ESTER 4 - SURAT TUHAN Dahun Kayan 1990

Mordekhai akei Ester masi daha' Yahudi

¹ Tegu Mordekhai uh jam lim tuk aleng hu'uh daha' na atih, iha' pah mirak-mirak basung na', dahin ngebasung balun lumuh, en na' usut avo', dahin tei panau-panau alem daléh atih meté' medéng-medéng nangih.

² Ateng ha' ba kelahen uma laja' atih tua nah iha' avin nusi' daha' deng tei halem iha' daha' meté' balun lumuh.

³ Té' ha'ut-ha'ut daléh hino'-hino' pah dahun laja' uh tei putat atih, hitih pah daha' lumuh dahin na adet pelien, dahin nangih petirau tua, kahum pah daha' aleng ngelubé' ujung balun lumuh aleng en daha' tei avo'.

⁴ Tegu dalo' aleng nyam alem amin Ester, dalo' doh dahin dalo' laké', tei bara iha' té' hadui Mordekhai, pelalau Ester kelalau ji'ek kenep. Petimah tua nah iha' metei basung men Mordekhai en na' té' kalui basung guni atih, bi nusi' loh kah Mordekhai kaséh meté' na'.

⁵ En Ester uvui nah Hatah, ji laké' sihu laja' aleng uh en laja' atih petneng masi Ester nan, pelalau nyihu iha' tei pala Mordekhai, ja ha' meteng iha' nun tavit na' iha' ji'ek lelan kenep na' nutih.

⁶ Hatah pah tei pala Mordekhai, ha' latan hawang ba kelahen uma laja'.

⁷ Mordekhai pah bara iha' lim-lim tuk aleng uh jadi' té' iha' atih, dahin ketu ligit aleng uh en Haman jaji seng na' uk men laké aleng gem sin laja', ja daha' lematei lim-lim daha' Yahudi.

⁸ Iha' pah ma'uk men iha' ji li'ap surat aleng uh putat halem daléh Susan, aleng bara dahun laja' nyihu daha' lematei lim daha' Yahudi arei dih. Mordekhai pah nyihu iha' tei bara na' men Ester, dahin nyihu Hatah nangen Ester ja iha' tei ha' unan laja' akei asi lan-lan té' laja' men daha' pahu na', daha' bengsa' Yahudi atih.

⁹ Hatah pah tei awi dahun Mordekhai atih.

¹⁰ En Ester nyihu nah Hatah tei bara Mordekhai la'an marung tuk-tuk na', ken na',

¹¹ “Hi-hi laké' dahin doh kah aleng tei ha' awa aleng halem iha' ha' em uvui laja', iha' seng en daha' lematei tua. Nunan nah daho' pa'en dih. Ha'ut-ha'ut la'ung men daha' aleng nyadui men laja' nih pah uh jam, lim-lim kelunan aleng ha' lirin-lirin daléh nah pah uh jam lahuh, nusi' peletu daha' deng mebet daho'-daho' atih. Em-em tuken laja' meju hekun met na' té' daha' nurei nah daha' em ga' ukum patei. Bi ji bulan nah anih nusi' payan laja' muvui akui,” ken Ester.

¹² Tegu Mordekhai kelenghi daho' aleng nei men Ester nutih,

¹³ iha' pah kato' daho' men Ester la'an, kuma', “Meng im ngio' ika' seng takau men'uh daha' Yahudi aleng ha' béh avin ika' uh melo' alem uma laja' nunan.

¹⁴ Lan pah ika' tepaka' tua nunan kurim tegu jaka' anih, adang té' kah asi nei men ha' béh té' pahu tam Yahudi nih, bi ika' seng matei, dahin dalo' huang amin tamam pah seng matei lahuh. Nun jam ta'? Mina tavit tuk anih nah ika' uh en ju alem keligem laja' anih.”

¹⁵ En Ester kato' nah daho' la'an men Mordekhai,

¹⁶ “Tei nah im mepeng lim daha' Yahudi aleng té' ale daléh Susan nih, pelien nah ikam dahin pelemana' nuno' tuk marung akui lahuh, meng kuman dahin meng du'i lahuh alem telo' dau telo' malem. Akui dahin daha' nyam kui pah pelien lahuh. Men'uh atih iha' nah akui tei pala laja', lan pah akui lalau tebara aleng uh en na' na atih. Awi laja' lematei akui avin kui tei tenup nutih, ju matei kah akui tua,” ken Ester.

¹⁷ Mordekhai pah leka' dahin ngioh lim dahun Ester atih.