Norü taxre ga to ga popera ga ãẽ̱xgacügüchiga ümatüxü̃ 17 - Tupanaarü Ore

Yudáanearü ãẽ̱xgacü nixĩ ga Yochapáx

¹ Rü Acháwena rü nane ga Yochapáx nixĩ ga ãẽ̱xgacü ixĩxü̃. Rü nüma ga Yochapáx rü nügü namexẽxẽ nax Iraéanearü ãẽ̱xgacümaxã nügü nada̱i̱xü̃ca̱x.

² Rü guxü̃nema ga Yudáanearü ĩanegü ga ípoxegugünegu nayanu ga churaragü. Rü ñu̱xũchi guxü̃ma ga Yudáanegu rü ta nayanu ga churaragü. Rü yexgumarüxü̃ ta nayanu ga churaragü nagu ga guma ĩanegü ga nanatü ga Achá puxü̃́ne ga Efraíü̃arü naanewa.

³ Rü nüma ga Cori ya Tupana rü Yochapáxü̃ narüngü̃xẽxẽ yerü norü o̱xi ga Dabícümagu mea nixũ. Rü tama yema tupananeta ga Baáchicüna̱xãgüxü̃ nicua̱xüxü̃.

⁴ Rü nüma rü nüxü̃ nicua̱xüxü̃ ga nanatüarü Tupana rü naga naxĩnü ga norü mugü. Rü tama naxca̱x nadauxü̃tae ga yema nacüma ga chixexü̃ ga Iraéanecüã̱x nagu ĩxü̃.

⁵ Rü yemaca̱x ga Cori ya Tupana rü Yochapáme̱xẽwa nanayexmaxẽxẽ ga Yudáane nax mea namaxã inacuáxü̃ca̱x. Rü guxü̃ma ga Yudáanecüã̱xgü ga duü̃xü̃gü rü Yochapána nanaxãgü ga norü ãmaregü. Rü yemaca̱x ga nüma ga Yochapáx rü namuarü yemaxü̃ã̱xü̃chi rü poraãcü natachiga.

⁶ Rü taãẽãcü nanayaxu ga Tupanaarü ucu̱xẽgü rü mea nayanguxẽxẽ. Rü nagu napogüe ga yema tupananetagüarü ngutaque̱xechicagü ga Yudáanearü ma̱xpǘnegüwa yexmagüxü̃. Rü nagu napogüe ga yema tupananeta ga Acheráchicüna̱xãgü.

⁷ Rü yexguma marü tomaepü̱x ga taunecü ãẽ̱xgacü yixĩxgu ga Yochapáx, rü Yudáanearü ĩanegüwa nanamugü ga ngu̱xẽẽtaeruü̃gü ga Ben-aí, rü Adía, rü Chacaría, rü Natanaé, rü Micaía nax duü̃xü̃güxü̃ nangúexẽẽxü̃ca̱x ga Tupanaarü mugü.

⁸ Rü ínayaxümücügü ga yema Lebítanüxü̃ ga Chemaía, rü Netanía, rü Chebadía, rü Achaé, rü Chemiramóx, rü Yonatáü̃, rü Adonía, rü Tobía, rü Tobadonía. Rü ínayaxümücügü ta ga chacherdótegü ga Erichamá rü Yoráü̃.

⁹ Rü yemagü nixĩ ga ãẽ̱xgacü ga Yochapáx yéma mugüxü̃ namaxã ga Tupanaarü mugüpane nax duü̃xü̃gü ga Yudáanecüã̱xgüxü̃ nangúexẽẽgüxü̃ca̱x. Rü nüma ga yema ngu̱xẽẽtaeruü̃gü rü yemaacü nanaxügü. Rü nagu nixĩãgütanü ga guxü̃nema ga Yudáanearü ĩanegü, rü nayangúexẽẽtanü ga yema duü̃xü̃gü.

¹⁰ Rü norü ãẽ̱xgacügü ga yema togü ga nachixü̃anegü ga nüxna ngaicamagüxü̃ rü Cori ya Tupanaxü̃ namuü̃e. Rü yemaca̱x taxuxü̃ma ga yema ãẽ̱xgacügü rü Yochapámaxã nügü nadaixchaü̃.

¹¹ Rü woo nümaxü̃ ga Firitéutanüxü̃ rü Yochapáxü̃tawa nanana ga norü ãmaregü, rü nüxü̃́ nanaxütanügü ga yema diẽru ga Yochapáx ueguxü̃. Rü yexgumarüxü̃ ta ga Arábiaanecüã̱x rü Yochapána nanamugü ga 7,700 ga carnérugü, rü yexgumaepü̱x ta ga chíbugü.

¹² Rü yemaacü ga Yochapáx rü yexeraãcü niporachigü. Rü Yudáanewa nanaxü ga ĩanegü ga mea ípoxegugüne rü ĩanegü ga nawemügü nagu nanuxü̃ne.

¹³ Rü nüxü̃́ nayexma ta ga muxü̃ma ga norü yemaxü̃gü rü õnagü ga Yudáanearü ĩanegüwa. Rü Yerucharéü̃wa nüxü̃́ nayexma ta ga norü churaragü ga tama muü̃wa̱xegüxü̃.

¹⁴ Rü yema churaragüerugü ga natanüxü̃maxã icua̱xgüxü̃ rü ñaagü nixĩ: Rü Yudátanüxü̃wa rü Axná nixĩ. Rü nüma rü namaxã inacua̱x ga 300,000 ga churaragü.

¹⁵ Rü churaragüeru ga Yoanáü̃ rü namaxã inacua̱x ga 280,000 ga churaragü.

¹⁶ Rü ñu̱xũchi Amachía ga Chicrí nane ga norü ngúchaü̃maxã Tupanaaxü̃́ puracücü rü namaxã inacua̱x ga 200,000 ga churaragü.

¹⁷ Rü Bẽyamíü̃tanüxü̃wa rü Eriadá ga tama muü̃wa̱xexü̃ nixĩ ga namaxã inacuáxü̃ ga 200,000 ga churaragü. Rü yema churaragü rü würamaxã nixãxne rü nüxü̃́ nayexma ga norü poxü̃ruü̃gü.

¹⁸ Rü nawena naxü ga Yochabá. Rü nüma rü namaxã inacua̱x ga 180,000 ga churaragü ga daica̱x ímegümarexü̃.

¹⁹ Rü guxü̃ma ga yema churaragü rü ãẽ̱xgacü ga Yochabáme̱xẽwa nayexmagü. Rü naétü nayexma ga yema churaragü ga guxü̃ ga Yudáanewa namugüxü̃ nax nüxna nadaugüxü̃ca̱x ga guma ĩanegü ga ípoxegugüne.