Norü taxre ga to ga popera ga ãẽ̱xgacügüchiga ümatüxü̃ 35 - Tupanaarü Ore

Yochía rü nanaxüchiga ga Üpetüchiga

¹ Rü nüma ga Yochía rü gumá nüxíraü̃cü ga tauemacüarü 14 gu nixĩ ga naxüchigaaxü̃ ga yema Üpetüchiga ga Yerucharéü̃wa. Rü yema ngunexü̃gu nayama̱x ga yema carnéruxacü naxca̱x ga Üpetüchiga.

² Rü norü puracügu nanamugü ga yema chacherdótegü rü nüxü̃́ nanangúchaü̃xẽxẽ nax naxügüã̱xü̃ca̱x ga Tupanapata ga taxü̃nearü puracü.

³ Rü nüma ga ãẽ̱xgacü rü nanamu ga yema Lebítanüxü̃ ga Iraétanüxü̃arü ngúexẽẽruü̃gü ga Tupanana nügü ãgüxü̃, rü ñanagürü nüxü̃: —¡Yima Tupanapata ya taxü̃ne ya Dabí nane ga ãẽ̱xgacü ga Charomóü̃ üxü̃negu peyaxǘ i ngẽma baú i Tupanaarü mugü nagu nuxü̃! Rü ñu̱xmawena rü marü taxũtáma peyangegü i ngẽma baú. Rü ngéma Tupanapata ya taxü̃newa tá nixĩ i Cori ya Tupanaaxü̃́ pepuracüexü̃ rü norü duü̃xü̃gü i Iraétanüxü̃axü̃́ pepuracüexü̃.

⁴ Rü pegütanüxü̃chigü pegü ipinu nax penaxügüxü̃ca̱x i Tupanaarü puracü i ngẽxguma nawa nanguxgu i perü ngunexü̃gü nax pepuracüexü̃, yema ãẽ̱xgacü ga Dabí rü nane ga Charomóü̃arü mugüwa nüxü̃ yaxuxü̃rüxü̃.

⁵ Rü wüxitücumüchigü i pema i Lebítanüxü̃ rü penaxwa̱xe nax ngéma Tupanapatawa pengẽxmagüxü̃ nax nüxü̃ perüngü̃xẽẽgüxü̃ca̱x i ngẽma Iraétanüxü̃ i norü ãmaregü ngéma gagüxü̃. Rü ngẽmaãcü wüxitücumü i Lebítanüxü̃ tá norü ngü̃xẽẽruxü̃ nixĩ i wüxichigü i Iraétanüxü̃tücumüwa i ngẽxguma ngéma nagagüãgu i norü ãmaregü.

⁶ ¡Rü peyama̱x i ngẽma carnéru i Üpetüchigaca̱x ixĩxü̃ rü Tupanape̱xewa pegü pimexẽxẽgü! ¡Rü penamexẽxẽ erü ngẽma inaxwa̱xexü̃ nixĩ nax ngẽma togü i Iraétanüxü̃ca̱x mea naxüchigagüãxü̃ i ngẽma Üpetüchiga yema Tupana Moichéwa nüxü̃ ixuxü̃rüxü̃! —ñanagürü ga Yochía.

⁷ Rü yexguma nüma ga Yochía rü noxrütama naxü̃nagütanüwa inanamugü ga 30,000 ga naxü̃nagü. Rü yema yéma yexmagüxü̃ ga duü̃xü̃güna nanana nax yemaacü naxüchigagüãxü̃ca̱x ga yema Üpetüchiga. Rü yema naxü̃nagütanüwa rü nayexma ga carnéruxacügü rü cabraxacügü. Rü guxü̃wama rü 30,000 nixĩ. Rü yemaétüwa rü inanana ta ga 3,000 ga wocagü ga yexwacax yaexü̃.

⁸ Rü yema ãẽ̱xgacüarü ngü̃xẽẽruü̃gü rü ta norü ngúchaü̃maxã inanamugü ga naxü̃nagü nüxna ga yema duü̃xü̃gü rü chacherdótegü rü Lebítanüxü̃ nax yemaacü naxüchigagüãxü̃ca̱x ga yema Üpetüchiga. Rü yexgumarüxü̃ ta ga yema Tupanapata ga taxü̃nena daugüxü̃ ga Irichía rü Chacaría rü Yeié rü yema chacherdótegüna nanamugü ga 2,600 ga carnéruxacügü rü 300 ga wocagü ga yexwacax yaexü̃ nax yemaacü naxüchigagüãxü̃ca̱x ga yema Üpetüchiga.

