DANIEL 2 - SURAT TUHAN Dahun Kayan 1990

Nyupin Nebukadnezar

¹ Alem duman aleng kedua' alem Nebukadnezar gem pelitah men daha', ngenyupé' nah iha'. Avin anan tusah nah kenep na', em deng tei tudu nah iha'.

² Avin anan en laja' nyihu nah daha' tei muvui daha' aleng jam pusau dahin daha' aleng haman nenung, daha' aleng haman nawen dahin daha' aleng nyineng kelawing, ja daha' atih bara nyupin na' men iha'. Lun nei nah daha' nekring ha' unan laja'.

³ Ken laja' nah men daha', “Ngenyupé' kui dih pa, tusah lelan kenep kui té' iha', iha' nah akui duan ikam nih, ja kam bara alem nyupik anih.”

⁴ Lun kuma' nah daha' aleng nyineng kelawing atih men laja' alem dahun daha' aram, “U laja', sayu nah laja' murip pa'en-pa'en! Sayu im bara nyupim atih men kalo', aleng jam ta' en ta' bara kah pa.”

⁵ Bi laja' kuma' men daha' aleng nyineng kelawing atih, “Akui uh pelemana' alem kenep kui, iha' tih, tana' ikam em jam bara nyupik anih, dahin em bara halem na' men akui lahuh, ikam seng ek munang-munang, dahin uma kam pah seng en ngahem ateng ha' tasa'.

⁶ Bi tana' kam jam bara nyupé' anih dahin bara alem na' men akui, ikam seng ek uk tibah, ikam ala aran aleng bau, ikam en daha' ju. Avin ha' nutih, en kelo' bara nah men akui nyupé' anih dahin halem na' lahuh.

⁷ Ji hangun la'an dalo' kuma' men iha', “Sayu nah tamak laja' bara nyupé' atih men kalo' panyin ka' anih, nurei kamé' jam bara alem na'.”

⁸ Ken laja' nyu'ei, “Uh kitak nah, kelo' petei akui tua anih, avin uh kitan kelo' nah alem kenep kui.

⁹ Tana' ikam em deng bara men akui nyupik nih, ikam seng adang ga' ukum aleng kurik di. Kitak ikam uh pakat bara men akui ket aleng pamoh dahin ket aleng peluvat, seng petei akui tua anan. Sek kelo' bara nyupik nih men akui, uréh kui kuma' kelo' haman bara halem alem na' men akui.”

¹⁰ Daha' aleng nyineng kelawing atih pah nyu'ei laja' atih, “U amei, nusi' té' kelunan té usun tana anih aleng deng bara ket aleng en tamak laja' akei anih! Nusi' payan peletu ta' jam ji laja' aleng meteng ket aleng nunih uh men'a té' kelunan aleng jam pusau, dahin daha' aleng nenung, dahin té' kamé' kelunan aleng nyineng kelawing nih, pulu hangun pah iha' ji laja' aleng dekaya' dahin aleng maren lelan nusi' ha' na nunih.

¹¹ Ket aleng im teng anan amei atek mahen lan-lan anan. Nusi' té' ji la'ung aleng seng deng bara na' men ika', amei. Em iha' ket ngavan daha' ketalau, uréh ha'. Bi ket atih em murip dahin tam kelunan nih.”

¹² Laja' pah sa' nei lasu dahin bunget té' tuk atih, pelalau ha' na daho' nyihu lematei lim kelunan aleng haman nutih ha' Babel nan lahuh.

¹³ Alem daha' pedengah daho' laja' seng lematei kelunan aleng haman-haman nunan, en daha' ilau nah Daniel dahin dalo' bakéh na' pah seng en daha' lematei lahuh.

Tuhan bara men Daniel aran nyupin laja'

¹⁴ Tegu Ariokh aleng kepala' seladu daha' aleng hu'en-hu'en laja' tei seng lematei kelunan aleng tugé' ha' Babel atih, pelalau Daniel tengaran dahin na' dahin kenep nyemugen dahin daho' lihei sayu lahuh.

¹⁵ Ken na' men Ariokh, kepala' seladu laja' atih, “Na' nun dahun laja' lalé' mahing nutih du?” Pelalau Ariokh bara tuk-tuk atih men Daniel.

¹⁶ Pelalau tei nah Daniel pala laja', tei tengaran dahin na', akei iha' kelung uk ja Daniel ala havah bara alem nyupin na'.

¹⁷ Uh anan uli nah Daniel pelalau tei ha' Hananya, Misael dahin Azarya, dalo' bakéh na' atih. En na' bara nah tuk-tuk atih men dalo',

¹⁸ dahin nangen dalo' akei asi lan-lan té' Allah aleng hipun Surga marung ket aleng lingen atih, ja Daniel dalo' bakéh na' em en daha' lematei tavin dahin daha' ha' béh aleng nyemugen té' alem daléh Babel nan.

