DANIEL 5 - SURAT TUHAN Dahun Kayan 1990

Usu nei tula ngalung té' liding

¹ En Laja' Belsyazar na nah ji kuman aya' men daha' aleng dekaya'-dekaya' na', kahum daha' ji libu' la'ung. Dahin daha' ji libu' la'ung atih nah iha' meté' du'i ata' agun.

² Alem iha' du'i anan, iha' nyihu daha' tei ala tebuk met, pirek aleng uh en Nebukadnezar taman na' ala men alem Uma Tuhan ha' Yerusalem, ja laja' dahin daha' aleng dekaya'-dekaya' dahin daha' aleng hawan-hawan na' dahin daha' hawa'-hawa' apit na' atih du'i té' uvung-uvung atih.

³ En daha' geri nah tebuk met dahin pirek aleng uvung-uvung men alem Uma Allah ha' Yerusalem atih. Pelalau nah laja' dahin daha' aleng dekaya'-dekaya' na', dahin daha' doh na', dahin daha' hawa'-hawa' apit na' lahuh, du'i té' uvung-uvung atih.

⁴ Daha' meté' du'i ata' agun dahin puwi' mahek lim hudo'-hudo' aleng men met, dahin pirek, temaga', titei, kayo' dahin bato'-bato' atih.

⁵ Tegu jaka' atih beka' nei nah jahangau usu kelunan ngalung té' liding alem uma laja', té' béh iung lirui té' alem uma laja' nan. En laja' nyineng nah bulan jahangau usu aleng ngalung-ngalung atih.

⁶ Pelalau nyemit tua nah neng na', kenep na' pah pelalau ngihau dahin tusah pelemana', na', tuman tulang pa'un hapi na' pah matei tua, ngetiwet tua nah ujung alem na'.

⁷ Uh anan medéng aya'-aya' nah laja' atih, nyihu daha' duan daha' aleng jam nenung, daha' aleng nyineng kelawing, dahin daha' aleng jam nelana' nei pala iha'. Lun ken na' nah men daha' aleng tugé'-tugé' té' alem daléh Babel atih, “Hi-hi aleng jam basa' kalung anih dahin jam bara alem na' men akui, akui seng ma'uk balun aleng nyemit mavoh dih en na' té', akui pah seng ma'uk iha' ji teba'eng met lahuh en na' té', té' alem keligem kui anih pah akui seng na iha' lubun telo' té' ida kui.”

⁸ Bi lim kelunan aleng tugé'-tugé' aleng té' alem daléh laja', aleng uh nei pala iha', nusi' té' ji la'ung deng basa' kalung atih dahin jam bara alem na' men laja' lahuh.

⁹ Avin ha' nutih laja' Belsyazar pah sa'-sa' ngihau nah kenep na', neng na' pah tei-tei nyemit ata tua. Daha' aleng dekaya'-dekaya' na' lahuh tei ngeram tua nah daha'.

¹⁰ Avin laja' dahin daha' kelunan-kelunan aya' uh pephau tua nutih, tei nah doh laja' alem amin ngavan daha' kuman atih, ken na' men iha', “U laja', sayu nah laja' murip pa'en-pa'en! Meng nah ngihau lalé' dahin tusah pelemana' na', seng nun pah neng ka' lalé' nyemit teneng nunan?

¹¹ Avin té' alem keligem ka' nih, té' kah ji laké' aleng penu té' beluan ket en tam ketalau aleng ma'ang! Alem urip tamam menuna' dih laja', kelunan atih tula lan ha' kelunan aleng haman peklung, haman pelemana' dahin nyemugen awi ugé' ket en tam ketalau atih. Iha' en Nebukadnezar tamam dih ju jadi' dekaya' ujung lim-lim daha' aleng jam pusau, daha' aleng haman nenung, daha' aleng nyineng kelawing dahin daha' aleng jam-jam nelana'.

¹² Avin alem laké' atih té' belua' aleng dep lelan men'uh daha' aleng ha' béh. Iha' nyemugen, dahin haman pelemana', ateng ha' jam bara alem nyupé', dahin jam nyineng ket aleng sihuk dahin deng muvan ket aleng tei keluget, iha' tih aran na' Daniel, aleng en laja' na aran na' Beltsazar atih dih. Sayu nah im nyihu daha' tei muvui Daniel kerei inih, ja ha' bara alem na' si'!”

Daniel bara aran kalung aleng ha' liding

¹³ Pelalau en daha' geri nah Daniel pala laja'. Iha' nah laja' meteng Daniel, “Ika' kah aleng Daniel iah, ji laké' salut aleng en tamak ari men daléh Yehuda di?

¹⁴ Akui uh kelenghi marung tuk ika', ika' aleng penu té' belua' aleng dep lelan. Ika' aleng haman peklung, dahin haman pelemana' dahin té' ugé' aleng dep lan.

