah iha' nunan nusi' loh kah akui sayu kenep alem kui nyineng Mordekhai laké' Yahudi atih melo' té' ba ketamen uma laja' nan.”

¹⁴ Doh na' dahin dalo' bakéh na' pah kuma' men iha', “Nyihu nah daha' na jihé' ukum tekayung dua'-pulu-telo' meter bau na' ngavan nekayung iha', jima im tengaran nah laja' nan, akei mukum Mordekhai té' ujung jihé' atih. Uh anan ké', tei nah im dahin sayu kenep pala pahlung anan.” Pega' lelan pah daho' atih kurin Haman. Iha' pah nyihu daha' tei na jihé' ukum tekayung aleng awi kurin dalo' men iha' atih.