¹⁹ Ket aleng kelalau lingen atih pah nei tula nah té' Daniel, tegu ha' jam ket aleng nei tula kitan na' atih malem anan. Pelalau Daniel mahek Allah aleng hipun Surga, ken na',

²⁰ “En hek nah aran Allah pa'en-pa'en ateng-ateng baya, avin men Iha' lim nah pa'un ugé' dahin tingan!

²¹ Iha' aleng masan jaka' na' dahin tegu na', Iha' aleng muéh laja' dahin aleng meju laja', Iha' aleng ma'uk ugé' men kelunan aleng nyemugen, dahin haman pelemana' men kelunan aleng haman peklung.

²² Iha' nah aleng petula ket aleng kelalau dalem dahin ket aleng sihuk, Iha' pah aleng jam ket aleng alem lidem, té' Iha' nah alah té'.

²³ U Allah sepuk ha' dih, akui mahek Ika' dahin meju Ika', avin Ika' aleng ma'uk akui ugé' dahin tingan, dahin uh bara men akui kerei inih ket aleng en alo' akei té' Ika', Ika' uh bara men kalo' ket aleng en alo' hu'ei men laja'.”

Daniel bara men laja' aran nyupin na'

²⁴ Uh anan tei nah Daniel ha' Ariokh, laké' aleng uh en laja' nyihu tei lematei kelunan-kelunan aleng tugé' ha' Babel atih. Tei nah iha' pelalau kuma' men iha' nunih, “Kelunan-kelunan aleng tugé' ha' Babel anih, meng im lematei daha'. Im geri nah akui pala laja', akui seng bara iha' alem nyupin na' atih!”

²⁵ Pelalau nah Ariokh tei geri Daniel pala laja' dahin bara iha' nunih, “U amei, akui uh pesuk ji kelunan men hang daha' aleng uh en tam ari salut men alem daléh Yehuda dih, aleng deng bara alem nyupim atih amei.”

²⁶ En laja' teng nah Daniel aleng en daha' na aran na' Beltsazar atih, “Seng deng kah ika' bara men akui nyupik aleng ek nyineng atih, dahin bara alem na' men akui lahuh iah?”

²⁷ Ken Daniel nyu'ei laja', “Ket aleng lingen aleng en laja' teng anan, nusi' peletu ji kelunan nyemugen, kelunan aleng nenung, kelunan alng pusau dahin kelunan aleng haman nelana' tei ateng té' alem na'.

²⁸ Bi ha' Surga té' Allah aleng deng petula lim-lim ket aleng lingen atih, Iha' aleng uh bara men ika', amei, ket nun aleng seng nei la'ung té' dau aleng baya. Nyupé' dahin ket aleng uh nei tula aleng en laja' nyineng alem ka' tudu té' pagen ka'a tih, nunih nah:

²⁹ “U amei laja', alem ika' té' té' ngavam tudu anan, ika' pah nei pelemana' marung ket aleng seng nei la'ung tegu dau baya. Tuhan aleng petula ket aleng lingen, Iha' nah aleng bara men laja' marung ket aleng seng nei la'ung baya atih.

³⁰ Té' akui anih uh tula nah ket aleng sihuk atih, bi nusi' ha' avin ugé' aleng té' té' akui tei lalau men'uh daha' ha' béh, bi té' pah atih ja tamak laja' jam alem na', dahin ja ika' nei jam ket aleng im pelemana' alem kenep ka' atih lahuh.

³¹ “U amei laja', tegu ka' jam ket aleng nei tula atih, ika' té' nyineng awi ji hudo' aleng kelala dekaya' nekring ha' unan ka'. Hudo' atih dekaya' lan dahin malah, dahin avan daha' takut lahuh.

³² Kahung hudo' atih en daha' na men met telesen, usuk na' dahin lengen na' pirek, butit na' dahin hapi na' temaga'.

³³ Betih na' titei, kudek na' titei beka' peklet dahin tana kalit pah lahuh.

³⁴ Alem laja' nyineng na', tenup-tenup luvin nah ji bato', bi nusi' atih hadui usu kelunan, pelalau nei mepuk hudo' atih, ga' kudek na' aleng men titei en daha' peklet tana kalit atih dih, pelalau buret nah kenan na'.

