DANIEL 11 - SURAT TUHAN Dahun Kayan 1990

¹ “Té' duman aleng aring-aring laja' Darius kelunan bengsa' Media atih gem daha', akui nekring té' béh na' ja masi iha' dahin ngetu'a iha'.

Dua' laja' men bah ta'o matan dau pa'un dahin men bah ulei matan dau pa'un

² “Avin ha' nutih akui seng bara men ika' ket aleng lan marung tuk anih. Lan, té' telo' laja' alem daléh Persia seng nei tula la'an, men'uh anan té' ji la'ung aleng kepat dalo' atih, aleng seng kelalé' kaya' men'uh dalo' aleng ha' béh. Tegu iha' uh nei tu'a na té' kaya' na', beka' iha' megoh kenep daha' lim ngenep peté' dahin keligem daha' Yunani.

³ “Men'uh anan té' ji laja' aleng kelalau tu'a seng nei peju, iha' aleng seng gem keligem na' dahin dekaya' tingan na', iha' pah meté' kenep na' dep tua naket en na' na.

⁴ Bi nusi' nuno' dara ha' uh nei gem pelitah, beka' pelalau nah keligem na' atih tasa', pelalau petat petulan-petulan ngioh ha'ut-ha'ut pat pa'un dih aleng men langit. Bi nusi' nah daha' anak na' nyengayen na', nusi' pah té' tingan na' awi keligem na' men'a, avin keligem na' seng kahem, daha' ha' béh aleng dep men'uh daha' kelunan anih aleng seng nyengayan na'.

⁵ “Laja' aleng men daléh daha' aleng men bah ta'o matan dau pa'un seng nei-nei tu'a, bi té' pah ji la'ung men hang daha' kepala' seladu na' aleng nei kelalau tu'a men'uh iha', iha' nah aleng seng gem keligem na' té' tingan aleng dekaya' lan.

⁶ Alem kuri-kuri duman men'uh anan, dawa' seng nei piah kenep. Anak doh laja' aleng té' ha' bah ta'o matan dau pa'un atih seng tei ha' laja' aleng té' ha' bah ulei matan dau pa'un, ja dawa' tei na kenep peji pa'en pedeng dawa'. Bi anak doh atih di, nusi' ha' ta'en aren na', nurei pah tingan laké' atih pah em tahen lahuh. Anak doh laja' atih pah seng en uk men daha' tua, nurei pah daha' aleng tei maten iha' atih lahuh, nurei pah anak la'ung na', nurei pah iha' aleng peji dahin na' men'a.

⁷ “Tegu atih seng nei nyemau nah ji kelunan men pahu anak doh laja' atih aleng ngalui kelunan atih. Iha' anih pah seng tei peté' dahin daha' seladu laja' aleng men daléh bah ulei matan dau pa'un atih, dahin tei halem kelahen daléh laja' atih. Iha' pah peté' dahin daha' dahin pekalah daha'.

⁸ Ketu hudo'-hudo' daha' aleng ngavan daha' ngetalau, lim hudo'-hudo' aleng en usu daha' nyelung, dahin lim ketanun daha' aleng melegah-melegah, awi pirek dahin met, seng en na' ngekup lim en na' geri tavan ha' Mesir. Té' kuri-kuri duman na' iha' ha' seng ngeta' pekayau dahin laja' daléh daha' aleng men pedah ulei matan dau pa'un.

⁹ Men'uh atih laja' daha' daléh aleng men pedah ulei matan dau pa'un atih pah ngenep tei nyudung tei halem keligem laja' daha' daléh aleng men pedah ta'o matan dau pa'un atih, bi men'uh atih la'an, iha' uli ha' daléh pa'un na' nekulah.

¹⁰ “Bi men'uh anan dalo' anak-anak aké' na' seng petmei ngenep tei ngayau, dalo' seng mepeng ji peng seladu aleng kapan lelan. Daha' tei ngelemhum tua nyudung daha', dahin lemisat daha', awi hengan lisat siho' dih, meté' kebiteng ateng-ateng ha' kelahen daléh daha' atih.

