AYUB 1 - SURAT TUHAN Dahun Kayan 1990

Setan pesek Ayub

¹ Menuna' té' ji laké' ha' tana Us, aran na' Ayub. Laké' atih teneng dahin tutau, iha' nyepida té' Allah dahi em kaséh peletu jeleng ket aleng ji'ek.

² Iha' hipun tusu anak aké' dahin telo' anak na' aleng doh lahuh.

³ Iha' hipun tusu libu' duba, telo' libu' hulung unta, lima' atuh paseng kelebau na', lima' atuh keledei doh, daha' dipen-dipen na' pah kahum lelan lahuh. Iha' aleng kaya' lelan men lim daha' ha' daléh aleng béh matan dau pa'un té' daléh Us anan.

⁴ Dalo' anak aké' na' atih mengalei na kuman aya' ha' uma dalo', peseliwei-peseliwei nah dalo' na, dalo' telo' doh aleng harin dalo' atih pah en dalo' uvui pahlung kuman dahin du'i dahin dalo' lahuh.

⁵ Hu'uh lebau dau dalo' nah pahlung nutih, en Ayub uvui nah dalo', ja ngem'ang dalo'. Sepangen-sepangen Ayub ma'un, pelalau tei nah iha' ma'uk laluh aleng na' pahun atih, ngioh kahum la'ung dalo' anak na' atih, avin ken kenep na', “Bahi dalo' anak kui uh na sala dahin uh peji'ek Allah alem kenep dalo'.” Nunan nah Ayub na pa'en.

⁶ Tegu ji dau nei nah daha' anak Allah pala Tuhan, nei pah Setan té' hang daha' tei pala Tuhan lahuh.

⁷ En Tuhan teng nah Setan atih, “Nei men ino' ka'?” ken Na'. Pelalau ken Setan nyu'ei Tuhan, “Akui nei panau pedeng kui tei panau-panau nyuput ha' usun tana kah anih.”

⁸ Lun en Tuhan teng nah Setan anan la'an, “Nuno', té' kah ika' uh nyineng panyin Kui Ayub? Avin nusi' té' kelunan té' usun tana aleng awi iha'. Iha' pah teneng dahin tutau, ji kelunan aleng nyepida té' Akui dahin alem em kaséh peletu jeleng ket aleng ji'ek.”

⁹ Pelalau ken Setan nyu'ei Tuhan, “Bareng si' iha' em té' sin na' Ayub atih nyepida té' Ika' iah?

¹⁰ Ika' kah aleng na kelahen teliling iha', teliling uma na', teliling nun-nun aleng té' té' iha' lahuh di keta'? Nun-nun ket aleng en na' na, Ika' aleng masi' iha', sapi'-sapi' na' dahin duba-duba na', sa'-sa' kahum pah daha' nei té' alem daléh lahuh.

¹¹ Java' Ka' mejei usu Ka' té' iha', medet usu Ka' té' lim daven na' anan, adang iha' peji'ek Ika' té' unan Ka' tua.”

¹² Lun ken Tuhan men Setan, “Sayu kah, ketu-ketu ket anun na' alem usu ka' lim nah anan, bi batung na', meng im gem na'.” Men'uh anan leka' nah Setan men unan Tuhan.

Anak Ayub dahin daven na' tasa'

¹³ Té' nah ji hangun tegu dalo' anak aké' na' dahin dalo' anak na' aleng doh atih kuman dahin du'i pahlung ha' uma harin dalo' aleng dekaya' atih,

¹⁴ nei nah ji la'ung panyin Ayub nei bara iha', ken na', “Alem kelebau tebei ngelisah tana, dahin alem daha' keledei ka' atih tebei kuman uro' ha' pedah ji daha',

¹⁵ tenup ateng nah daha' kelunan Syeba atih nyerang daha' dahin nyilé' daha' dahin lematei daha' aleng puboh daha' atih. Akui ji'ek dep kah aleng takau nih, iha' pah iha' té' aleng nei bara ika' nunih.”

¹⁶ Alem-alem kelunan anan nira nunan, ateng pah ji la'ung la'an nei bara, ken na', “Apui tua nei legak men langit nutung daha' duba dahin kalo' aleng pian daha' atih lahuh. Akui ji'ek dep kah aleng takau nih, deng nei bara ika' nunih.”

¹⁷ Alem kelunan atih nengaran nunan loh kah, ateng pah ji kelunan ha' béh, nei bara Ayub nan la'an, ken na', “Telo' peng teneng seladu kelunan Kasdim atih nei nyudung hulung unta ka' dahin ala daha' lim, dahin lematei kamé' aleng pian daha' atih. Akui ji'ek dep kah aleng murip, deng nei bara tuk anih men ika' nunih,” ken ji kelunan anan pah la'an.

¹⁸ Alem kelunan anan nengaran nunan, beka' ateng pah ji la'ung la'an loh nei bara iha', “Alem-alem dalo' anak ka' dih pahlung kuman dahin du'i ha' uma harin dalo' aleng dekaya' atih,

¹⁹ tekjet tua nah bahui aya' nei marik men pedah tana ngahit atih, pelalau singyat meté' uma anan dih, uma pah payah mepuk dalo' anak ka' anan dih, matei lim nah dalo' ji'ek. Iha' nah akui ji'ek nei bara men ika' nunih!”

²⁰ Nekring nah Ayub, pelalau mirak-mirak basung na' dahin ngulo' kahung na', men'uh anan, nyepukun nah iha' tei ngelu'ep ha' tana dahin mahek Tuhan, ken na',

²¹ “Utoh kah akui ji'ek nei musang men alem butit hinak, ju utoh loh kah akui ji'ek tei uli lahuh. Tuhan kah aleng ma'uk, Tuhan kah aleng ala, meju lan aran Tuhan!”

²² Alem lim-lim tuk anan dih, nusi' peletu Ayub na sala, nusi' pah iha' na daho' em tuman aleng pesala Allah.