EFESUS 4 - SURAT TUHAN Dahun Kayan 1990

Peji belua' halem Kristus

¹ Iha nah tavit na' akui aleng uh en daha' jin tavit hadui Tuhan nunih nangen ikam. Sayu nah ikam na barik kam tekep men uvui aleng ngavan Na' uh muvui ikam.

² Sayu nah ikam pa'en liva kenep dahin nyuwa kenep dahin puyu kenep pedeng kam, en kam petula nah halam kam aleng pepasi pedeng kam atih.

³ Tangen kam puboh barik kam anan aleng peji alem Belua', aleng ngepah itam alem kenep aleng dena'.

⁴ Té' ji batung dahin ji Belua', awi ikam lahuh uh en uvui halem ji kinah,

⁵ ji Tuhan, ji kinah, ji duh,

⁶ ji Allah dahin Taman Lim-lim, Iha' atih hujung ket lim-lim, dahin halem ket lim-lim dahin nyadui alem ket lim-lim.

⁷ Bi men itam ha'ut-ha'ut la'ung uh en Na' ih nah asi Na', ngioh tulan asi aleng en Kristus uk.

⁸ Avin anan Iha' kuma': “Iha' uh ma'un tei ha' ngavan aleng bau, kahum lelan kelunan salut en Na' geri, en Na' nulan nah kuri-kuri ket en Na' uk men kelunan.

⁹ (Bi aleng daho', “Iha' peju tei ma'un” atih, nusi' ha' alem na' Iha' uh nei ngiléh una' ha' ngavan usun tana aleng hida lelan iah?

¹⁰ Iha' aleng uh nei ngiléh, Iha pah aleng uh peju tei ma'un lahuh lalau bau men'uh lim-lim langit ja Iha' ngepnu ket lim-lim)

¹¹ Iha' ma'ih balei kelunan jadi' sihu Tuhan, balei pah jadi' awi nabi, balei pah lahuh pedengah dengah sayu dahin balei pah jadi' gebala dahin guru,

¹² ja pela'ung daha' anak Tuhan men hadui katuk, ja batung Kristus nei-nei pejen,

¹³ ateng itam lim uh ji tua alem ji kinah, dahin piah-piah jam tuk-tuk Anak Allah, ateng itam jadi' kelunan aleng uh nyemugen, aleng uh pi'at-pi'at ateng itam piah-piah la'ung awi Kristus aleng la'ung.

¹⁴ Nunan nah nusi' nah itam nyam la'an, nusi' nah itam ngelekaju-ngelekaju awi lupak, nusi' pah itam tei hebek kenan katuk tung-tung, dahin kenan haman kelunan, nusi' pah itam kelan ugé' daha' aleng peluvat kelunan.

¹⁵ Bi tekep itam na daho' aleng teneng alem halam, dahin sa'-sa' nei dekaya' alem ket lim-lim alem Kristus, Iha' atih nah aleng kahung tam.

¹⁶ Men Iha' nah lim batung atih petuk peha'ei tageng kenan ha'ut tuman tulang na', alem ha'ut-ha'ut kelawei na' teneng nyadui, batung atih pah nei pi'at-pi'at, dahin nei-nei dekaya' alem halam.

Petyah urip menuna' dahin urip maring

¹⁷ Anih nah dahuk, dahin aleng ek bara alem Tuhan men ikam, meng kam murip awi kelunan aleng alem adet ha' bé la'an, aleng ngioh kenep daha' aleng tung-tung.

¹⁸ Ugé' daha' uh lidem, daha' pah uh nengak men urip Tuhan Allah kenan lidem alem kenep daha', avin mahing kenep daha'.

¹⁹ Daha' pah em té' kenep teneng la'an, daha' pah uh ma'ih batung daha' men barik aleng miran masep, daha' ngivah ngenep na ha'ut na'an hadui aleng masep.

²⁰ Bi nusi' ha' nunan ket aleng uh kam pekalei alem urip Kristus,

²¹ avin ikam uh kelenghi dahun Na', dahin uh pekalei halem Na', avin aleng teneng atih té' halem Yesus.

²² Avin anan, sayu nah ikam melek barik kam aleng men urip kam menuna' aleng sa' tei tasa' kenan kivah aleng peluvat atih,

²³ sayu nah nei balui maring,

²⁴ dahin sayu nah barik kam jadi' maring ngioh aleng uh en kelengunan alem aleng teneng dahin alem ma'ang lan, ngioh katah Allah.

Ngavan tam murip sayu pedeng tam

²⁵ Avin ha' nutih, sayu ikam mebet lim-lim pamoh, na daho' aleng lan tua nah ikam pedeng kam, avin itam lim piah kelawei alem ji batung tua.

²⁶ Bei nah ikam em bunget, bi meng na sala; meng kenep kam lasu ateng matan dau ngesem,

²⁷ meng kam nyayang Iblis.

²⁸ Sayu nah kelunan aleng uh nakau atih meng nakau la'an: pulang sayu iha' la'ei alem hadui na', dahin usu na' na ket aleng tekep ja iha' deng ma'ih men kelunan aleng humé'.

²⁹ Meng msuang daho' aleng sala men ba kam, bi na nah daho' aleng pepjen sayu, aleng nageng kinah kam alem lim tuk aleng tekep, ja daho' atih ma'uk sayu men kelunan aleng kelenghi na'.

³⁰ Meng kam ngeji'ek Beluan Allah aleng ma'ang, aleng halem Na' ikam uh en Na' nada' ateng dau tam takau.

³¹ Sayu nah mebet lim kenep aleng heléh, kenep aleng lasu, kenep unget, kenep selepi, peji'ek kelunan, dahin lim na'an perah kenep lahuh.

³² Sayu ikam nyamah ji la'ung té' ji la'ung, pepasi, dahin piah pesebelang marung sala kam pedeng kam, nuno' pah Allah uh masi ikam marung sala kam alem Yesus Kristus.