DANIEL 7 - SURAT TUHAN Dahun Kayan 1990

Pat tulan aleng kitan Daniel

¹ Duman aleng aring-aring Belsyazar gem pelitah jadi' laja' ha' Babel, ngenyupé' nah Daniel, té' pah ket aleng nei tula en na' nyineng men avan na' tudu. Pelalau ha' ngalung nyupé' atih, dahin bara tuk-tuk na'.

² Ken Daniel nunih, “Tegu ji malem, akui té' nyineng pat bahui nei men langit, na banget aya' nei ngelupak-ngelupak.

³ Beka' té' pat tulan aya' nei peju men alem banget, aleng pesekdep tua jam dalo'.

⁴ Aleng una' nei nyemau ket awi jam ji singa' dih, beka' té' kapit na' awi kapit nyiho' banga'. Akui nyineng beka' kapit na' tubit, pelalau iha' en ju men tana dahin nekring té' dua' kudek na' awi jam kelunan, kenep na' pah kenep kelunan.

⁵ “Ek nyineng, beka' té' ji tulan aleng ha' béh la'an, aleng kedua' na', jam na' awi jam buang. Batung na' pedah ji uh peju nah, dahin telo' tulang hah té' alem ba na', en na' ma'et té' ipen na'. Nunih nah dahun daha' bara men iha', ‘Té' nah tangen, sayu nah im kuman sin tulan kahum-kahum.’

⁶ “Uh anan beka' té' pah ji tulan aleng dep la'an kitak, jam na' awi jam kuléh dih, beka' té' pat kapit manuk té' la'ung na'. Kahung na' pehangat pah, pat kahung na', iha' pah hipun tingan haman gem.

⁷ “Men'uh anan malem anan loh kah ek nyineng té' ji tulan aleng kepat men dalo', aleng ngavan ta' kelalau takut dahin ngavan ta' melak, jam na' kelalau tu'a. Ipen na' titei aleng kelalau dekaya', iha' kelalau meling kuman dahin muret lim ket na' kani. Ketu la'an na' kuman, en na' ngaja-ngaja té' kudek na'. Dep lan jam na' men'uh lim tulan aleng nei una' atih, uheng na' pah pulu.

⁸ Alem kui ngetneng pelemana' uheng na' atih, beka' té' pah ji uheng uk nei té' hang uheng aya' na' atih, beka' pelalau tubit sikah telo' uheng aleng una' atih dih. Té' uheng aleng da'uk atih, té' mata' awi matan kelunan dih, té' pah ba na' lahuh aleng na daho' aleng bau-bau.

Iha' Aleng Murip Pa'en-pa'en nei tula

⁹ “Alem-alem kui nyineng ket anan, pelalau kui jam té' kuri-kuri ladung en daha' lo'. Pelalau tei nah Iha' Aleng Té' Pa'en Men Menuna' Aya' atih melo' té' iha'. Kanan Na' puti awi usan leju, buk na' puti awi bulun duba aleng ma'ang. Ladung Na' kelat apui, ilin na' pah lahuh apui aleng ngebaheng aya'-aya'.

¹⁰ Té' ji hungei apui aleng manyun men unan Na'. Libu'-libu' tua kelunan aleng nyepida té' Iha', dahin leksa'-leksa' aleng nekring té' unan Na'. Pelalau melo' nah daha' aleng gem besara' atih, en daha' uah nah lim-lim buhup atih.

¹¹ “Akui pelalau nyineng na', avin daho' aleng bau lan aleng en uheng atih na'. Akui pah pelalau nyineng na', ateng tulan atih en lematei, batung na' tasa' tua dahin en daha' sau alem apui ja nutung iha'.

¹² Tingan-tingan tulan aleng ha' béh hu'uh en bet té' daha', bi tebuko' urip daha' uh en petneng nah ateng tegu jaka' na' baya.

¹³ “Malem anan loh kah, akui nyineng ket aleng nei tula té' akui, awi jam anak kelunan aleng nei tugung avun men langit dih. Tei nah iha' pala Iha' Aleng Té' Pa'en Men Menuna' Aya' atih, iha' pah en daha' geri ha' unan Na'.

¹⁴ Pelalau Iha' ma'uk men iha' tingan dahin aren dahin tingan gem keligem awi laja'. Lim kelunan mem ha'ut-ha'ut bengsa', dahin men ha'ut na'an pau, dahin kelunan men ha'ut na'an daho' tei ngelu'ep lim té' iha'. Tingan na' iha' nah tingan aleng pa'en, aleng seng em tei levah, keligem na', iha' nah keligem aleng em tei tasa'.

