DANIEL 6 - SURAT TUHAN Dahun Kayan 1990

Daniel alem luvang singa'

¹ Darius laké' Media atih nah aleng ala hadui laja' atih, iha' nah aleng gem daha', tegu urip na' nem-pulu-dua' duman.

² Pelalau nah Darius meju ji atuh dua'-pulu la'ung jadi' gabnur-gabnur aleng gem pelitah hida na' té' alem lim-lim keligem na' atih.

³ En daha' petneng nah telo' la'ung aleng dekaya' la'an aleng bau men daha' atih lim. Daniel ji men hang dalo' telo' la'ung atih. Té' dalo' nah daha' aleng la'ung atih. Té' dalo' nah daha' aleng gabnur-gabnur atih bara nun-nun aleng en daha' na, ja laja' em tei lugi.

⁴ Bi Daniel nan, iha' nah kelalau sayu men'uh daha' lim-lim té' alem hadui laja' atih, avin iha' té' kenep aleng nyemugen aleng dep lelan men'uh kenep daha' ha' béh, ateng laja' pa té' pelemana' seng nyihu iha' gem hujung lim-lim keligem na' lahuh.

⁵ Avin anan, daha' aleng dekaya' hujung daha' gabnur atih, dahin daha' aleng gabnur atih lahuh ilau alan ngavan daha' seng pesala Daniel té' alem hadui na' té' alem keligem daha' atih. Bi nusi' daha' jam nun-nun ngavan daha' seng pesala iha', avin iha' pa'en tutau barik na', nusi' té' daha' peletu jam barik na' aleng ji'ek dahin alem em teneng lahuh.

⁶ Ken daha' atih nah, “Nusi' tam jam té' nun ngavan tam seng leput Daniel nih, em iha' marung kinah na' té' Allah na' nuréh tua kah itam deng leput iha'!”

⁷ Tei nah lim-lim daha' aleng dekaya' hujung daha' gabnur dahin daha' aleng gabnur atih pala laja', dahin kuma' men iha', “U laja' Darius, sayu nah laja' murip pa'en-pa'en!

⁸ Lim daha' aleng dekaya' hujung daha' gabnur, lim daha' gabnur ha'ut daléh ka' dahin lim daha' menteri ka', dahin lim daha' aleng dekaya' té' alem daléh, uh pakat lim nah daha', ja laja' na ji surat udang té' alem keligem ka' nih dahin nyihu lim-lim kelunan ngioh na'. Awi té' hi-hi kelunan aleng ngetalau té' ket aleng ngavan na' sebayang dep dahin ngetalau té' kelunan ha' béh, alem dara telo'-pulu dau anih, iha' daha' em nei ngetalau té' ika', amei laja', sayu nah mesau iha' alem luvang singa', ken amé' dih.

⁹ Avin ha' nutih, sayu nah laja' na ji surat, sain daho' atih, ja ha' em deng en daha' asan, awi surat udang daha' Media dahin Persia, aleng em deng en daha' asan atih.”

¹⁰ Avin ha' nutih, laja' Darius na nah ji surat udang atih dahin sain na'.

¹¹ Kelenghen Daniel nah surat udang atih uh en daha' na, tei nah iha' ha' uma na', tei nah iha' ma'un tei halem ji tilung aleng pedah-ujung, ba na' aleng neng'ap nelunga' ha' Yerusalem. Telo' hangun ji dau iha' nyepuken sebayang dahin mahek Allah na', awi aleng kalei na' pa'en.

¹² Pelalau daha' atih petugung tei halem nyineng Daniel, beka' alem ha' sebayang dahin akei asi té' Allah na'.

¹³ Pelalau daha' tei bara laja' dahin meteng iha' marung udang aleng uh en na' na atih dih. Daha' kuma' men iha', “Bi hu'uh nah laja' na ji surat udang di, em mun ji la'ung sebayang té' ket ngavan daha' sebayang dahin té' kelunan ha' béh, bi sebayang té' laja' dep tua amé' alem telo'-pulu dau anih, kurim di. Hi-hi aleng sebayang té' ket ngavan na' sebayang dep, iha' seng en sau alem luvang singa', kum di keta'?” Nyu'ei nah laja', “Tebara anan di, uh teneng lan nah anan dih, ngioh udang-udang daha' Media dahin daha' Persia, aleng em deng pasa nuréh nutih.”

