Norü taxre ga to ga popera ga ãẽ̱xgacügüchiga ümatüxü̃ 30 - Tupanaarü Ore

Echequía rü Üpetüchigaarü peta naxü

¹ Echequía rü norü orearü ngeruxü̃güxü̃ namu nax guxü̃wama ga Iraéanewa rü Yudáanewa nüxü̃ yanaxugüxü̃ca̱x nax Tupanapata ga taxü̃newa naxĩxü̃ca̱x ga duü̃xü̃gü nax naxüchigagüãxü̃ca̱x ga Üpetüchigaarü peta. Rü yexgumarüxü̃ ta Efraíü̃tanüxü̃ca̱x rü Manachétanüxü̃ca̱x yéma nanamu ga wüxi ga popera ga nawa nüxna naxuxü̃ nax Tupanapata ga taxü̃newa naxĩxü̃ca̱x ga Yerucharéü̃wa nax yemaacü naxüchigagüãxü̃ca̱x ga yema Cori ya Iraétanüxü̃arü Tupanaarü Üpetüchigaarü peta.

² Rü nüma ga ãẽ̱xgacü rü norü ngü̃xẽẽruü̃gümaxã rü guxü̃ma ga Yerucharéü̃cüã̱xgümaxã nidexa nachiga nax ñuxgu tá nax naxüchigagüãxü̃ ga yema Üpetüchiga. Rü nagu narüxĩnü nax norü taxre ya tauemacügu tá nax naxüchigagüãxü̃.

³ Rü taxucürüwa gumá nüxíraü̃cü ga tauemacü ga Tupana nüxü̃ unetacügu nanaxüchigagü ga yema peta, yerü tama ningu ga yema chacherdótegü ga marü Tupanape̱xewa nügü imexẽẽgüxü̃. Rü yexgumarüxü̃ ta taxũta Yerucharéü̃gu nangutaque̱xegü ga duü̃xü̃gü.

⁴ Rü nüma ga ãẽ̱xgacü rü ñu̱xũchi guxü̃ma ga yema duü̃xü̃gü rü norü me nixĩ nax yema norü taxre ya tauemacügu tá nax naxüchigagüãxü̃ ga yema peta.

⁵ Rü yemaca̱x guxü̃ma ga Iraéanewa nüxü̃ nayarüxugüe. Rü guma súrwaama yexmane ga ĩane ga Bechébawa inanaxügüe rü ñu̱xmata nórtewa Dáü̃anewa nangugü nax nüxna naxuxü̃ ga duü̃xü̃gü nax Yerucharéü̃wa naxĩxü̃ca̱x nax yéma naxüchigagüãxü̃ca̱x ga yema Cori ya Iraéanearü Tupanaarü Üpetüchigaarü peta. Yerü ga ü̃pa rü taguma Tupana nüxü̃ ixuxü̃rüxü̃ muxü̃ ga duü̃xü̃gümaxã nanaxüchigagü ga yema peta.

⁶ Rü nüma ga yema orearü uruü̃gü rü inaxĩãchi nax guxü̃ma ga Iraéanewa rü Yudáanewa naxĩxü̃ca̱x nax namaxã nanuegüxü̃ca̱x ga yema poperagü ga ãẽ̱xgacü, rü norü ngü̃xẽẽruü̃gü imugüxü̃ nax nüxü̃ yanaxugüxü̃ca̱x ga yema ãẽ̱xgacüarü mu ga ñaxü̃: —¡Pa Iraétanüxü̃, ẽcü naxca̱x pewoegu ya yimá Cori ya Abraáü̃arü, rü Ichaáarü, rü Iraéarü Tupana! Rü nüma ya Tupana rü tá pexca̱x nataegu i pemax nax Achíriaanearü ãẽ̱xgacüme̱xẽwa pibuxmüxü̃.

⁷ ¡Rü taxṹ i perü o̱xigüarü Cori ya Tupanana pixĩgachixü̃ naxrüxü̃ ga yema perü o̱xigü rü peenexẽgü ga tama naga ĩnüechaü̃xü̃! Rü yemaca̱x ga Tupana rü düxwa nagagutama ga yema duü̃xü̃gü rü togü ga nachixü̃anearü ãẽ̱xgacüme̱xẽgu nanayixẽxẽ nax nadaiaxü̃ca̱x. Rü pematama rü pexetümaxã nüxü̃ pedaugü ga yema.

⁸ ¡Rü ngẽmaca̱x i ñu̱xma rü taxṹ i ngẽma perü o̱xigürüxü̃ Tupanaxü̃ pexoexü̃! ¡Rü Cori ya Tupanaca̱x pedaugü rü naga pexĩnüe nax ngẽmaãcü wena pexü̃ nangü̃xẽẽxü̃ca̱x ngẽma pemaxã inaxunetaxü̃rüxü̃! ¡Rü nua pexĩ nawa ya yima napata ya nüma tá guxü̃guma nawa nangẽxmane! Rü ngẽxguma i nüma rü tá pemaxã inarüngü̃xmü.

