DANIEL 10 - SURAT TUHAN Dahun Kayan 1990

Ket tula kitan Daniel té' bahé' hungei Tigris

¹ Alem ketlo' duman laja' Koresy gem daha' Persia, té' nah ji daho' tula té' Daniel aleng en daha' kuma' Beltsazar atih. Daho' atih teneng lan bara marung tuk ji tusah aleng dekaya' lan. Jam nah iha' alem daho' atih teneng, dahin pelemana' alem ket aleng nei tula atih dih.

² Tegu jaka' atih, akui anih Daniel lumuh alem telo' migu halum.

³ Ket aleng heling-heling pah nusi' deng tei masuk té' alem la'ung kui, sin tulan dahin bua agun pa nusi' peletu tei té' ba kui, nusi' kui kaséh meté' kenyu na bu sayu té' akui alem telo' migu halum atih.

⁴ Té' dua'-pulu pat dau bulan ji, tegu kui té' nekring benghé' hungei aya', iha' tih hungei Tigris,

⁵ ek keju'au nyineng, beka' té' ji kelunan aleng meté' balun alut aleng meté' jet met men daléh Ufas.

⁶ Batung na' kajau awi bato' beril jam na', neng na' awi alah bekilet, matan na' awi iséh aleng ngelat aya', lengen na' dahin kudek na' ngetalah awi temaga' aleng en daha' ngahin, dahun na' duan awi dahun kelunan kahum.

⁷ Akui Daniel anih dep kah aleng jam ket aleng nei tula atih, daha' lim aleng dahik, nusi' daha' jam na', bi daha' nah jam takut aya'-aya' tua, ateng daha' tei lap nyihuk.

⁸ Nunan nah akui ji'ek dep kah nyineng ket aleng dekaya' aleng nei tula atih. Lema tua nah tulang kui, nyemit tua nah neng kui, nusi' peletu té' henoh tulang kui la'an.

⁹ Pelalau kui kelenghi dahun na' duan. Tegu kui kelenghi dahun na' nutih, pelalau puva nah akui meran mepek neng kui té' tana.

¹⁰ Beka' té' ji usu nei gem akui nei meju akui nyepukun té' bukung dahin té' usu kui alem kui ngetiwet loh.

¹¹ Ken na' men akui, “Daniel, ika' ji kelunan aleng en nyalam. Pelemana' nah sayu-sayu té' daho' aleng seng ek bara men ika' anih, biti nah im, avin kerei inih akui ga' sihu nei ha' ika'.” Tegu ha' bara tuk aleng nunan men akui, nekring nah akui dahin peketiwet tua.

¹² Ken na' men akui, “Meng im takut Daniel, avin Allah uh kelenghi dahum men dau arei dih, aring dau ka' ngenep seng nei jam alem na' dahin ngenep ngeliva kenep ka' ha' unan Allah ka', té' pah akui nei anih avin kenan dahum di kah anih.

¹³ Meliket aleng gem keligem daha' Persia melawan akui alem dara dua'-pulu-ji dau, bi alem anan Mikhael, ji meliket men hang daha' aleng dekaya' mayak daha', iha' nah aleng nei masi akui, avin akui uh dara té' hinan ha' unan laja' daha' Persia anan.

¹⁴ Bi akui nei anih ja ka' jam ket nun aleng seng nei té' daha' pahu ka' tegu dau baya, avin ket aleng nei tula anih, iha' nah bara marung tuk-tuk dau baya atih.”

¹⁵ Alem iha' bara ket anih men akui, nukem nah akui mepek neng kui ha' tana, pelalau tei semawen tua nah akui em deng duan.

¹⁶ Bi ji la'ung aleng awi jam kelunan gem ba kui, pelalau nah akui neng'eng ba kui, iha' nah akui nei dua. Kek nah men kelunan aleng nekring té' unan kui atih, “U amei, kelalau katé' nah akui avin kenan ket aleng nei tula atih, lema tua nah tulang kui!

¹⁷ Seng nuno' kah akui aleng panyin ka' ji'ek anih seng deng tengaran dahim, amei? Peletu em té' u'a té' batung kui la'an, nurei pah hengak jeleng seng pah té' alem la'ung kui lahuh.”

¹⁸ Pelalau iha' aleng awi jam kelunan atih dih gem akui nekulah, dahin na akui nei tu'a.

¹⁹ Iha' pah kuma', “Meng im takut, Tuhan kelalé' nyalam ika'! Dena' nah kenep ka', tu'a nah im, ngemhing nah kenep ka'!” Alem ha' tengaran dahik, beka' pelalau tei tu'a nah aku ngelua', iha' nah akui kuma', “Sayu nah im tengaran dahik amei, avin ika' nah aleng uh petu'a akui ji'ek.”

²⁰ Lun ken na' nah, “Kitam kah tavit na' akui nei pala ika' nih iah? Kerei inih akui ngenep tei uli seng tei kebiteng dahin meliket daha' Persia. Tegu akui uh peté' dahin na', meliket daha' Yunani pah seng nei ateng.

²¹ Bi aleng una' akui seng bara men ika' ket aleng té' en ngalung alem Buhup Aleng Teneng. Nusi' té' ji la'ung té' béh kui aleng makang kenep peté' dahin dawa', bi Mikhael meliket aleng petuboh ikam atih tua kah aleng masi akui.