DANIEL 12 - SURAT TUHAN Dahun Kayan 1990

Urip tegu dau aleng baya loh ha' usun tana

¹ “Té' jaka anan pah Mikhael seng nei peju, iha' tih meliket aleng maren aleng petuboh daha' pahu ka'. Seng té' ji jaka' aleng katé' aya' lelan, nusi' té' katé' aleng awi nutih uh menuna', men aring kelesing ha'ut bengsa' nei tubu ateng jaka' atih. Bi tegu jaka' atih, daha' pahu ka' seng takau, iha' tih daha' aleng té' kalung aran daha' té' alem buhup atih.

² Kahum pah men hang daha' kelunan aleng uh tei tudu ha' alem tana seng nei peju murip, balei tei ha' urip aleng pa'en, balei aleng seng tei ha' ha'éh aleng kelalau lalé' dahin ga' tuten aleng té' pa'en-pa'en.

³ Daha' aleng nyemugen seng ngetalah awi alah langit, dahin daha' aleng uh mayak kelunan pala aleng teneng, daha' nah aleng seng malah awi kelawing pa'en-pa'en ateng-ateng baya.

⁴ “Bi ika', Daniel, im huk tua nah lim daho' anih, im na nah sep té' buhup atih ateng ka'uh na' baya. Tegu atih kahum kelunan seng pivek tei hiréh hitih, ugé' pah seng nei pi'at-pi'at lahuh.”

⁵ Men'uh atih iha' nah akui Daniel anih nyineng, iha' tih, akui jam dua' la'ung kelunan aleng ha' béh, ji la'ung nekring té' bahé' hungei dipah anih, ji la'ung nekring té' bahé' hungei dipah atih.

⁶ Iha' nah ji atih meteng ji aleng meté' balun alut aleng té' nekring pedah hudik atih, “Kuri dara kah la'an ket aleng selap anih seng nei la'ung lo?” ken na'.

⁷ Ek nyineng laké' aleng meté' balun alut atih, aleng nekring pedah hudik atih, pelalau en na' ju nah usu na' aleng pedah ulei dahin aleng pedah ta'o, en na' jei ha' langit. Pelalau tevah nah iha' té' Iha' aleng murip pa'en-pa'en atih, ken na', “Ji jaka' dahin dua' jaka' dahin ji unang jaka' la'an pah. Té' pah lahuh, tegu ha' uh pah tingan ket aleng nasa' daha' kelunan aleng ma'ang atih, iha' nah lim-lim hadui anih nei la'ung.”

⁸ Té' pah akui nih, kelenghi kah akui ket atih, bi nusi' kui jam alem na', iha' kui kuma', “U amei, nun kah ka'uh lim-lim ket anih na'a lo?”

⁹ Bi ken na' nyu'ei akui, “Tei nah im Daniel, avin daho' anih seng melo' sihuk dahin en na' sep aran na' ateng dau aleng baya loh.

¹⁰ Kahum kelunan seng en Na' mayau ma'ang dahin en ngeputi dahin en Na' pesek lahuh, bi daha' aleng na ji'ek seng pejoh loh na ket aleng ji'ek. Ji la'ung pah men hang daha' aleng ji'ek atih em jam alem na', bi kelunan aleng nyemugen seng jam lim daha' alem na'.

¹¹ “En itung men dau aring daha' em mun ma'uk ket men Tuhan en daha' tevek ha'ut-ha'ut dau atih, dahin men dau ket aleng kelalau lalé' masep aleng menei tasa' tua atih en ju, iha' ha' seng té' ji libu' dua' atuh pitan-pulu dau la'an.

¹² Sayu lan nah men kelunan aleng tageng pa'en dahin aleng tei ateng ji libu' telo' atuh telo'-pulu-lima' dau.

¹³ “Bi ika', u Daniel, tei nah im pala ka'uh urip ka'. Ika' seng tei ngelarah, dahin té' ka'uh dau aleng baya ika' seng nei peju ja ala tibah ka'.”