EFESUS 6 - SURAT TUHAN Dahun Kayan 1990

¹ U kelo' nyam, ngioh nah dahun hinan dahin taman kam té' alem Tuhan, avin atih nah aleng teneng.

² “Ju nah hinam dahin tamam,” (anan nah tebara menuna' aleng una' aleng té' jaji),

³ “Ja ha' sayu me ika' dahin ja urip ka' aru té' usun tana anih.”

⁴ U kelo' laké' taman, meng kam pehungo' anak kam ateng daha' bunget, bi sayu nah ikam petuboh daha' alem katuk dahin té' alem tebara Tuhan lahuh.

⁵ U ikam panyin, sayu nah ikam ngioh dahun daha' aleng geri ikam té' usun tana anih, dahin takut dahin ngetiwet dahin ji telujung tua kenep kam, awi jam tuk kenep kam té' Kristus,

⁶ meng ha' awi ha' unan kelunan tua, awi ngenep na' kelunan sayu kenep tua, bi sayu kam awi panyin Kristus aleng sayu, aleng ngioh kenep Allah na ket na' na.

⁷ Sayu ikam nyadui alem sayu lan kenep awi men Tuhan, meng ha' awi men kelunan.

⁸ Avin ikam jam, ket nun aleng sayu en ji la'ung na, anan nah seng en na' ala la'an men Tuhan, daha' panyin dahin daha' hipun-uma lim lahuh.

⁹ U ikam kelunan aya', sayu nah ikam na nunih lahuh men daha' nyam kam dahin ma'eng unget kelo', avin ikam jam Taman daha' nah aleng Taman kam lahuh té' ha' Surga, nusi' pah Iha' ngetuman té' kelunan.

Ala kanan en Allah ih

¹⁰ Ji pah la'an, sayu nah ikam najé' alem Tuhan dahin alem u'a tingan Na'.

¹¹ Nganan nah ikam té'lim-lim kanan Allah, ja ikam deng nekring nyarang lim ugé' Iblis.

¹² Avin itam peté' nusi' ha' dahin sin kelunan dahin daha', bi itam peté' dahin kuri-kuri ket aleng gem dahin kuri-kuri tingan dahin kuri-kuri pengulu' aleng ngeligem lidem alem lim usun tana anih, dahin daha' to' aleng kapan lelan aleng na ji'ek aleng ha' avan aleng bau.

¹³ Avin anan ala nah lim-lim kanan Allah, ja ikam deng ta'en tegu dau aleng ji'ek, dahin uh nah ikam na lim-lim, ikam pa'en nekring.

¹⁴ Avin anan, nekring nah. En kam jet nah telun bukan té' iung-u'ing kam, iha tih kenep aleng lan; nyabung sunung kam, iha' atih teneng,

¹⁵ kam nganan nah kudek kam té' temei dengah sayu aleng ma'uk dena' atih.

¹⁶ Aleng dekaya' na', sayu nah ikam api kelebit, iha tih kinah, kelebit anan nah aleng ngavan kam deng marem langa' aleng té' apui aleng nei men iha' aleng ji'ek atih.

¹⁷ Ala nah lavung kam, iha' tih urip maring, dahin malat men Belua' Ma'ang, iha' tih dahun Allah.

¹⁸ En kam na nah lim-lim anih dahin sebayang akei asi té' Allah ja Iha' masi ikam, sebayang pa'en-pa'en alem Belua' Ma'ang, mengan lan-lan dahin aru kenep, sebayang akei asi pa'en men lim daha' anak Tuhan.

¹⁹ Sebayang men akui lahuh, ja Tuhan ma'ih daho' men alem ba kui ja akui bara dahin makang kenep ket aleng lingen marung dengah sayu.

²⁰ Avin dengah sayu atih nah akui aleng itung ba Tuhan bi akui uh kaput té' avit. Sebayang ja alem tuk dengah sayu atih akui bara na' dahin makang kenep awi aleng tekep ek bara.

Marung tuk Tikhikus. Sebayang na'

²¹ Tikhikus harin tam aleng avan tam halam, panyin aleng teneng lan alem Tuhan atih, iha' nah aleng seng bara men ikam lim-lim tuk marung akui dahin marung hadui kui lahuh.

²² Iha' nah tavit na' akui nyihu iha' nei ha' ikam nan, ja kam deng jam marung tuk kalo', ja iha nei petangen kenep kam lahuh.

²³ Sayu nah dena' kenep nei té' ikam harin-harin ta' lim, dahin halam dahin kinah men Allah Taman tam dahin men Tuhan Yesus Kristus.

²⁴ Sayu nah asi Na' nei té' kelunan lim aleng nyalam té' Tuhan Yesus Kristus tam dahin halam aleng em tei matei. 16