DANIEL 4 - SURAT TUHAN Dahun Kayan 1990

Nebukadnezar ngenyupé' marung iung kayo'

¹ “Surat anih nei men akui Nebukadnezar aleng laja', ek kato' men ha'ut-ha'ut kelunan men lim-lim bengsa' dahin pahu, dahin men ha'ut na'an daho' aleng murip té' ji usun tana. Pi'at-pi'at nah dena' té' ikam!

² Akui ngenep petula tada'-tada' dahin ket aleng ngavak ngeniheng lelan aleng en Allah Aleng Kelalau Lalé' Bau atih na men akui.

³ “Nusi' beloh dekaya' tada'-tada' aleng en Na' na! Nurei kah ita' melak té' tada'-tada' keniheng aleng en Na' na lahuh! Keligem Na' iha' nah keligem aleng em tei pah, Iha' nah aleng gem itam pa'en ateng-ateng baya!

⁴ “Akui, Nebukadnezar, murip té' alem uma kui dahin sayu dahin em té nun-nun tusah.

⁵ Akui ngenyupé' ji nyupé' aleng petakut akui. Tegu kui té' té ngavak tudu, té' ket aleng nei tula kita, ket aleng nei tula aleng ek nyineng atih iha' nah aleng na kenep kui nei ngihau lelan.

⁶ Iha' nah akui muvui lim-lim daha' aleng tugé'-tugé' té' alem daléh Babel, nyihu daha' nei pala akui, ja daha' deng petula alem nyupik atih.

⁷ Iha' nah daha' aleng jam pusau dahin daha' aleng jam nenung, daha' kelunan aleng nyineng kelawing dahin daha' aleng jam-jam nelana', lim daha' nei pala akui. Iha' nah akui petira men daha' tuk-tuk ket aleng uh kitak tegu kui ngenyupé' atih dih, bi nusi' té' ji la'ung jam bara aleng na' men akui.

⁸ “Aleng baya loh-loh men'uh anan iha' nah Daniel nei pala akui, iha' tih Daniel aleng en daha' na Beltsazar ngioh aran hudo' kui, iha' pah aleng penu dahin beluan ket aleng ma'ang en tam ketalau lahuh. Pelalau kui petira-petira tuk-tuk nyupé' atih men iha'.

⁹ ‘U, Beltsazar, ika' aleng dekaya' té' ujung lim-lim daha' aleng jam pusau! Akui jam beluan ket en tam ketalau uh té' té' alem ka', nusi' peletu té' ket aleng lingen aleng em deng im petula! Avin ha' nutih, anih nah lung marung ket aleng nei tula kitak té' alem nyupik, sayu nah im bara alem na' men akui,’ kek men iha'.

¹⁰ “Té' pah ket aleng nei tula aleng kitak té' ngavak tudu atih, nunih tuk na'. Té' marung belua usun tana nih, té' ji iung kayo' aleng kelalé' bau.

¹¹ Kayo' atih nei-nei dekaya' dahin mahing, bau ateng ha' langit, tula kitan daha' men lirin usun tana nih.

¹² Itun na' kelalé' kajau, bua na' kelalé' jama, lim-lim ket aleng murip deng kuman té' kayo' atih lim nah daha'. Té' ida na' nah tulan-tulan aleng alem uro' ilau ngavan daha' nyingau, té' da'an-da'an na' nah ngavan manuk-manuk ha' kelekawah na halah, té' iha' nah ket lim-lim aleng ngimet té' usun tana ala ket en daha' kani.

¹³ “ ‘Alem kui té' té' ngavak tudu anan, iha' pah akui jam ket aleng nei tula la'an, akui jam ji kelunan sihu, ji kelunan aleng ma'ang aleng nei ngiléh men langit.

¹⁴ Iha' medéng-medéng dahin daho' aleng dekaya', nunih dahun na', “Teveng nah kayo' atih, en munang-munang nah da'an-da'an na', en lemruh nah itun na', dahin urah nah bua-bua na'! Bei nah tulan-tulan lap men ida na' dahin manuk-manuk pah lahuh tei lap.