⁹ Rü yema Lebítanüxü̃arü ãẽ̱xgacügü ga Conanía, rü naenexẽgü ga Chemaía, rü Natanaé, rü Achabía, rü Yeié, rü Yochabá, rü yema togü ga Lebítanüxü̃na nanamugü ga 5,000 ga carnéruxacügü rü 500 ga wocagü ga yexwacax yaexü̃.

¹⁰ Rü yexguma marü guxü̃ma ímegügu nax naxüchigagüãxü̃ca̱x ga yema Üpetüchiga, rü nüma ga chacherdótegü rü nachicagu nügü ninu, rü yexgumarüxü̃ ta ga Lebítanüxü̃ rü yema ãẽ̱xgacü namugüxü̃ãcü nügü ininu.

¹¹ Rü nümagü ga Lebítanüxü̃ rü nanadai rü nayacaugücha̱xmüxü̃ ga yema naxü̃nagü ga Üpetüchigaca̱x ixĩgüxü̃. Rü yema chacherdótegüna nanaxã ga nagü. Rü yema chacherdótegü rü gumá nagümaxã nanamaxcu ga yema ãmarearü guruxü̃.

¹² Rü nüma ga yema Lebítanüxü̃ rü wüxichigü ga yema Iraétanüxü̃tücumüna nanana ga yema naxü̃nagü nax chacherdótegü Tupanape̱xewa nüxü̃́ ínaguxü̃ca̱x yema Moiché ümatüxü̃ ga poperawa nüxü̃ ixuxü̃rüxü̃. Rü yemaacütama nanaxü namaxã ga yema wocagü ga yexwacax yaexü̃.

¹³ Rü yemawena rü ínanagu ga yema naxü̃nagü nax naxüchigagüãxü̃ca̱x ga yema Üpetüchiga yema Tupana nüxü̃ ixuxü̃rüxü̃. Rü yema togü ga ãmaregü ga üünexü̃ rü buetaregüwa rü pairagüwa rü chartéü̃güwa nanamuxragü. Rü guxü̃ma ga yema rü paxãma guxü̃ma ga yema duü̃xü̃güxü̃ nayanu.

¹⁴ Rü yemawena ga nümagü ga Lebítanüxü̃ rü nanamuxragü ga yema namachi ga noxrügü ixĩxü̃ rü yema chacherdótegüarü ixĩxü̃. Yerü ga chacherdótegü ga Aróü̃taagü rü nata ga norü puracü rü nagu nachütaü̃gü nax ínaguaxü̃ ga ãmaregü rü chíxü̃. Rü yemaca̱x ga Lebítanüxü̃ rü nümatama nanaxügü ga yema namachi ga naxca̱x ixĩxü̃ rü yema chacherdótegü ga Aróü̃taagüca̱x ixĩxü̃.

¹⁵ Rü yema Lebítanüxü̃ muxraxü̃ ga namachi rü yema wiyaetanüxü̃ca̱x rü ĩã̱xarü dauruü̃ca̱x rü ta nixĩ. Rü yemaacü ga yema wiyaetanüxü̃ ga Achátaagü rü tama nachicana nixĩgachitanü yema Dabí rü Achá rü Emáü̃ rü Yedutúü̃ nüxü̃ ixuxü̃rüxü̃. Rü nüma ga Yedutúü̃ nixĩ ga ãẽ̱xgacümaxã nüxü̃ yaxuxü̃ ga Tupanaarü ĩnü. Rü yemaacü ga yema ĩã̱xgüarü dauruü̃gü rü ta tama nachicana nixĩgachitanü, yerü ga namücügü ga Lebítanüxü̃ rü marü nüxü̃́ nanaxügü ga yema namachi ga nüxna üxü̃.

¹⁶ Rü yemaacü nixĩ ga yema ngunexü̃gu nügü iyanuxü̃ nawa ga yema ngutaque̱xe ga Tupanaca̱x naxügüxü̃ nax naxüchigagüãxü̃ca̱x ga yema Üpetüchiga. Rü yema Tupanaarü ãmarearü guruü̃wa ínanagugü ga yema ãmaregü, yema ãẽ̱xgacü ga Yochía namaxã nüxü̃ ixuxü̃rüxü̃.

¹⁷ Rü nüma ga Iraétanüxü̃ rü 7 ga ngunexü̃ nixĩ ga naxüchigagüãxü̃ ga yema Üpetüchiga ga nagu nangõ̱xgüãxü̃ ga yema paũ ga ngearü pu̱xẽẽruü̃ã́xü̃.

