ESTER 3 - SURAT TUHAN Dahun Kayan 1990

Haman ngenep nasa' pahu Yahudi

¹ Men'uh anan dih, en laja' Ahasyweros ju nah Haman anak Hamedata, pahu Agag atih, jadi' dekaya' men'uh lim daha' ha' béh aleng té' ida na'.

² Lim-lim daha' aleng hida laja' atih pah nyepukun tua té' Haman dahin meju iha', avin nunan nah dahun laja' marung iha'. Bi Mordekhai dep kah aleng em kaséh nyepukun té' Haman, dahin em meju iha'.

³ Dalo' aleng dekaya' hida laja' atih meteng Mordekhai, “Na' nun ika' em ngioh dahun laja' du?” ken dalo'.

⁴ Dalo' duan-duan iha' ha'ut dau, bi nusi' loh kah iha' kelenghi dahun dalo' atih. En dalo' bara nah barik Mordekhai atih men Haman, lun si' Haman kelung Mordekhai pejoh barik na' nutih pa'en, avin Mordekhai uh bara daha' iha' kelunan Yahudi.

⁵ Haman pah bunget lan-lan tegu iha' jam Mordekhai em kaséh nyepukun té' iha' dahin em meju iha'.

⁶ Bi Haman uh jam Mordekhai tih pahu daha' Yahudi, iha' nah iha' ngenep lematei Mordekhai, bi nusi' ha' ngenep lematei Mordekhai dep, bi iha' pelemana' seng lematei lim daha' pahu Yahudi lahuh alem lim-lim daléh aleng alem keligem laja' Ahasyweros atih.

⁷ Té' pulu-dua' duman laja' Ahasyweros uh jadi' laja', alem bulan ji té' duman anan, iha' tih bulan Nisan, Haman pah akei daha' mesau Pur, iha' tih na udi. Nunan nah daha' ilau dau dahin bulan aleng mega' ngavan na' na hadui na'. Iha' mega' bulan pulu-dua', iha' tih bulan Adar.

⁸ Lun kuma' nah Haman men laja' Ahasyweros, “Té' ji na'an bengsa' kitak, aleng uh putat té' hang daha' ha' béh alem ha'ut daléh alem keligem ka' nih, adet dep lelan daha' men'uh adet daha' aleng ha' béh. Daha' atih lahuh em kaséh ngioh tebara ka' alem daléh ka' anih lahuh. Em té' loh bang ka' kelung daha' atih murip dahim, amei.

⁹ Awi ha' mega' té' kenep ka', amei laja', sayu nah im na surat, nyihu daha' tei lematei daha' atih pah-pah. Awi ika' na na', adang akui pah deng nebangan telo' atuh tusu-pulu-lima' tan bahat pirek dahin metei na' ha daha' aleng gem ligit ka', ja daha' metei na' alem sin daléh ka', amei laja'.”

¹⁰ Laja' atih pah mebet selegem aran na' men usu na', dahin ma'uk na' men Haman, anak Hamedata kelunan Agag atih, aleng heléh té' daha' Yahudi atih.

¹¹ Ken laja' nah men iha', “Sin pirek atih, bei nah ika' em hipun na', dahin kelunan aleng kurim atih, no' pah kurim tua té' daha', im na nah ngioh aleng sayu aleng tei té' kenep ka'.”

¹² Té' pulu-telo' dau bulan ji, Haman pah muvui dalo' aleng nyadui kerani laja' atih. Dalo' atih ngalung surat lim daho' aleng hu'en Haman, dahin salin dahun na' alem ha'ut na'an kalung dahin ha'ut na'an dahun kelunan alem ha'ut daléh atih, dahin kato' na' men lim daha' aleng dekaya' aleng geri daléh dahin men lim gabnur dahin men lim daha' aleng maren alem ha'ut na'an bengsa'. Alem aran laja' Ahasyweros pah surat atih tei, dahin sep selegem met laja' atih dih té' té' surat atih lim.

¹³ Timah lelan nah daha' aleng tei hu'en laja' atih tei geri surat anan dih, metei na' ha' ha'ut-ha'ut uma alem lim daléh alem keligem na' atih. Surat atih nyihu daha' lematei lim-lim daha' Yahudi bulan pulu-dua', iha' atih bulan Adar, té' pulu-telo' dau bulan. Iha' nyihu daha' lematei daha' aleng muku, daha' aleng belua urip, daha' doh dahin daha' nyam lim, dahin nyilé' lim-lim ketanun daha' lahuh, té' alem ji dau anan.

¹⁴ Daho' aleng en daha' ngalung atih pah en daha' bara alem lim daléh alem keligem laja' ja lim-lim daha' jam mengan té' dau aleng en daha' petneng atih.

¹⁵ Petimah lelan nah daha' sihu tei mutat daho' atih tei ha' ha'ut-ha'ut daléh. Daha' bara daho' atih alem daléh Susan aleng hinan daléh atih. Laja' dawa' Haman nan, tebei-tebei melo' dawa' du'i, bi ngihau lelan nah kenep lim kelunan ha' daléh Susan atih.