DANIEL 9 - SURAT TUHAN Dahun Kayan 1990

Sebayang Daniel men daha' bengsa' na'

¹ Duman aleng aring keligem Darius anak Ahasyweros, aleng men pahu kelunan Media, aleng uh en daha' ju jadi' laja' té' alem keligem daha' Kasdim,

² té' alem duman aleng aring-aring keligem na' atih, akui anih Daniel, nei peklung alem buhup aleng nengaran dahun Tuhan men nabi Yeremia. Tula nah té' akui ujap duman aleng seng lebau men em payan Yerusalem atih tasa', iha' nah tusu-pulu duman dara na'.

³ Pelalau nah akui neng'o pala Tuhan Allah, pelalau sebayang dahin kahi asi dahin pelien dahin meté' balun lumuh dahin metei avo' té' batung kui.

⁴ Akui akei té' Tuhan Allah kui, dahin akun lim-lim sala kui, nunih dahuk, “U Tuhan Allah aleng kelalau ningan dahin aleng kelalau mahnga', aleng gem jaji Ka' dahin asi Ka' aleng em tei ketapah té' daha' aleng nyalam Ika' dahin aleng tuboh tebara Ka'!

⁵ “Kamé' uh na sala dahin uh na ket aleng ji'ek dahin ket aleng masep, kamé' uh muau Ika' dahin uh tei nyayang té' tebara Ka' dahin té' katuk-katuk Ka'.

⁶ Nusi' pah kamé' kaséh kelenghi dahun daha' aleng panyin-panyin Ka', iha' tih daha' nabi aleng uh petira té' alem aran Ka' men daha' laja'-laja' amé' dahin men daha' aleng geri kamé', dahin men taman amé', nurei pah té' lim kelunan aleng alem daléh amé' lahuh.

⁷ “U Tuhan, Ika' nah aleng teneng lan, bi jarun inih kamé' kelalau lalé' jam ha'éh, iha' tih kamé' kelunan Yehuda, dahin lim huang daléh Yerusalem dahin lim-lim kamé' kelunan Israel lahuh, daha' aleng jeleng dahin daha' aleng su, ha' lim-lim daléh hino'-hino' Ika' uh mutat kamé' avin kamé' na barik aleng nyelalang té' unan Ka'.

⁸ U Tuhan! kamé' uh jam ha'éh, nurei pah daha' aleng laja'-laja' amé' dahin daha' aleng mayak kamé' dahin daha' aleng taman amé' lahuh, avin kamé' uh na sala té' Ika' nunih.

⁹ Té' Ika' aleng Tuhan Allah amé', té' nah asi dahin kenep aleng pehuwa té' kamé', lan pah kamé' uh na ket aleng nyelalang té' unan Ka',

¹⁰ dahin em kaséh ngioh Dahum, aleng Tuhan Allah amé', dahin em ngioh katuk Ka' aleng musang men ba daha' nabi aleng panyin Ka' atih.

¹¹ Bi lim kamé' bengsa' Israel anih uh lepakau tebara Ka' dahin uh tei nyayang, avin em kaséh kelenghi Dahum. “Avin anan nah tulah dahin parit nei té' kamé', awi aleng uh kalung alem surat Musa panyin Ka' aleng Allah amé' anih, avin kamé' uh na sala Dahim nunih.

¹² Ika' uh pela'ung Dahum aleng uh Im bara men kamé' dahin men daha' aleng uh gem kamé', iha' nah Ika' uh menei katé' aya' anih té' kamé'. Nusi' té' tusah aleng awi nunih té' idah langit anih uh men'a, aleng awi ha' Yerusalem atih.

¹³ Awi aleng uh té' kalung alem surat tebara Musa, lim katé' anih uh nei la'ung té' kamé', bi nusi' loh kah kamé' kahi asi té' Ika' aleng Tuhan Allah amé', kamé' em nei pekuli kenep men lim sala amé', dahin em nei pelemana' ket aleng teneng aleng nei men Ika'.

¹⁴ Anan nah tavit na' Ika' uh petneng tusah atih dahin uh menei tusah anan té' kamé', avin Ika' aleng Tuhan Allah amé', teneng lan nah Ika' alem lim-lim hadui aleng Im na, bi em té' loh nah kamé' kaséh kelenghi Dahum aleng Im bara men kamé'.

¹⁵ “U Tuhan Allah amé', usu Ka' aleng ningan aleng uh geri pahu Ka' musang men tana Mesir, dahin aleng pedengah aran Ka' aleng en daha' hituk ateng dau anih, beka' kamé' anih uh na sala dahin uh na ket aleng ji'ek.