⁹ Rü ngẽxguma Cori ya Tupanaca̱x pewoeguxgu i pema, rü ngẽma perü uanügü i ñu̱xma peenexẽgüxü̃ rü penegüxü̃ poxcuexü̃ rü tümamaxã tá nixauxãchigü rü ñaa nachixü̃aneca̱x tá tüxü̃ nawoeguxẽxẽ. Erü nüma ya Cori ya perü Tupana rü tamaxã ixauxãchiwa̱xecü nixĩ rü nüxü̃́ tangechaü̃tümüü̃gü, rü taũtáma pexü̃ naxo ega ngẽxguma naxca̱x pewoeguxgu —ñaxü̃.

¹⁰ Rü yema ãẽ̱xgacüarü orearü ngeruü̃gü rü Efraíü̃anewa rü Manachéanewa naxĩ, rü norü ĩanegügu nixĩãgütanü ñu̱xmata Chaburóü̃anewa nangugü. Natürü ga duü̃xü̃gü rü nüxü̃ nacugüe rü nagu nidauxcüraxü̃gü.

¹¹ Natürü nümaxü̃ ga duü̃xü̃gü ga Achétanüxü̃ rü Manachétanüxü̃ rü Chaburóü̃tanüxü̃ rü Cori ya Tupanaga naxĩnüe rü Yerucharéü̃wa naxĩ.

¹² Rü nüma ga Cori ya Tupana rü yema Yudátanüxü̃ ga duü̃xü̃güãẽwa nananguxẽxẽ ga ngúchaü̃ nax taãẽãcüma nayauxgüãxü̃ca̱x rü yanguxẽẽgüãxü̃ca̱x ga yema ore ga ãẽ̱xgacü rü norü ngü̃xẽẽruü̃gü namaxã nüxü̃ ixuxü̃, yerü yema ore rü Cori ya Tupanaarü mu nixĩ.

¹³ Rü yemaacü gumá norü taxre ga tauemacügu rü muxü̃ma ga duü̃xü̃gü Yerucharéü̃gu nangutaque̱xegü nax naxüchigagüãxü̃ca̱x ga yema peta ga paũ ga ngearü pu̱xẽẽruü̃ã́xü̃chiga.

¹⁴ Rü yema namaxã inaxügüxü̃ ga yema Üpetüchiga nixĩ nax nagu napogüexü̃ ga guxü̃ma ga yema tupananetagüarü ãmarearü guruü̃gü rü pumarate̱xearü guruü̃gü ga Yerucharéü̃wa yexmagüxü̃. Rü ñu̱xũchi Chedróü̃arü natüwa nayawoü̃.

¹⁵ Rü yexguma gumá norü taxre ga tauemacüarü 14 ga ngunexü̃wa nanguxgu rü nayama̱xgü ga yema carnéruxacü ga iyatüxü̃ ga Üpetüchigaarü petaca̱x ixĩxü̃. Rü muxü̃ma ga yema chacherdótegü rü Lebítanüxü̃ rü naxãnee yerü tama Tupanape̱xewa nügü nimexẽẽgü. Rü yemaca̱x Tupanape̱xewa nügü nimexẽẽgü rü Tupanapata ga taxü̃newa nanagagü ga yema naxü̃nagü ga Tupanaca̱x tá ínaguxü̃.

¹⁶ Rü yemawena ga nüma ga chacherdótegü rü namücügütücumüwa nixietanü yema Tupanaarü duü̃ ga Moiché iyanuxü̃ãcü. Rü yema Lebítanüxü̃ rü yema chacherdótegüna nanaxã ga gumá nagü ga yema naxü̃nagü ga nada̱i̱xü̃, rü ñu̱xũchi yema chacherdótegü rü Tupanaarü ãmarearü guruxü̃ namaxã namaxcuxétügü.

¹⁷ Rü yema duü̃xü̃gü ga yexma ngutaque̱xegüxü̃tanüwa rü nayexma ga muxü̃ma ga tama Tupanape̱xewa nügü imexẽẽgüxü̃. Rü yemaca̱x ga yema Lebítanüxü̃ rü yema duü̃xü̃güégagu nanadai ga yema carnérugü ga Üpetüchigaca̱x ixĩgüxü̃ nax yemaacü Tupanape̱xewa yamexẽẽgüxü̃ca̱x.