¹⁵ Daha' uh nei geri kuri-kuri la'ung kelunan nei pala akui, daha' aleng nyemugen, daha' aleng jam nenung, ja daha' basa' kalung anih men akui dahin bara alem na', beka' nusi' té' ji la'ung men hang daha' aleng deng bara alem daho' atih men akui.

¹⁶ Bi akui uh kelenghi marung tuk ika', ika' aleng jam dahin haman bara alem ket aleng sihuk dahin jam muvan ket aleng tei keluget kurin daha' nih. Avin ha' nutih, tana' ka jam basa' kalung atih dahin jam bara alem na' men akui, akui seng ma'uk balun yemit mavoh men ika' dahin ma'uk ika' ji teba'eng met té' keram, té' alem keligem anih ika' seng té' aran gem hadui jadi' lubun telo' té' ida akui.”

¹⁷ Lun ken Daniel nyu'ei laja', “Im lo' nah tibah atih tua amei laja', sayu pulang ka' ma'uk ket atih men daha' aleng ha' béh tua. Adang kui basa' kalung atih men laja', dahin bara alem na' men laja' lahuh.

¹⁸ “U amei laja'! Allah Aleng Kelalau Lalé' bau atih, Iha' nah aleng uh ma'uk tingan aleng dekaya' dahin aren dahin keligem aleng kelalau dengah men laja', men Nebukadnezar aleng tamam dih, amei laja'.

¹⁹ Kenan aren aleng uh en Na' uk men laja' atih, iha' nah daha' lim bengsa', dahin ha'ut pahu, dahin daha' men ha'ut na'an daho takut dahin ngetiwet tua té' iha'. En na' lematei nah hi tua aleng kenep na', en na' pekurip nah kelunan hi-hi aleng kenep na', en na' ju nah hi aleng kenep na', en na' na liva nah hi tua aleng kenep na'.

²⁰ Bi tegu ha' uh nei bau kenep na', dahin nei mahing lelan kenep na', ateng ha' nei balang, iha' pah pelalau pebet men ujung ladung keligem na', dahin aren na' pah pebet té' iha'.

²¹ Iha' en daha' uga men hang kelunan lim, kenep na' awi piah kenep tulan tua nah, ngavan na' murip pah té' té' hang keledei aleng alem uro', iha' kuman uro' awi sapi' dih tua, iha' jam basa kenan usep aleng nei men langit, ateng ha' nei men'gi Allah Aleng Kelalau lalé' Bau aleng té' tingan té' umung keligem kelunan dahin meju hi-hi aleng kenep Na', aleng seng en Na' lo' té' ujung daha' atih.

²² “Bi ika', amei Belsyazar, ika' aleng anak tamam, beka' nusi' ka' ngeliva kenep ka', bi uh kitam lim-lim kah ket anih di.

²³ Adang laja' pa'en bau kenep kah té' unan Tuhan Allah aleng hipun Surga atih. Avin uvung-uvung men alem Uma Na' im nyihu daha' geri men ika' amei, iha' nah ika' amei, dahin daha' aleng kelunan aya' ka', hawam pah dahin hawa' apit ka' lahuh, du'i ata' agun té' uvung-uvung atih. Ateng laja' pah uh meté' puwi' mahek ket tung-tung ngavan kam ketalau, aleng en daha' na men met, dahin pirek, temaga', titei, kayo'-kayo' dahin bato', aleng em deng nyineng dahin aleng em deng kelenghi dahin em jam na nun-nun. Amei laja', nusi' ka' ngenep mahek Allah, aleng nyegem hengan laja' dahin aleng petneng alan-alan men laja'.

²⁴ Avin ha' nutih, Iha' nyihu bulan jahangau usu atih nei dahin na kalung aleng nunan.

²⁵ “Nunih nah daho' aleng alem kalung atih, MENE, MENE, TEKEL, PARSIN.

²⁶ “Anih nah alem daho' atih: MENE, aran na' dau-dau keligem laja' hu'uh en Allah ujap dahin hu'uh pek'uh keligem ka'.

²⁷ TEKEL, laja' hu'uh en petyah té' tebangan, bi ika' kelalé' nyi'an.

²⁸ PERES, keligem laja' seng en petulan, seng en uk men daha' Media dahin men daha' Persia.”

²⁹ Avin dahun Belsyazar uh nutih dih, en daha' tei nah balun nyemit mavoh atih té' Daniel, dahin metei ji teba'eng met té' keran na', dahin meju iha' té' alem keligem atih ja iha' hipun tingan aleng lubun telo'

³⁰ Tegu malem atih, beka' en daha' lematei nah Belsyazar laja' daha' Kasdim atih.