¹⁵ Bi tungun na', bei nah iha' em té' alem tana, en ngaput té' avit titei dahin avit temaga', té' hang uro' aleng mengun ha' padang atih. Bei nah iha' em basa kenan usep aleng men langit, nurei pah sayu nah iha' murip dahin daha' tulan, murip té' alem uro' ha' usun tana nih.

¹⁶ Bei nah kenep na' em tei balui, ateng kenep na' awi em kenep kelunan dih la'an, kenep tulan nah aleng en uk iha'. Nunan nah ket aleng nei té' iha' ateng ha' lebau tusu duman.

¹⁷ Daho' anih ngioh utet dahun daha' aleng sihu Na'. Daha' kelunan aleng ma'ang atih aleng bara na', ja daha' aleng murip jam Allah Aleng Kelalau Bau atih té' tingan ujung keligem kelunan dahin ma'uk na' men hi-hi tua aleng kenep Na', daha' aleng kelalé' da'uk em té' aran nun-nun pah deng en Na' ju melo' té' ngavan aleng bau.”

¹⁸ “ ‘Atih nah nyupik aleng kitak, akui nah laja' Nebukadnezar. U Beltsazar, kerei inih bara nah men akui alem nyupé' anih, avin daha' aleng haman té' alem keligem kui nih, nusi' nah daha' deng bara alem na' men akui. Bi ika' dep kah aleng deng, avin ika' penu té' beluan ket en tam ketalau aleng ma'ang.’ ”

Daniel petula halem nyupin laja'

¹⁹ Pelalau nekring nah Daniel aleng en daha' na aran na' Beltsazar atih, ngelengwen nah iha' pelemana', tei tua nah iha' ngihau dih. Lun kuma' nah laja', “U Beltsazar, meng nah nyupé' atih dahin alem na' tei na ika' ngihau!” Nyu'ei nah Beltsazar, “U Amei, sayu nah nyupim atih ga' té' daha' ayau ka' dahin alem nyupim atih tei mepuk té daha' bunu ka'!

²⁰ Ji iung kayo' aleng im nyineng atih, aleng jadi' kelalau dekaya' dahin kelalau mahing atih, dahin aleng bau ateng langit atih, dahin aleng tula kitan daha' té' ji usun tana,

²¹ aleng itun na' kajau, bua na' kelalau lalé' jama, té' iha' nah lim-lim ket aleng ngimet ala ket en daha' kani, té' ida na' nah ngavan tulan-tulan aleng alem uro' nyingau, dahin té' da'an-da'an na' nah ngavan manuk ha' kelekawah na halah,

²² ika' nah aleng kayo' atih amei, u laja'. Ika' nah aleng nei dekaya' atih dahin nei tu'a, aleng nei-nei pi'at dekaya' aran ateng ha' langit dahin ayan keligem ka' pah tei tula té' ji usun tana anih!

²³ Marung ket aleng im nyineng anan amei laja', iha' tih, ji laké' aleng ma'ang aleng sihu Na' kurim anan, aleng nei men Surga, aleng kuma', ‘Teveng nah kayo' anih dahin nasa' na', bei nah tungun na' té' alem tana, en ngaput té' avit titei dahin avit temaga' té' hang uro'-uro' aleng mengun ha' padang, bei nah iha' em basa kenan usep aleng nei men langit, dahin murip piah awi jam tuk tulan-tulan aleng alem uro' atih, ateng ha' lebau tusu duman.’

²⁴ “Nunih nah alem na', u, amei laja'. Anih nah utet na' kenan Allah Aleng Kelalau Lalé' Bau atih marung ika', amei.

²⁵ Ika' laja', seng en uga lap men hang kelunan lim, ika' seng murip dahin tulan-tulan aleng alem uro' tua, uro' aleng seng jadi' ket im kani, awi jam tuk sapi' kani uro' té' latan. Laja' pah seng jam basa kenan usep aleng nei men langit. Nunan nah ket aleng seng nei té' laja' ateng lebau tusu duman na'a, ateng laja' nei meng'i Allah Aleng Kelalau Lalé' Bau atih té' tingan hujung keligem kelunan té' usun tana dahin ma'uk na' men hi-hi tua aleng kenep Na'.

