EFESUS 5 - SURAT TUHAN Dahun Kayan 1990

¹ Avin ha' nutih sayu nah ikam ngioh katah Allah awi anak-anak Na' aleng ngavan Na' halam,

² dahin panau alem halam, awi Kristus pah uh nyalam itam dahin ma'ih batung Na' men itam, jadi' ji ket en ih dahin ji laluh aleng bu sayu men Allah.

³ Bi petuyang dahin lim ket aleng masep, dahin kivah, seg nun sayu metut daho' atih té' hang kam, avin ket nutih nusi' ha' tekep men itam anak Tuhan,

⁴ nurei pah barik aleng masep, dahin daho' aleng selanguk, dahin kiso' miran, ket atih nah aleng em tekep. Sayu pulang ta' meju Allah tua.

⁵ Ikam pah uh jam, nusi' peletu kelunan aleng nuyang, kelunan aleng na ket masep, kelunan aleng ngivah dahin kelunan aleng ngetalau hudo' deng nyengayan keligem Kristus dahin Allah atih.

⁶ Meng nah kelunan peluvat ikam dahin daho' aleng tung-tung: avin kenan ket atih nah unget Allah nei té' kelunan aleng muau.

⁷ Avin ha' nutih meng kam peji pakat dahin daha'.

⁸ Avin menuna' dih ikam lidem, bi kerei inih ikam malah halem Tuhan: murip nah ikam awi anak alah,

⁹ avin alah atih aleng ngebua lim na'an sayu dahin tutau dahin teneng.

¹⁰ Sayu ikam nelana' ket aleng ngavan Tuhan melu.

¹¹ Meng kam peji dahin hadui aleng lidem, aleng em té' bua na', bi pulang sayu mano' daha',

¹² avin hadui en daha' na' selem atih, nira na' pah avan ta' ha'éh.

¹³ Bi lim ket aleng en tam mano' atih nei tula kenan alah: avin lim ket aleng uh tula atih adang uh malah.

¹⁴ Avin ha' nunan, té' nah daho', “Ma'un nah, u ika' aleng tudu, peju nah men patei, Kristus pah seng malah té' ika'.”

¹⁵ Avin ha' nutih, mengan nah sayu-sayu nuno' tuk kam manau urip kam, meng kam awi kelunan aleng em té' kenep, sayu ikam awi kelunan aleng nyemugen,

¹⁶ meng kam hapan em tuman-tuman avin tegu anih tegu ji'ek.

¹⁷ Avin ha' nutih, meng kam nyelanguk, bi sayu ikam nengayet petneng ja ikam nei jam ket aleng kenep Tuhan.

¹⁸ Meng kam mavuk agun, aleng nasa' urip kam tua, bi sayu nah ikam pa'en penu té' Belua' Ma'ang.

¹⁹ Sayu ikam tengaran-tengaran pedeng kam alem Nyanyi Daha' Israel dahin nyanyi sebayang dahin peleken meju mahek Tuhan, nyanyi dahin na ju na' mahek Tuhan men alem kenep kam.

²⁰ Sayu nah itam bara sayu kenep pa'en té ket lim-lim alem aran Tuhan Yesus Kristus tam, men Allah aleng Taman tam.

²¹ Sayu nyepida ji la'ung té' ji la'ung alem kam takut té' Kristus.

Tuk-tuk alem amin

²² U kelo' doh, sayu na ikam nyepida té' laké' kam awi té' Tuhan.

²³ Avin laké' atih jadi' kahung doh awi jam tuk Kristus pah jadi' kahung sidang, sidang aleng jadi' batung Na', Iha' pah Aleng Pekurip Na'.

²⁴ Awi sidang atih nyepida té' Kristus, nunan pah sayu lim doh lahuh nyepida té' hawan daha' alem ket lim-lim.

²⁵ U kelo' laké', nyalam nah hawan kam awi jam tuk Kristus nyalam sidang dahin ma'ih batung Na' men iha'.

²⁶ Iha' ngem'ang na' mayau na' té' ata' dahin té' dahun Na', Iha' nelesen na',

²⁷ ja Iha' ala sidang atih men batung Na' dep ji sidang aleng maren, aleng em té' nun-nun berek na' dahin em tei kelupit jam na', ja iha' ma'ang dahin em té' ji nun-nun ji'ek na'.

²⁸ Nunan pah tekep daha' laké' lahuh nyalam doh daha' piah awi nyalam batung daha' dep. Kelunan aleng nyalam doh na' iha' nah nyalam batung na' dep.

²⁹ Avin ji kelunan pah em té' aleng perah kenep té' batung na' dep, bi iha' puboh dahin nyalam na', awi jam tuk Kristus lahuh nyalam sidang,

³⁰ avin itam anih kelawei batung Na'.

³¹ “Avin tavit atih nah laké' seng melek hinan taman na', te peji dahin doh na', dawa' atih pah itung ji sin tua.”

³² Dalem lan alem daho' anih aleng lingen; akui ngatah tinih marung Kristus dahin sidang.

³³ Bi sayu nah ikam ha'ut-ha'ut la'ung nyalam doh kam awi ikam nyalam batung kam, sayu nah daha' doh hituk meju hawan na' lahuh.