¹⁴ Ken daha' men laja', “Daniel, ji laké' men hang daha' aleng en geri salut men daléh Yehuda atih dih, iha' aleng em kaséh ngioh dahun laja', dahin em ngioh udang aleng en laja' na arei dih, bi laké' anih telo' hangun teneng iha' nukem dahin sebayang alem ji dau.”

¹⁵ Tegu laja' kelenghi dahun daha' bara iha' avin Daniel na nutih, bahat lan nah kenep na', dahin pelalau ha' ilau alan seng makau Daniel. Ateng-ateng dau levi iha' pa'en nyadui tengayet ilau alan masi Daniel.

¹⁶ Tei nah daha' atih petugung la'an pala laja' dahin kuma' men iha', “U amei laja', adang laja' uh jam, awi ngioh udang daha' Media dahin daha' Persia, nusi' té' udang dahin tebara aleng en laja' na aleng deng en kelunan asan.”

¹⁷ Uh atih en laja' nyihu nah daha' ala Daniel. Pelalau en daha' ala nah iha', en daha' sau nah iha' alem luvang singa'. Ken laja' men Daniel, “U Daniel, sayu nah Allah ka' aleng tangen-tangen im ketalau anan pekurip ika'!”

¹⁸ En daha' geri nah ji bato' en daha' tei adet luvang atih, pelalau en laja' na tada' selegem aran na' dahin tada' selegem aran lim daha' aleng dekaya' té' ida na', ngavan daha' na sep luvang atih, ja marung tuk Daniel tei nutih, meng nah tuk nun-nun tei pasan.

¹⁹ Lun tei nah laja' uli ha' uma na' dahin em peletu kaséh kuman pahmalem anan. Nusi' ha' mun daha' nei pehalau iha', nurei pah iha' em peletu tei tudu.

²⁰ Jihima pesun-pesun em payan dau nei malah lan, ma'un nah laja' Darius tei petajen ha' luvang singa' anan dih.

²¹ Tegu iha' jeleng tei ateng luvang singa' atih, medéng nah iha' na Daniel dahin daho' aleng pasi. Ken na' men Daniel, “Daniel, panyin Allah aleng murip, Allah ka' aleng im ketalau pa'en atih, deng kah Iha' makau ika' men singa' anan iah?”

²² Pelalau Daniel nyu'ei laja' Darius, “U amei laja', sayu nah laja' murip pa'en-pa'en!

²³ Allah kui uh menei meliket Na' mekep ba singa' atih, ateng daha' em na nun-nun té' akui, avin tula nah akui em té' sala ha' unan Na'. Nurei pah ha' unan ka' lahuh amei, nusi' pah té' akui na ket aleng ji'ek.”

²⁴ Pelalau sayu lelan nah kenep laja', dahin nyihu daha' tei mejat Daniel men alem luvang atih. En daha' hin ha' ké', beka' nusi' té' nun-nun beli té' batung na', avin iha' nginah lan té' Allah na'.

²⁵ Pelalau laja' nyihu daha' tei ala daha' aleng pesala Daniel, en daha' sau nah daha' alem luvang singa' atih la'an, lim anak dahin doh daha' en sau lahuh. Em payan loh daha' atih ateng tana alem luvang atih, pelalau en singa' sekalet tua nah daha' dahin meté' punat daha' lemhik tulang daha'.

²⁶ Un anan laja' Darius metei surat men daha' men ha'ut bengsa', dahin ha'ut na'an pahu, dahin men ha'ut na'an daho' aleng té' murip té' usun tana atih. Nunih dahun na' té' alem surat na' atih, “Sayu nah urip aleng dena', sa' nei-nei pi'at té' ikam.

²⁷ Té' surat anih akui na ji li'ap daho' aleng ek bara. Sayu nah ketu kelunan aleng té' alem keligem kui anih nyepida dahin takut té' Allah Daniel, avin Iha' nah Allah aleng murip, aleng murip pa'en ateng-ateng baya, keligem Na' pah nusi' peletu tei tasa', nurei pah tingan Na' lahuh nusi' ha' tei pah.

²⁸ Iha' aleng deng makau dahin masi, dahin na tada'-tada' dahin hadui ngavan daha' ngeniheng té' usun tana dahin ha' langit. Iha' aleng uh makau Daniel men kamit singa'.”

²⁹ Daniel pa sa'-sa' sayu urip na' té' alem urip laja' Darius gem dahin alem gem Koresy kelunan Persia atih lahuh.