²⁶ Katah na' té' tungun kayo' aleng alem tana atih, alem na' nunih: Tegu ika' nei menglan Surga aleng ningan hujung lim keligem, men tegu atih, keligem ka' seng im gem la'an.

²⁷ U amei laja', sayu nah tebara kui anih mega' té' kenep ka'. Lap nah im men lim-lim sala dahin na nah ket aleng teneng, nurei pah barik aleng sala, sayu nah im ngalui na', bara halam ka' té' daha' aleng ga' katé', ja si' urip laja' aleng dena' kerei inih tei pejoh nunan loh.”

²⁸ Lim ket atih nei la'ung té' laja' Nebukadnezar.

²⁹ Uh lebau nah pulu-dua' bulan, tegu laja' tei panau-panau ujung uma na' aleng ngavan na' ha' Babel,

³⁰ kuma' nah iha', “Bareng si' anih em Babel aleng dekaya', aleng uh ek na ja ngavan daléh aren keligem kui aleng ngavak melo', tavit kenan u'a tingan kui dahin men aren kui aleng bau?”

³¹ Alem-alem laja' duan nunan, tenup-tenup nei nah ji daho' men langit, alen kuma', “Anih nah utet daho' men ika', u laja' Nebukadnezar, keligem ka' seng em té' té' ika' la'an.

³² Ika' seng en uga men hang kelunan, ika' seng murip té' hang tulan-tulan aleng alem uro', uro' tua nah seng im kani awi jam tuk sapi'. Nunan nah ket seng nei té' ika' ateng lebau tusu duman na'a, ateng ika' menglan Allah Aleng Kelalau Lalé' Bau atih aleng té' tingan hujung lim keligem kelunan dahin ma'uk na' men hi-hi aleng kenep Na'!”

³³ Tegu jaka' atih, ket aleng uh en bara nunan nei la'ung té' Nebukadnezar. Iha' en uga men hang kelunan lim dahin kuman uro' awi jam tuk sapi', batung na' jam basa kenan ata' usep nei men langit, ateng buk na' nei aru awi jam bulun nyiho', hulun na' pah awi hulun manuk.

Laja' Nebukadnezar mahek Allah

³⁴ Ken Nebukadnezar, “Tegu ha' uh lebau jaka' aleng uh en petneng anan, akui anih Nebukadnezar neng'o ha' langit, haman kui dahin ugé' kui nei uli la'an pala akui. Pelalau akui mahek Allah Aleng Kelalau Lalé' Bau atih dahin meju Iha' aleng murip pa'an-pa'an atih. “Tingan Na', iha' nah tingan aleng pa'en-pa'en, nurei pah keligem Na' ta'en men aring-aring tei ateng-ateng baya.

³⁵ Awi em té' huang usun tana' té' Iha', Iha' na awi aleng kenep Na' té' daha' meliket aleng ha' Surga, dahin té' daha' kelunan aleng té' ha' usun tana. Ji la'ung pah em té aleng deng ma'eng usu Na' dahin kuma' men Iha', ‘Ket nun Im na anan?’

³⁶ “Tegu kenep kui aleng haman pelemana' atih nei uli nekulah té' akui, nei uli pah aran-aran kui dahin aren kui lahuh, ja keligem kui en daha' kuma' maren la'an. Daha' menteri kui, dahin daha' kelunan aya' kui muvui akui la'an, akui en daha' petneng gem keligem kui la'an, lim aren kui pah tula kelalé dekaya' men'uh aren kui aleng una' dih.

³⁷ “Jadi' kerei inih, akui Nebukadnezar, melu meju mahek Laja' Surga, avin lim-lim hadui Na' nah aleng teneng dahin alan Na' pah aleng tutau, aleng deng ngeliva kenep daha' aleng na barik aleng balang.”