^18-19 Rü nüma ga Yochía rü yexguma marü 18 ga taunecü ãẽ̱xgacü yixĩxgu nixĩ ga naxüchigagüãxü̃ ga yema Üpetüchiga namaxã ga chacherdótegü rü Lebítanüxü̃ rü Yudáanecüã̱xgü rü Yerucharéü̃cüã̱xgü. Rü Tupanaarü orearü uruxü̃ ga Chamuéwena rü taguma yemaacü nanaxüchigagü ga Üpetüchiga. Rü taxuxü̃ma ga Iraéanearü ãẽ̱xgacü rü Yochíarüxü̃ yemaacü nanaxüchiga ga yema Üpetüchiga.

Yochíaarü yuxchiga

²⁰ Rü nawena nax Yochía namexẽẽxü̃ ga guma Tupanapata ga taxü̃ne, rü Necáu ga Equítuanearü ãẽ̱xgacü rü natü ga Eufrátearü ngaicamawa yexmane ga ĩane ga Caquemíwa naxũ nax norü uanügümaxã nügü nada̱i̱xü̃ca̱x. Natürü nüma ga Yochía rü Necáuca̱x nixũ nax namaxã nügü nada̱i̱xü̃ca̱x.

²¹ Rü nüma ga Necáu rü Yochíaxü̃tawa nanamugü ga norü orearü ngeruü̃gü. Rü Yochíaxü̃ ñanagürügü: —Pa Yudáanearü Ãẽ̱xgacüx, tama nixĩ i cumaxã togü tada̱i̱xchaü̃xü̃ erü cumaxã rü nataxuma i ta̱xacürü guxchaxü̃. Rü ngẽma namaxã togü tada̱i̱xchaü̃xü̃ nixĩ i ngẽma to i nachixü̃ane i torü uanü ixĩxü̃. Rü Tupana rü choxü̃ namu nax paxa ngéma chaxũxü̃. ¡Rü ngẽmaca̱x taxṹ i Tupanamaxã curüxuanüxü̃, erü chomaxã nangẽxma! Rü ngẽxguma naga cuxĩnügu rü taxũtáma cuxü̃ nima̱x —ñanagürü ga yema Necáuarü orearü ngeruü̃gü.

²² Natürü nüma ga Yochía rü tama inaxĩnüchaü̃ nax Tupana yixĩxü̃ ga Necáuwa idexacü. Rü yemaca̱x nügü nanatoraxü̃xẽxẽ rü Meguíduarü doxonexü̃wa naxũ nax yexma Necáumaxã nügü nada̱i̱xü̃ca̱x.

²³ Rü yexguma nügü nadaixgu rü wüxi ga Necáuarü churara rü norü würamaxã ãẽ̱xgacü ga Yochíaxü̃ namaxü̃. Rü nüma ga ãẽ̱xgacü rü norü ngü̃xẽẽruü̃güxü̃ ñanagürü: —¡Choxü̃ pigagachi i nua! Erü marü poraãcüma chanapi̱x —ñanagürü.

²⁴ Rü norü ngü̃xẽẽruü̃gü rü ínanamuegü nawa ga gumá caru ga daiwexü̃, rü náimare ga carugu nayamuẽgü. Rü Yerucharéü̃wa nanagagü, rü yexma nayayu. Rü yema norü o̱xigü íta̱xgüxü̃gu nanata̱xgü. Rü yexguma nayu̱xgu ga Yochía rü guxü̃ma ga Yudáanecüã̱xgü rü Yerucharéü̃cüã̱xgü rü poraãcü naxauxe.

²⁵ Rü nüma ga Yeremía rü nanaxümatü ga wüxi ga wiyae ga Yochíaarü yuxchigagu ixuxü̃. Rü yexguma naxümatügucürüwa ga yema wiyae rü nüma ga Iraétanüxü̃ ga wiyaetanüxü̃ ga iyatüxü̃ rü ngexü̃gü rü nagu nawiyaegü ga yema wiyae. Rü ñu̱xma rü ta rü Iraéanewa nagu nawiyaegü i ngẽma wiyae. Rü ngẽmaãcü nüxna nacua̱xãchie ga Yochíaarü yu. Rü ngẽma wiyae rü ngechaü̃ i wiyaegüpanegu nixĩ i naxümatüxü̃.

^26-27 Rü nachiga i Yochía rü ngẽma popera i Iraéanearü ãẽ̱xgacügüchiga rü Yudáanearü ãẽ̱xgacügüchiga nagu ümatüxü̃gu nixĩ i naxümatüxü̃. Rü ngẽma poperagu naxümatü i guxü̃ma ga yema naxüxü̃ rü ñuxãcü naga nax naxĩnüxü̃ ga Tupanaarü mugü.