ESTER 2 - SURAT TUHAN Dahun Kayan 1990

Ester jadi' hawan laja'

¹ Men'uh anan dih, lan pah unget laja' hu'uh lu'au, bi pa'en loh kah iha' pelemana'-pelemana' barik Wasti tih uh men'a, dahin ket aleng uh en na' na té' iha' lahuh.

² Iha' nah balei dalo' aleng bakéh laja' kuma' men iha', “Sayu nah im ilau kuri-kuri la'ung daha' nyemdoh, aleng kajau jam daha'.

³ Im nyihu dalo' sihu ka' alem ha'ut daléh alem keligem anih mepeng daha' nyemdoh aleng kajau nei ha' uma ngavan daha' doh melo' ha' Susan, daléh tam aleng dekaya' anih. Ju en Hegai tuboh kah daha', iha' kah bang iha' dekaya' tuboh uma ngavan daha' doh, ja iha' ma'uk men daha' kenyu bu sayu en daha' usut té' lah daha' ngavan daha' nei kajau.

⁴ Im ala nah doh aleng tei té' kenep ka' ja iha' im ju jadi' hawam kalui Wasti anan dih,” ken dalo'. Pega' lim-lim pah daho' atih té' kenep laja', iha' pah ngioh na' dahin na nutih.

⁵ Bi alem daléh Susan daléh aya' atih, té' nah ji la'ung bengsa' Yahudi, aran na' Mordekhai anak Yair, Yair anak Simei, Simei anak Kisy, kelunan men pahu Benyamin.

⁶ Mordekhai anih iha' ji la'ung aleng men Yerusalem aleng tei tugung Yekhonya laja' daha' Yehuda tegu Nebukadnezar geri daha' salut ha' daléh Babel dih.

⁷ Mordekhai pah hipun ji harin higet na', aran na' Hadasa, té' pah daha' na aran na' Ester lahuh. Mordekhai ala Ester amung, itung anak la'ung na' tua, avin hinan taman na' uh matei. Ester pah ji doh aleng sayu lan layan na'. Kajau jam neng na' lahuh.

⁸ Men'uh laja' mutat daho' aleng maring atih, daha' mepeng kuri-kuri nyemdoh ha' daléh Susan. Hegai pah aleng puboh daha' lim. Ester pah en daha' geri tei halem uma laja', en Hegai tuboh.

⁹ Ester pah sayu lelan jam na' kitan Hegai, iha' nah aleng tei té' kenep na'. Pelalau Hegai ma'uk kahum na'an-na'an kenyu bu sayu dahin kenyu en na' usut té' batung na', dahin nun-nun aleng sayu en daha' kani en na' uk men iha'. Iha' ma'uk tilung aleng sayu lan-lan lahuh men iha', dahin mili tusu la'ung doh men uma laja' atih ja puboh iha' tinan.

¹⁰ Mordekhai uh nangen Ester em mun iha' bara daha' iha' men pahu Yahudi.

¹¹ Ha'ut-ha'ut dau pah Mordekhai panau-panau ha' latan uma ngavan daha' doh melo' atih ja nyineng nuno' tuk Ester dahin nun-nun aleng en daha' na té' iha'.

¹² Té' nah jaka' ji-ji la'ung men daha' nyemdoh atih tei pala laja' Ahasyweros halem uma na', iha' tih men'uh ji duman. Avin ngioh adet daha', em payan daha' tei ha' unan laja', daha' musut-musut kenyu mun alem nem bulan, men'uh anan daha' meté' kenyu uro'-uro' dahin na'an ket bu sayu aleng en daha' doh usut té' lah daha' ngavan daha' nei kajau.

¹³ Tegu nyemdoh atih leka' men uma daha' doh tih, tei ha' uma laja', iha' pah meté' ket nun-nun aleng kenep na'.

¹⁴ Tegu levi dau iha' ha' tei hitih, jihima ké' iha' ha' nei uli tei ha' ji uma aleng ha' béh la'an, iha' tih uma aleng en Saasgas puboh, laké' aleng puboh daha' aleng hawa' apit laja' atih. Nusi' nah iha' tei pala laja' la'an, em tuken laja' muvui iha' la'an, uréh nah iha' tei la'an.

¹⁵ Jaka' Ester pah uh seng sukup tei pala laja', iha' tih Ester aleng anak Abihail, Abihail aleng harin taman la'ung Mordekhai, Mordekhai aleng uh ala Ester amung itung anak la'ung na' aleng doh. Nusi' Ester akei nun-nun kanan na' la'an, aleng dep men'uh aleng hu'en Hegai laké' aleng puboh daha' doh atih. Lim-lim daha' aleng nyineng Ester pah sayu kenep té' iha'.

¹⁶ Ketusu duman Ahasyweros jadi' laja', bulan aleng kepulu, aleng aran na' bulan Tebet, tegu anan daha' geri Ester pala laja' Ahasyweros alem uma na'.

¹⁷ Laja' pah nyalam lan té' iha' men'uh lim daha' doh aleng ha' béh, iha' pah tei té' kenep na' men'uh lim daha' nyemdoh aleng ha' béh atih, ateng iha' ngelavung iha' té' lavung aren, dahin meju iha' jadi' hawan na' kalui Wasti dih.

¹⁸ Men'uh anan la'an, laja' na ji pahlung aya' men Ester, dahin muvui lim daha' menteri dahin lim daha' aleng dekaya' alem daléh atih. Iha' pah nyihu daha' na dau aya' té' alem lim-lim daléh na', dahin meté' mejei-mejei ket men daha' nun-nun aleng marung en laja' uk men daha'.

Mordekhai pekurip laja' atih

¹⁹ Alem daha' mepeng daha' nyemdoh kedua' hangun atih, Mordekhai pah uh en laja' ju nyadui men iha'.

²⁰ Alem nunan pah Ester em peletu bara daha' iha' men pahu Yahudi, avin Mordekhai em mun iha' bara ji-ji la'ung. Ester pah pa'en ngioh dahun Mordekhai nan men-men iha' nyam men'a.

²¹ Tegu anan, alem Mordekhai na-na hadui na' alem uma laja', beka' Bigtan dawa' Teresy tenup perah kenep té' laja', dawa' kelunan anih aleng pian ba ketamen uma laja' anan, dawa' pah ilau alan seng lematei laja' Ahasyweros atih.

²² Bi uh kitan Mordekhai pah tuk-tuk atih, pelalau ha' bara na' men Ester, Ester pah nengaran dahun Mordekhai nan men laja' la'an, dahin metut aran Mordekhai aleng uh bara iha' daho' atih.

²³ En daha' ngetneng teneng nah daho' atih, beka' lan kah daho' atih dih, pelalau en daha' tekayung nah dawa' kelunan anan té' jihé' ukum tekayung. Laja' pah nyihu daha' ngalung tuk-tuk atih alem buhup ngavan daha' ngalung lung-lung daléh atih.