¹¹ Pelalau bunget lelan nah laja' daha' daléh aleng men pedah ta'o matan dau pa'un atih, pelalau musang tei ngayau laja' daha' daléh aleng men bah ulei matan dau pa'un, aleng uh mavéh peng seladu na' aleng kapan anan dih, daha' peng seladu aleng kapan atih dih seng tei alem usu daha' ayau na' atih.

¹² Tegu daha' peng ayau aleng kapan atih uh en na' pekalah nutih, pelalau tua nah laja' daha' daléh aleng men pedah ta'o matan dau pa'un atih nei bau kenep. Lan pah iha' uh lematei kuri leksa'-leksa' kelunan nutih ké', bi nusi' nah iha' seng maneng pa'en.

¹³ “Avin laja' aleng bah ulei men matan dau pa'un atih kedua' hangun na' seng mavéh peng ayau aleng kapan, lalau kapan men'uh aleng menuna' dih. Té' kuri duman men'uh anan ké', iha' ha' seng ngenep tei ngayau iha' la'an dahin geri kahum daha' ayau aleng kelalau kapan atih dih, dahin kahum na'an-na'an uvung kayau en na' geri.

¹⁴ Tegu jaka' atih kahum kelunan seng peju melawan laja' men daléh aleng pedah ta'o matan dau pa'un atih. Nurei pah daha' aleng hatan men pahu ka' pah sneg nei peju melawan iha', ja ket aleng nei tula atih nei la'ung, bi daha' seng tei jatu tua.

¹⁵ Laja' men daléh aleng bah ulei matan dau pa'un atih seng nei ateng, dahin seng meju ket ngavan daha' seng ngalen daléh daha' atih, ja daha' deng pekalah daléh aleng tagep kelahen na' atih. Seladu-seladu men daléh aleng bah ta'o matan dau pa'un atih peletu em nyatan peté' la'an, ketu seladu-seladu aleng uh na' milih atih pah, nusi' loh kah daha' deng kenan daha'.

¹⁶ Ateng-ateng laja' aleng nei nyudung iha' atih seng na ket nun-nun tua aleng kenep na' té' daha'. Nusi' té' ji la'ung aleng deng tei peté' dahin na'. Iha' pah seng murip té' Daléh Aleng Kajau atih, Iha' pah aleng hipun tingan té' ujung na'.

¹⁷ “Men'uh anan iha' petneng kenep na' seng tei geri lim u'a keligem na', seng na pakat piah dahin laja' aleng men bah ta'o matan dau pa'un. Iha' seng ma'uk ji anak doh jadi' hawan na' ja ha' deng pekalah keligem atih. bi hadui na' atih nusi' loh kah té' bang na' ngavan na' nei seneng.

¹⁸ Iha' pah pelalau mayeng hineng na' nyineng busang aleng ha' banget, kahum busang atih pah seng en na' hilé' lahuh. Bi té ji kepala' seladu aleng tei madet hadui na' aleng balang-balang peluvat daha' atih, iha' nah iha' muli hadui na' aleng balang aleng peluvat daha' atih ha' iha' la'an.

¹⁹ Uh anan iha' nah iha' tei nebileng hineng na' ha' daléh na', bi tegu anan iha' seng tei telesa' pelalau jatu. Men'uh anan nusi' nah daha' jam ketau na' la'an.

²⁰ “Té' ji laké' aleng seng nei peju kalui iha', aleng seng nyihu ji laké' tei ngavang sukei alem daléh ja mi'at aren na' alem keligem na' atih. Bi alem kuri-kuri dau dara na' beka' en daha' lematei nah iha', nusi' pah iha' matei tavit ano', nusi' pah iha' tavit pekayau lahuh.

Ji laja' aleng ji'ek

²¹ “Tei ji laké' aleng peju kalui iha', iha' tih ji kelunan aleng kelesé aleng em men pahu laja' men'a. Tebau tua daha', nusi' daha' ngio' iha' seng nei nyilé' ngavan laja' atih té hadui aleng peluvat tua.

