DANIEL 8 - SURAT TUHAN Dahun Kayan 1990

Duba laké' dahin kading laké' nei tula

¹ Ketlo' duman laja' Belsyazar uh gem keligem, akui aleng Daniel anih jam ji ket aleng nei tula té' akui la'an, men'uh ket aleng tula kitak una' atih dih.

² Té' alem kui nyineng ket aleng nei tula atih, beka' akui té' alem daléh Susan kitak, aleng té' alem tana daléh Elam. Akui nyineng ket aleng nei tula atih, beka' akui té' té' benghé' hungei Ulai.

³ Ek ting matak ké', beka' akui nyineng ji duba laké' nekring té' béh hungei atih, uheng na' dua', dahin aru lelan pah lahuh. Bi ji uheng na' aleng atek aru lan men'uh aleng ji atih, aleng aru atih baya iha' nei nyemau.

⁴ Ek nyineng duba laké' atih, beka' iha' meté' malo-malo' pedah matan dau uli, pedah ulei matan dau pa'un dahin pedah ta'o matan dau pa'un lahuh. Nusi' té' ji tulan aleng deng melawan iha', nusi' pah té' aleng deng takau men tingan na'. Iha' na ket aleng kenep na' tua dahin meju batung na' dep.

⁵ Bi alem akui peklung na', ek nyineng té' ji kading laké' nei men pedah matan dau uli, aleng panau ji usun tana dahin em ngaja tana. Kading laké' atih ji tua uheng na', aleng kelalau lalé' selap, uheng atih té' hang dua' matan na'.

⁶ Iha' tei pala duba laké' aleng dua' uheng aleng té' nekring té' benghé' hungei atih, pelalau ngelemudum tua tei nyudung, kelalau hatan ha'.

⁷ Ek nyineng kading atih meté' duba laké' atih, iha' pah hatan lelan, pelalau en na' malo' nah duba laké' atih, dahin pelalau merung dua' uheng na'. Duba laké' anan dih nusi' nah iha' peletu deng na nun-nun té' unan na', en kading atih ketuéh nah iha' ha' usun tana dahin meté' ngaja-ngaja iha', nusi' té' aleng deng makau duba laké' atih men alem tingan na'.

⁸ Kading laké' atih sa'-sa' nei bau kenep na', bi tegu iha' dekaya' lan tingan na', berung nah uheng aleng dekaya' atih. Tatah ngavan uheng aleng berung atih, nei pah pat uheng na' aleng selap lan, petat tua tujo' dalo' nelunga' pat pa'un dih hida langit nih.

⁹ Men ji uheng atih nei nyemau nah ji uheng aleng da'uk, beka' uheng atih nei-nei tua dekaya' tingan na', dekaya' men bah ta'o matan dau pa'un, nei dekaya' pah men bah matan dau pa'un lahuh dahin tei pala Daléh aleng Kajau atih.

¹⁰ Iha' pah nei dekaya' lelan, ateng iha' tei ha' daha' aleng bangu lelan aleng ha' langit. Balei men daha' kelawing aleng kahum atih pah en na' gak nah ha' usun tana dahin meté' ngaja-ngaja daha'.

¹¹ Nurei pah iha' meté' meju batung na' dep ha' unan Laja' daha' aleng bangu aleng ha' langit atih pah. En na' nyilé' nah ket en daha' uk men Tuhan aleng en daha' tevek ha'ut-ha'ut dau, dahin Ngavan Na' Aleng Ma'ang atih pah en na' ngahem.

¹² Avin daha' kelunan muau tua, daha' tei kela, nurei pah ket en daha' uk men Tuhan en daha' tevek ha'ut dau tei em té' tua nah. Nun-nun aleng en uheng atih na, la'ung lim-lim, ket aleng teneng atih pah en na' sau ha' tana tua.

¹³ Uh anan ek kelenghi dahun ji kelunan aleng ma'ang nei duan, té' pah ji kelunan aleng ma'ang aleng ha' béh kuma' men iha', “Seng kuri daha kah ket aleng nei tula anih té', iha' tih marung ket en daha' uk men Tuhan en daha' tevek ha'ut-ha'ut dau, dahin marung uau daha' aleng na tasa', dahin marung Ngavan Aleng Ma'ang aleng uh en hilé', dahin marung daha' aleng bangu aleng ha' langit en na' ngaja atih?”