Aran halem ket aleng nei tula atih

¹⁵ “Akui anih nah aleng Daniel ngihau lan-lan kui marung ket atih, aleng nei tula aleng ek nyineng atih aleng petusah kenep kui.

¹⁶ Pelalau kui tei jeleng té' béh ji laké' aleng nekring tinan, pelalau kui meteng iha' nuno' kah tuk alem lim ket atih. “Ken na' men akui bara lem na',

¹⁷ ‘Pat tulan aleng dekaya' atih, iha' nah pat keligem aleng seng nei nyemau té' usun tana anih.

¹⁸ Bi daha' kelunan aleng ma'ang, aleng anun Laké' Aleng Kelalau Lalé' Bau atih seng hipun keligem, daha' nah aleng seng hipun keligem atih pa'en-pa'en, lan, daha' seng hipun na' pa'en-pa'en ateng baya.’

¹⁹ “Akui ngenep seng jam alem na' teneng marung tuk ji tulan aleng kepat dalo' atih, aleng dep lan jam na' men lim-lim dalo' tulan aleng ha' béh atih, aleng ngavan ta' takut lan-lan atih, aleng té' ipen na' titei, hulun na' temaga', aleng kelalau meling kuman dahin ngenep muret lim-lim ket na' kani dahin aleng ngaja-ngaja la'an ket na' kani lahuh.

²⁰ Akui ngenep jam lahuh marung pulu uheng aleng té' té' kahung na' atih, nurei pah marung tuk uheng aleng dep atih, iha' tih uheng aleng té' mata', aleng té' ba, dahin aleng na' daho' bau-bau, aleng nei tubu, ateng telo' uheng aleng una' atih dih legak kenan na', nurei pah aleng ningan jam na' men'uh uheng aleng ha' béh atih.

²¹ “Ek nyineng uheng atih kebiteng dahin kelunan-kelunan aleng ma'ang dahin pekalah daha' lahuh,

²² ateng Iha' Aleng Té' Pa'en Men Menuna' Aya' atih nei ateng petneng ket aleng teneng men daha' kelunan aleng ma'ang atih, aleng anun Allah Aleng Kelalau Lalé' Bau atih. Atih nah jaka' na kelunan-kelunan aleng ma'ang atih hipun keligem.

²³ “Nunih nah dahun na', ‘Tulan aleng kepat atih, iha' nah keligem aleng kepat aleng seng té' té' usun tana. Iha' aleng seng dep lan-lan té' lim-lim keligem aleng ha' béh, aleng seng nyelu lim usun tana, aleng seng ngaja-ngaja na' dahin muret na'.

²⁴ Pulu uheng atih iha' nah pulu laja' aleng nei nyemau men keligem atih. Men'uh daha' atih, seng nyemau pah ji laja' la'an, iha' pah dep lelan men'uh daha' aleng una', iha' pah seng menyek telo' laja' aleng ha' béh.

²⁵ Iha' pah seng na daho' aleng melawan Allah Aleng Kelalau Lalé' Bau atih, dahin seng pekaté' daha' kelunan aleng ma'ang, daha' aleng anun Allah Aleng Kelalau Lalé' Bau atih. Iha' meté' ilau alan seng masan jaka' dahin masan udang. Daha' aleng ma'ang sen en uk té' alem usu na', té' alem ji jaka' dahin dua' jaka' dahin ji unang jaka'.

²⁶ Daha' aleng gem besara' atih seng melo', tingan keligem na' seng en daha' bet men iha', iha' pah seng tasa' dahin buret ateng iha' em té' mah na'.

²⁷ Pelitah-pelitah dahin lim tingan dahin aren té' alem lim keligem-keligem té' ida langit anih seng en uk men daha' aleng ma'ang, iha' tih daha' aleng anun Tuhan Aleng Kelalau Lalé' Bau atih. Keligem Na' atih iha' nah keligem aleng pa'en-pa'en, lim-lim daha' aleng hipun tingan pah seng nyepida té' Iha' dahin ngioh lim nun-nun tebara Na'.’

²⁸ “Nunan nah tuk dengah atih. Akui anih nah Daniel, kenep-kenep kui nah aleng kelalé' petusah akui, ateng kui jekawek tua neng kui. Bi akui melo' tuk-tuk atih alem kenep kui dep tua.”