²² Lim-lim seladu aleng tei nului iha' seng en na' najah, en na' nuking tua dahin en na' muret, nunan pah iha' na laké' aya' aleng puboh jaji Allah atih lahuh.

²³ Lan pa daha' na jaji dahin na', bi iha' peluvat tua. Iha' sa' tei tu'a, lan pah daha' kanya tua aleng dahin na', deng loh kah iha'.

²⁴ Em té' loh daha' ngio'-ngio', iha' tei ha' alem ji tulan daléh aleng kelalé' kaya' té' alem daléh atih, dahin na ket nun-nun aleng em peletu payan taman na' na dahin sepun na' na men'a. Iha' seng petulan tei murah daven aleng kelan daha' tavan dahin ket aleng en daha' hilé' atih té' hang daha' bakéh na'. Nurei pah lahuh iha' tei na-na daléh aleng té kelahen tagep atih, bi lim atih ket jaki tua.

²⁵ “Iha' seng bara akang na' dahin u'a na' melawan laja' daha' daléh aleng men bah ta'o matan dau pa'un atih dahin geri seladu-seladu aleng kelalé' kahum atih. Lan pah laja' men bah ta'o matan dau pa'un atih uh tei ngayau peté' dahin kuri-kuri seladu aleng kahum dahin aleng tu'a atih, bi nusi' loh kah iha' deng avin té' daha' aleng nyilem na ugé' ngava lawan iha'.

²⁶ Kelunan aleng kuman ket aleng en na' atah atih pah aleng muva iha', seladu-seladu na' seng en daha' lematei tua, kahum daha' aleng payah tua té alem kebiteng.

²⁷ Dawa' dua' laja' atih pa'en melo' kenep aleng seng na hadui aleng ji'ek. Alem dawa' peji melo' té' ji mija', beka' dawa' na daho' pamoh tua. Bi em té' loh bang dawa' tengaran, avin té' nah dau ka'uh hadui dawa', iha' tih tegu jaka' na' aleng uh en petneng.

²⁸ Men'uh anan laja' aleng men pedah ulei matan dau pa'un pah seng tei uli ha' alem daléh na' dahin geri kahum daven, bi kenep na' mahing melawan jaji aleng ma'ang. Iha' seng na aleng kenep na', uh anan iha' seng tei uli ha' daléh na'.

²⁹ “Tegu jaka' aleng uh en petneng atih ateng, iha' pah seng tei la'an nyudung daléh aleng men bah ta'o matan dau pa'un atih, bi iha' seng tei ji hangun anih, nusi' nah iha' awi aleng uh dih.

³⁰ Avin té' kapen daha' bengsa' Kitim seng nei melawan iha' ateng ha' takut nyineng daha'. Pelalau uli nah iha' dahin kenep aleng heléh lelan, dahin mesoh unget na' té' jaji aleng ma'ang atih, dahin ngioh dahun daha' kelunan aleng uh melek jaji aleng ma'ang atih.

³¹ “Daha' seladu-seladu na' seng nei peju, daha' seng tei demasep Ngavan Aleng Ma'ang aleng tagep atih, dahin em mun daha' ma'uk ket men Tuhan, ket aleng en daha' tevek ha'ut-ha'ut dau atih. Men'uh anan daha' seng meju ket aleng kelalau lalé' masep aleng menei tasa' tua.

³² Daha' aleng uh melek jaji aleng ma'ang atih, seng en na' ngeduk-ngeduk, bi lim kelunan aleng nelana' Allah daha', daha' pah tageng pa'en kenep daha' dahin makang na' aleng teneng.

³³ “Daha' aleng nyemugen men hang daha' seng na daha' kahum atih nei jam, bi alem kuri-kuri dau dara na' daha' pah seng payah katé' tavit kenan malat dahin apui, tavit daha' tei salut dahin en daha' hilé' lahuh.