^18-19 Rü muxü̃ma ga Efraíü̃tanüxü̃, rü Manachétanüxü̃, rü Ichacátanüxü̃ rü Chaburóü̃tanüxü̃ rü nanangõ̱xgü ga yema Üpetüchigaarü õna, natürü tama Tupanape̱xewa nügü yamexẽẽgüãcüma nanangõ̱xgü. Rü yemaca̱x ga Echequía rü nayumüxẽ rü ñanagürü: —Pa Cori Pa Tupana ya Ngechaü̃wa̱xecüx, cuma rü tüxü̃́ nüxü̃ icurüngüma i tümaarü chixexü̃ ya yíxema aixcüma cuxü̃́ yaxõgüxe. Pa Corix i Ngẽma Duü̃xü̃güarü O̱xigüarü Tupanax, cuma nüxü̃ quixu nax tama namexü̃ nax texé nangṍxü̃ i ngẽma Üpetüchigaarü õna ega tama cupe̱xewa tügü timexẽẽgüxíragu. Natürü chanaxwa̱xe i nüxü̃́ nüxü̃ icurüngüma i ngẽma duü̃xü̃güarü guxchaxü̃ woo tama cuma nüxü̃ quixuxü̃ãcü nanangõ̱xgü i ngẽma õna —ñanagürü.

²⁰ Rü nüma ga Cori ya Tupana rü nüxü̃ naxĩnü ga yema Echequíaarü yumüxẽ rü yema duü̃xü̃güaxü̃́ nüxü̃ narüngüma ga yema naxügüxü̃.

²¹ Rü yemaacü ga yema Iraétanüxü̃ ga Yerucharéü̃wa yexmagüxü̃ rü 7 ga ngunexü̃ taxü̃ ga taãẽmaxã nanaxüchigagü ga yema paũ ga ngearü pu̱xẽẽruü̃ã́xü̃arü petachiga. Rü yema chacherdótegü rü Lebítanüxü̃ rü wüxichigü ga ngunexü̃gu norü wiyaegümaxã rü paxetaruxü̃ ga tagaxü̃maxã Cori ya Tupanaxü̃ nicua̱xüü̃gü.

²² Rü nüma ga Echequía rü yema Lebítanüxü̃na moxẽ naxã naxca̱x ga yema puracü ga mea norü ngúchaü̃maxã Cori ya Tupanaca̱x naxügüxü̃. Rü yema 7 ga ngunexü̃gu rü nanangõ̱xgü ga yema Üpetüchigaarü õna. Rü Tupanaca̱x ínanagu ga ãmaregü norü ngüxmüxẽẽruxü̃. Rü ñu̱xũchi nüxü̃ nicua̱xüü̃gü ya yimá Cori ya norü o̱xigüarü Tupana.

²³ Rü guxü̃ma ga yema duü̃xü̃gü rü nügümaxã nagu narüxĩnüe nax to ga 7 ga ngunexü̃ nüxü̃ nama̱xnetagüxü̃ ga yema peta. Rü yema rü poraãcü taãẽãcüma nanaxügü.

²⁴ Yerü nüma ga Yudáanearü ãẽ̱xgacü ga Echequía rü yema duü̃xü̃güna nanamugü ga 1,000 ga wocagü ga iyatüxü̃ rü 7,000 ga carnérugü ga iyatüxü̃. Rü yema ãẽ̱xgacüarü ngü̃xẽẽruü̃gü rü duü̃xü̃güna nanamugü ta ga 1,000 ga wocagü ga iyatüxü̃ rü 10,000 ga carnérugü ga iyatüxü̃. Rü muxü̃ma ga chacherdótegü rü Tupanape̱xewa nügü nimexẽẽgü.

²⁵ Rü guxü̃ma ga yema Yudáanecüã̱xgü ga duü̃xü̃gü rü nataãẽgü. Rü yexgumarüxü̃ ta nataãẽgü ga yema chacherdótegü, rü Lebítanüxü̃, rü guxü̃ma ga yema duü̃xü̃gü ga Iraéanewa ne ĩxü̃, rü ñu̱xũchi yema to ga nachixü̃anecüã̱xgü ga Iraéanewa ne ĩxü̃xü̃ rü yema to ga nachixü̃anecüã̱xgü ga Yudáanegu ãchiü̃güxü̃.

²⁶ Rü nataxüchi ga taãxẽ ga Yerucharéü̃wa, yerü yexguma Charomóü̃ ga Dabí nane Iraéanearü ãẽ̱xgacü yixĩxgucürüwa rü taguma yemaacü nanaxüchigagü ga yema peta ga Yerucharéü̃wa.

²⁷ Rü yemawena ga chacherdótegü rü Lebítanüxü̃ rü inachigü rü norü yumüxẽwa yema duü̃xü̃gümaxã mexü̃ naxuegu. Rü nüma ga Cori ya Tupana rü nüxü̃ naxĩnü ga yema norü yumüxẽ. Rü daxũguxü̃ i naanewa nangu i ngextá nüma ínangexmaxü̃wa.