³⁵ Ji hangun atih tua, buret nah titei dahin tana kalit, temaga', pirek dahin met atih, lim na' jadi' buret awi upéh té' ngavan daha' mahik parei tegu taga'. Pelalau en dih adang, ateng ha' em peletu tula la'an en daha' nyineng. Bi bato' aleng mepuk té' hudo' atih, balui ji ngalang aya' aleng ngepnu ji usun tana anih.

³⁶ “Anan nah aleng nyupim di amei laja'. Kerei inih amei, akui seng bara alem na' men ika'.

³⁷ U amei laja', ika' nah laja' aleng hujung lim laja', avin Allah aleng hipun Surga uh ma'uk men ika' ji keligem dahin tingan dahin u'a dahin aren,

³⁸ dahin té' alem usu ka' nah Iha' uh ma'uk anak-anak kelunan, hino'-hino' ngavan kelunan té' murip, dahin tulan-tulan aleng té' té' tana, dahin manuk aleng té' ha' ida kelekawah. Lim ket atih en Na' uk alem usu ka' amei, ja daha' lim hida keligem ka'. Ika' nah aleng kahung na' aleng men met atih.

³⁹ “Bi men'uh ika' anih na'a amei, seng té' pah ji keligem aleng ha' béh nei nyemau la'an, aleng em nuno' maren awi keligem ka' anih. Uh anan la'an, té' pah ji keligem la'an, atih nah aleng ketlo', aleng men temaga', iha' nah aleng seng gem ji usun tana anih.

⁴⁰ Uh anan la'an, nei nah ji keligem aleng kepat na', aleng mahing awi titei, titei aleng deng muret dahin lemhik ket lim-lim. Awi titei aleng deng lemhik ket pah lanih-lanih, nunan nah keligem anih pah aleng seng muret dahin seng lemhik lim-lim keligem aleng una' té' iha'.

⁴¹ Awi ika' uh nyineng kudek na' dahin jahangau kudek na' aleng men tana kalit peklet dahin titei atih lahuh amei, alem na' atih, keligem laja' atih seng petat tua. Bi té' kah u'a keligem atih lahuh awi jam tuk titei, bi awi titei aleng peklet tana kalit aleng uh im nyineng atih dih.

⁴² Awi jam tuk jahangau kudek atih men tana kalit dahin men titei lahuh, nunan nah alem keligem atih seng mahing balei dahin lema balei.

⁴³ Awi ika' uh nyineng titei peklet dahin tana kalit atih di amei, alem na' atih, daha' seng peklet tua pehawa', bi nusi' loh kah daha' deng tei piah kenep, awi jam tuk titei em deng peklet dahin tana kalit.

⁴⁴ “Bi tegu urip daha' laja'-laja' atih, en Allah aleng hipun Surga atih ju nah ji keligem aleng seng em jam tasa' ateng-ateng baya, keligem atih nusi' nah iha' seng tei pasan la'an tei ha' pahu aleng ha' béh. Keligem atih pah seng nasa' lim keligem aleng ha' béh atih dahin pekpah daha', bi ji keligem atih tua nah aleng seng té' pa'en-pa'en, ateng-ateng hiran tih.

⁴⁵ Teneng lan awi ket aleng uh im nyineng anan dih amei, marung ji bato' aleng nei luvin men ngalang, aleng em kenan usu kelunan, aleng tei muret titei dahin temaga', tana kalit, pirek dahin met atih. Allah aleng kelalau dekaya' aleng uh bara men ika' anan amei, petula ket nun aleng seng nei la'ung tegu dau baya. Nyupé' ka' anan teneng lan amei, alem na' pah deng en tam nginah.”

Laja' ma'uk tibah men Daniel

⁴⁶ Pelalau nukem nah laja' Nebukadnezar nyepukun ha' unan Daniel dahin meju iha', iha' pah nyihu daha' ma'uk ket en na' uk bara bun usu na' dahin ket aleng bu-bu sayu men iha'.

⁴⁷ Kuma' nah laja' men Daniel, “Lan, Allah ka' nah aleng Allah bahujung lim-lim ket ngavan daha' sebayang. Iha' aleng té' tingan hujung lim laja', dahin aleng jam petula ket aleng sihuk-sihuk, iha' kah ika' deng petula ket aleng sihuk atih nan.”

⁴⁸ Pelalau laja' meju Daniel, dahin ma'uk kuri-kuri kahum ket men iha'. Iha' nyihu Daniel gem hujung lim daléh Babel, dahin na iha' dekaya' men'uh lim-lim daha' aleng nyemugen ha' Babel tih.

⁴⁹ Bi Daniel akei asi té' laja', iha nah iha' nyihu Sadrakh dahin Mesakh dalo' Abednego gem pelitah té' alem daléh Babel atih lahuh. Bi Daniel melo' té alem uma laja'.