³⁴ Alem daha' tei payah ké', en daha' masi kah daha' uk-iduk tua, kahum daha' seng tei peji pala daha', bi itung awi ala ju tua daha'.

³⁵ Balei men daha' aleng nyemugen atih pah seng tei petutut, té' pah iha' nutih ja daha' atih en pesek dahin en ngem'ang dahin en ngeputi ateng dau aleng baya loh, avin dau aleng uh en petneng atih, nusi' payan ha' ateng.

³⁶ “Laja' atih na ket aleng kenep na' tua. Iha' meté' mahek dahin meju batung na' dep hujung lim ket en daha' ketalau aleng ha' béh. Nurei pah lahuh iha' na daho' aleng em tekep loh-loh aleng melawan Allah aleng hujung lim-lim ket en daha' ketalau aleng ha' béh atih. Iha' seng na hadui na' nutih ateng jaka' unget Tuhan atih. Avin ket nun-nun aleng uh en petneng atih adang ha' seng nei la'ung.

³⁷ Nurei pah lahuh, nusi' ha' putau té' ket en sepun na' ketalau, nurei pah té' ket aleng en daha' doh ketalau atih. Nusi' ha' nyepida té' nun-nun ket ngavan daha' ketalau, avin iha' meju batung na' dep hujung daha' lim.

³⁸ Bi daléh aleng tagep-tagep aleng kenep na', atih aleng en na' ju bau men'uh ket en daha' ketalau atih. Ji ket ngavan na' ngetalau aleng em payan kitan daha' sepun na' men'a, iha' pah tangen lan meju na', tei geri met dahin pirek dahin bato' aleng mahen-mahen legah na', dahin kuri-kuri na'an ket aleng melegah.

³⁹ Iha' pah seng peté' dahin kelahen-kelahen daléh aleng tagep lelan, ket tung-tung ngavan daha' sebayang aleng dep atih aleng en na' ketalau. Hi-hi aleng meng'i té' iha', daha' nah aleng seng en na' ju lelan. Iha' meju daha' gem kelunan aleng bangu dahin ma'uk men daha' atih tana itung tibah daha'.

⁴⁰ “Bi tegu dau baya, laja' daha' aleng men daléh aleng men bah ta'o matan dau pa'un seng nei kebiteng dahin na'. Té' pah laja' daha' aleng men daléh aleng men bah ulei matan dau pa'un atih busek lelan ngenep seng tei nyudung iha' dahin geri kelita' dahin guda' daha' dahin geri kapen kahum lahuh. Iha' tei halem kuri-kuri daléh, dahin nyerang daha' dahin meté' lemisat daha' awi lisat siho' dih.

⁴¹ Tegu jaka' atih lahuh iha' seng nei té' alem Daléh Aleng Kajau atih. Kuri-kuri leksa' kelunan seng legak kenan na', bi aleng seng takau men alem usu na', iha' tih Edom dahin Moab dahin daléh aya' daha' pahu Amon lahuh.

⁴² Iha' tei metei usu na' nasa' kuri-kuri daléh daha', nurei kah daléh Mesir lahuh, nusi' daha' peletu deng tei takau men usu na'.

⁴³ Iha' nah aleng seng gem lim-lim daven daha', awi met, pirek aleng en daha' lo', dahin lim-lim ket aleng melegah té' alem daléh Mesir lahuh. Kelunan Libia dahin daha' Etiopia pah tei nyeluk té' iha'.

⁴⁴ Bi nei nah ji dengah men bah matan dau pa'un dahin men bah ulei matan dau pa'un lahuh, aleng na iha' nei ngihau. Avin ha' uh jam dengah atih, iha' nah iha' tei geri kenep heléh na' dahin ngenep tei nasa' daha' dahin lemayo' kelunan kahum.

⁴⁵ Iha' pah seng meju lepau aren na' té' hang banget dahin ngalang aleng kelalé' kajau ma'ang atih, bi men'uh anan iha' seng jam ka'uh urip na', ji-ji la'ung pah em té' aleng tei masi iha'.