ESTER 10 - SURAT TUHAN Dahun Kayan 1990

Laja' Ahasyweros dahin Mordekhai aleng dekaya' té' alem daléh

¹ Men'uh anan dih en laja' Ahasyweros akei nah uang-asin té' lim kelunan aleng alem ha'ut daléh, ateng ha' benghé' banget aleng su atih pah.

² Lim hadui na' aleng dekaya' atih dahin avan na' aleng kelalau dengah atih, nurei pah lim daho' aleng bara marung iha' uh meju Mordekhai nan lahuh, lim-lim atih pah uh kalung alem buhup tukit-tukit daha' laja' Media dahin Persia.

³ Avin Mordekhai kelunan Yahudi atih uh en na' petneng jadi' dekaya' hida na'. Lim daha' bengsa' na', daha' Yahudi atih pah meju iha' dahin kelu lan té' iha'. Iha' ilau ket aleng sayu men daha' dahin pelemana' daha' pa'en ja daha' jam murip dena' dahin sayu.