DANIEL 3 - SURAT TUHAN Dahun Kayan 1990

Nebukadnezar nyihu daha' ngetalau hudo' met

¹ En laja' Nebukadnezar na nah ji hudo' met aleng bau, dua'-pulu-tusu meter bau na', ayan na' ji depa' huwi, en na' tegreng té' datah Dura ha' daléh Babel.

² Lun en laja' Nebukadnezar nyihu nah daha' mepeng daha' aleng hida-hida na' atih, daha' aleng dekaya' dahin daha' aleng gabnur dahin daha' aleng kemiti té' alem daléh tih, daha' aleng gem ligit daléh daha', dahin daha' aleng petneng kelunan, lim daha' aleng dekaya'-dekaya' té' alem lim daléh na' atih, ja daha' nei pekelu'an meju hudo' aleng en na' na atih.

³ Pepeng nah daha' kelunan-kelunan aya' daha' anan dih, nei nah daha' lim men ha'ut-ha'ut ngavan daha', ja daha' meju hudo' aleng en laja' Nebukadnezar ju atih. Lun nekring nah daha' ha' unan hudo' atih.

⁴ Medéng nah ji laké' aleng hu'en laja' atih, “Nunih nah daho' men ikam, u lim kelunan men lim bengsa', dahin men ha'ut pahu, men ha'ut na'an daho'!

⁵ Tana nah ikam kelenghi dahun selingut ba na'a, awi dahun suling, dahun sapé', sapé' gambus, gita, tengbut, dahin nun-nun na'an ket en daha' dak, sayu nah ikam nukem ngetalau té' hudo' met aleng en laja' Nebukadnezar na atih.

⁶ Hi aleng em kaséh nukem ngetalau té' hudo' atih, iha' seng en sau pelalau tei alem kelat apui tegu jaka' atih.”

⁷ Avin ha' nutih, tegu daha' kelenghi dahun selingut ba, dahin suling, sapé', sapé' gambus, gita, tengbut, dahin dahun kuri-kuri na'an ket en daha' dak atih, pelalau nukem nah daha' men lim ha'ut na'an bengsa', dahin men ha'ut-ha'ut na'an pahu, dahin ha'ut na'an daho', tei ngetalau té' hudo' met aleng uh en Nebukadnezar ju atih.

Daha' leput dalo' bakéh Daniel

⁸ Tegu atih nei nah kuri-kuri la'ung daha' Kasdim meté' naka' leput dalo' Yahudi atih.

⁹ Ken daha' nah men laja' Nebukadnezar, “U laja', sayu nah laja' murip pa'en-pa'en!

¹⁰ Uh en laja' na nah ji daho' bara men lim kelunan, hi-hi aleng uh kelenghi dahun selingut ba, dahun suling, sapé', sapé' gambus, gita, tengbut, dahin kuri-kuri na'an ket en daha' dak, tekep daha' pelalau nukem ngetalau té' hudo' met atih.

¹¹ Hi aleng em nukem ngetalau té' iha', kelunan atih seng en sau alem apui aleng ngelat, kum di amei laja'.

¹² Beka' té' balei daha' Yahudi aleng uh en laja' nyihu gem pelitah té' alem daléh Babel nih, dalo' kelunan anih, iha' tih Sadrakh, Mesakh, Abednego, nusi' peletu dalo' kaséh ngioh daho' aleng en laja' na. Dalo' anih nusi' dalo' kaséh meju ket aleng ngavan laja' sebayang, nusi' pah dalo' kaséh ngetalau té hudo' met aleng en laja' ju atih.”

¹³ Ken laja' Nebukadnezar nah alem unget na', “Nyihu nah daha' nei geri Sadrakh dahin Mesakh dalo' Abednego nei pala akui.” Dalo' atih en daha' geri pala laja',

¹⁴ pelalau ken Nebukadnezar nah men dalo' atih, “Nuno', lan kah anan, u Sadrakh, Mesakh, Abednego, lankah kelo' em kaséh ngioh ket aleng ngavak sebayang, dahin em kaséh ngetalau té' hudo' met aleng uh ek na atih iah?

¹⁵ Kerei inih sayu nah kelo' sedia' ngetalau té' hudo' aleng uh ek na atih keta', ja tegu kelo' kelenghi dahun selingut ba, dahin suling, sapé', sapé' gambus, gita, tengbut, dahin kuri-kuri na'an ket en daha' dak, nukem nah kelo' ngetalau té' hudo' aleng ek na atih! Bi tana' kelo' em kaséh ngetalau té' iha', kelo' seng en sau pelalau tei alem apui aleng ngelat atih. Ket ngavan daha' sebayang ano' kah aleng deng seng makau kelo' men alem usu kui kurin kelo'?”