¹⁴ Ken na' nyu'ei, “Ateng ha' lebau dua' libu' telo' atuh levi dahin jihima, uréh Ngavan Aleng Ma'ang atih seng en nemei maring nekulah.”

Meliket Gabriel bara halem na'

¹⁵ Alem akui, Daniel, aleng uh nyineng ket aleng nei tula atih, meté' pelemana' ngenep jam alem na', beka' té' nah ji kelunan nekring té' unan kui, jam na' awi laké' dih.

¹⁶ Ek kelenghi nah dahun kelunan aleng medéng-medéng nei men hungei Ulai atih, “U Gabriel, na nah kelunan anih nei jam alem ket aleng nei tula atih!” beka' ken na'.

¹⁷ Pelalau nei nah iha' ha' ngavak nekring atih. Tegu ha' nei ateng, ngeram nah akui pelalau tei mepek nga'um ha' tana. Pelalau ha' kuma' men akui, “U anak kelunan, sayu kah ika' nei jam, té' pah ket aleng nei tula atih, iha' nah marung tuk dau aleng baya!”

¹⁸ Alem iha' tengaran dahik, meran nah akui, akui uh nga'um mepek té' tana, bi iha' gem akui pelalau meju akui dahin nekring akui la'an.

¹⁹ Lun kuma' nah iha', “Akui ngenep bara ika' ket aleng seng nei jadi' tegu ka'uh unget anih, avin ket atih bara marung jaka' ka'uh na' aleng uh en Tuhan petneng.

²⁰ “Duba laké' aleng im nyineng aleng dua' uheng na' atih, iha' nah laja'-laja' daha' Media dahin daha' Persia.

²¹ Kading laké' aleng kahum bulun na' atih, iha' nah laja' daha' daléh Yunani. Uheng aleng dekaya' aleng té' hang matan na' atih, iha' nah laja' aleng una'.

²² Té' pah pat uheng aleng nei nyemau ngebaya uheng aleng berung atih, alem na' atih nunih, iha' nah pat keligem aleng seng nei nyemau men alem ji keligem na' atih, bi nusi' ha' piah u'a na' awi aleng una' dih.

²³ “Tegu dau aleng baya, alem keligem daha' atih, tegu daha' aleng muau uh nei penu tua na ket aleng ji'ek, alem anan beka' nei nyemau nah ji laja' aleng makang lan jam na', dahin aleng haman lan pamoh kelunan.

²⁴ Iha' seng nei kelalau ningan, bi pa'un tingan atih nusi' ha' men u'a tingan na' dep. Iha' seng kelalau nasa' dahin pekihau daha', ket nun aleng en na' na, lim atih pah seng la'ung. Daha' aleng té' aran en na' lematei, nurei pah daha' kelunan aleng ma'ang atih lahuh.

²⁵ Avin kenan ugé' na' na-na daha', hadui peluvat tua aleng na' na té' daha'. Iha' pelemana' alem kenep na', iha' dep-dep aleng dekaya' kurin na'. Alem ha' em té' loh daha' ngio'-ngio', beka' kelunan kahum lelan tasa' kenan na', iha' pah nei peté' dahin Laja' aleng bahujung lim-lim laja'. Bi iha' en muret tua, bi nusi' ha' tasa' kenan u'a kelunan.

²⁶ “Tuk-tuk ket aleng nei tula té' ika' marung jihima dahin levi atih, anan dih adang teneng lan kah. Bi sayu im mahuk ket aleng kitam atih, avin ket atih bara marung ket aleng seng nei baya aya' tih.”

²⁷ Akui anih nah Daniel, aleng uh la'ei alem perah alem kuri-kuri dau dara na'. Men'uh anan magéh nah akui, biti nah akui na hadui laja' la'an. Akui melak lelan nyineng ket aleng ek nyineng atih, nusi' peletu té' aleng jam pelemana' na'.