¹⁶ U Tuhan, ngioh awi teneng Ka', Im masi nah kamé', sayu nah unget Ka' tei lu'au té' Yerusalem daléh Ka' atih, dahin té' ngalang Ka' aleng ma'ang. Avin kenan sala amé' kah dahin kenan sala sepun amé', iha' kah Yerusalem dahin pahu Ka' uh ga' tuten kenan lim kelunan aleng té' teliling kamé' anih nih.

¹⁷ Avin anan, u Tuhan Allah amé', kelenghi nah dahun sebayang dahin ketalau panyin Ka' anih. Avin tavit aran Ka' bei nah alah neng Ka' malah té' Ngavam Aleng Ma'ang aleng uh tei tasa' atih.

¹⁸ U Allah kui, sayu nah iling Ka' kelenghi, Im ting nah Matam, dahin nyineng daléh aleng uh ga' tasa' té' alem ara Ka'. Kamé' menei sebayang dahin ketalau amé' ha' unan Ka', nusi' ha' avin kamé' anih teneng, bi avin mawa kenep Ka' aleng kelalau huwi nyungei atih.

¹⁹ U Tuhan, kelenghi nah dahun amé'! U Tuhan, masi nah kamé' ji'ek! U Tuhan, pelemana' nah dahin na nah! Meng mahen amei, tavit aran Ka' tua, u Allah kui, avin daléh Ka' dahin kelunan Ka' en daha' tut té' alem aran Ka'!”

Meliket Gabriel bara halem daho'

²⁰ Alem kui duan dahin ngetalau dahin akun sala kui dahin sala daha' pahu kui Israel, dahin geri ha' unan Tuhan Allah kui ket aleng ek akei men ngalang Allah kui aleng ma'ang atih,

²¹ alem kui sebayang nunan, pelalau madang nah Gabriel salet nei ha' akui, tegu jaka' daha' ma'uk ket en daha' uk men Tuhan en daha' pahun tegu levi dau. Iha' nah aleng kitak alem ket aleng nei tula té' akui dau arei dih.

²² Pelalau ha' duan dahin pekatuk akui. Ken na', “Daniel, akui nei anih seng ma'uk nyemugen men ika' ja ka' nei jam.

²³ Tegu ka' matoh dahum sebayang, té' kah hu'ei na', akui pah nei ja bara hu'ei atih men ika', avin Tuhan lalé' nyalam lan té' ika' ji'ek. Avin anan, sayu nah im peklung daho' anih dahin jam halem ket aleng nei tula atih!

²⁴ “Tusu-pulu migu, bi ha'ut dau alem ha'ut migu atih en kira ji duman, tusu-pulu migu atih uh en petneng men daha' pahu ka' dahin men daléh ka' aleng ma'ang, ja pek'uh ket aleng ji'ek, ja mesau sala, ja nyavun lim selalang, ja menei urip aleng teneng atih aleng té' pa'en-pa'en, ja ha' nei la'ung ket aleng nei tula atih dahin dahun daha' nabi lahuh, dahin ngenyu Iha' Aleng Kelalau Ma'ang atih.

²⁵ “Sayu nah im jam tuk anih, dahin pelemana' na' teneng-teneng, iha' tih men aring-aring daho' atih nei musang, iha' tih, men jaka' daho' nei aleng nyihu nemei Yerusalem dahin meju na' ngelua' ateng ji laké' laja' aleng en ngenyu atih nei ateng, seng té' tusu migu. Men'uh anan, alem nem-pulu-dua' migu dara na', daléh atih dahin latan na' dahin parit ata' na' aleng teliling na' seng en nemei nekulah, bi alem atih té' tusah.

²⁶ Men'uh nem-pulu-dua' migu anan, ji laké' aleng en ngenyu atih dih seg en netek tua, em té' nun-nun. Alem nunan daha' panyin ji laja' aleng seng nei seng nasa' daléh dahin nasa' Ngavan Aleng Ma'ang atih. Ka'uh na' seng nei awi tegu lepa dih tua, seng té' nah perang dahin té' tasa' ateng-ateng ka'uh na', awi daho' aleng uh en petneng.

²⁷ Laja' atih seng na jaji aleng tageng té' kelunan kahum jarun dara ji migu atih, bi marung belua migu atih, iha' em mun daha' ma'uk ket men Tuhan, ket en daha' tevek atih, dahin em mun daha' ma'uk bun usu daha' lahuh. Té' ujung kapit aleng kelalau lalé' masep seng nei nah ket aleng nasa' tua, ateng laké' aleng nasa' atih dih tasa' kenan ket aleng uh en petneng atih.