¹⁶ Pelalau Sadrakh, Mesakh dalo' Abednego nyu'ei laja' Nebukadnezar, “Nusi' té' bang na' kalo' nyu'ei laja' té' marung tuk anih.

¹⁷ Iha' Allah alo' aleng en alo' kinah anih haman makau kalo', adang Iha' makau kalo' men alem kelat apui atih, dahin men alem usu ka' lahuh, u amei laja'.

¹⁸ Bi awi Iha' em makau kalo' pah, sayu nah im jam amei, kalo' nih, nusi' lan kalo' deng nyepida té' ket aleng ngavan laja' sebayang anan, nusi' pah kalo' deng ngetalau té' hudo' met aleng im ju anan, amei.”

Dalo' bakéh Daniel ga' ukum matei

¹⁹ Tegu jaka' atih nekrek tua nah unget Nebukadnezar nan, bela tua nah neng na' na Sadrakh, Mesakh, dalo' Abednego tih. Pelalau ha' nyihu daha' pangu apui atih aya'-aya' la'an, tusu hangun lasu na' men'uh aleng uh pa'en men'a.

²⁰ Daha' aleng tu'a-tu'a men daha' seladu na', en na' nyihu tei ngaput Sadrakh, Mesakh, dalo' Abednego nan, dahin mesau dalo' alem apui aleng ngelat atih.

²¹ Pelalau en daha' ngaput nah dalo' atih, paget basung aru, dahin seluwen, seleben dahin kanan dalo', dahin mesau dalo' alem apui aleng ngelat atih.

²² Avin kenep laja' atih uh mahing lelan, apui atih pah en daha' katan aya'-aya', dalo' aleng tei mesau Sadrakh, Mesakh dalo' Abednego atih pah matei tutung pelalau.

²³ Bi dalo' telo' la'ung atih, Sadrakh, Mesakh dalo' Abednego tih, tei alem apui aleng ngelat aya'-aya' atih paget kaput dalo'.

²⁴ Uh anan tekjet nah laja' Nebukadnezar, pelalau nei biti petajen, ken na' men daha' aleng menteri na' atih, “Bi telo' la'ung kah aleng uh en tam sau alem apui paget kaput arei dih keta'?” Ken daha' men iha', “Lan kah dahum anan amei laja'.”

²⁵ Ken laja' pah la'an, “Beka' pat la'ung teneng nah dalo' ek nyineng ké', tebei tua dalo' panau-panau em té' nun-nun tusah té' alem apui atih ti, nusi' té' dalo' peletu ga' nun-nun, ji laké' aleng kepat dalo' atih pah awi jam anak ket aleng ngavan tam sebayang dih jam iha'.”

Dalo' en akau, en laja' ju nah dalo'

²⁶ Pelalau Nebukadnezar tei pala ba ketamen avo' apui aleng ngelat atih, medéng ha', ken na', “Sadrakh, Mesakh dahin Abednego, panyin Allah Aleng Kelalau Lalé' Bau, musang nah, nei nah kelo' hinih.” Pelalau musang nah Sadrakh, Mesakh dahin Abednego men alem apui aya' atih.

²⁷ Daha' aleng té' ida laja', dahin daha' aleng dekaya' aran daha', daha' aleng gabnur dahin daha' aleng menteri laja' tei pepeng, daha' atih lim nah aleng tei nyineng dalo'. En daha' nyineng nah lah dalo' ké', beka' nusi' té' peletu keleso' té' lah dalo', ateng buk dalo' pah em tei tutung, basung-basung dalo' pah, nusi' peletu ha' tei balui lah na', ateng bu apui pah em té' té' batung dalo'.

²⁸ Lun ken Nebukadnezar nah, “Meju lan-lan nah Allah Sadrakh, Mesakh, dahin Abednego! Iha' uh nyihu meliket Na' nei makau dalo' aleng panyin Na'. Dalo' nginah té' Iha', dahin em peduli dahun laja', dahin ma'uk batung dalo' seng matei tua, avin nusi' dalo' ngenep nginah dahin ngetalau té' ket aleng ngavan tam sebayang aleng ha' béh, bi dalo' nginah té' Allah dalo' dep tua.

²⁹ “Avin ha' nutih, akui na ji tebara, ha'ut-ha'ut kelunan men ha'ut bengsa', men ha'ut pahu, nurei pah men ha'ut-ha'ut na'an daho' pah, aleng na daho' nuten Allah Sadrakh, Mesakh dalo' Abednego, daha' seng en munang-munang dahin uma-uma daha' seng en ngahem tua, avin nusi' té' ket ngavan daha' sebayang aleng ha' béh aleng deng makau awi Allah dalo' aleng uh makau dalo' nutih.”

³⁰ Pelalau laja' meju aran dalo' dekaya' gem alem daléh Babel, iha' tih Sadrakh, Mesakh, Abednego dalo'.