YUTA 1 - Echilaano Chiyayaya

Yuta álamusa ebemeresi

¹ Nyono Yuta, nyìri muanda wa Yesu Kirisito, kanji nyìri munyakabo Yakobo. Nábǎnjikira mwabo mu Ongo Tata álondwere mira, kanji atúla àbasimire, na Yesu Kirisito énde ábalanga.

² Ongo éndaa ábafira bonjo, na kuberesa ebôlo ne'nzii. Endaa áberesa ebi byoshi busese.

Ebuchinjibusi bwe'bakangirisi be'bisha

³ Banyaketu basiirwa, mango nabáa náira emisi ye'kubǎnjikira era luulu se'myasi ye'bununusi bwa tutúla tuhángire tuboshi, nera kulola kwa byěmire nyìbaanjikire kwa kubasesa emichima chasiya mulánge ebwemeresi bwenyu. Obu bwemeresi, Ongo êresaa'bo ebandu bai loshi.

⁴ Nàbaanjikirire bacha, bushi kùli bandu babi, ba bàchifurerekire mwa kachi-kachi kenyu. Abu bandu bénjire báorombya emyasi era ìhambere era luulu se'bonjo bwa Ongo, chasiya babóne enjira ye'kunde báira elusingi. Mwa kuira bacha, bénjire bánana Yesu Kirisito, i'utúla Mukulu-kulu wetu yeine kanji Enawetu. Kutengera mira, eMaanjiko Mabuya-buya mábaa mátechire era luulu se'buchinjibusi bwa abu bandu bakábona.

⁵ Chiro angaba mbu mwera mwìshi kubuya-buya ene myasi yoshi, náhonda nyìbakengese kute kwa Enawetu ánunulaa eBaisiraeli loshi, kutenga mwa chio che'Misiri. Si bábananaa kumwemerera, era kubasikya.

⁶ Anabe no'mwa bamalaika*, bauma mubo bánanaa kulanga etunda lya Ongo êresa'bo, bera kutenga mwa bisiki byabo. Bushi no'ku, Ongo era kubamina mwa mareure ne'kûma'bo mwa musimya, balínjirire mwe'lusuku lukulu lwe'buchinjibusi.

⁷ Mukéngeraa na besha mwa musi we'Sotomo, ne'we'Komora, na besha mwa misi era yábaa ibásungwire. Nabo bábaa bénjire bánachitola nga'bu bamalaika*. Bera kunde báira myasi ya honyi mwákuira elusingi ebalume kwa balume. Bushi no'ku, bera bálibukira mwa muliro we'suku ne'mango. Rero, echera chíndaa chákangirisa ebandu boshi.

⁸ Abu bandu babi, nabo ku bénjire bánachitola bacha. Ebiroto bya bénjire bálota, byénjire byátuma bǎka esinga kwa mibiri yabo. Bénjire bákena ebuashi bwa Ongo, na kunde bákamba ebamalaika* be'bulangare.

⁹ Anabe na Mikaeri, i'mukulu-kulu we'bamalaika*, mango ábanganaa na Wamusimu bushi ne'chirunda cha Musa, átaereresaa ámukamba mwa kumuchinjibusa. Si ánamuburaa oshâo mbu: «Enawetu yeine akúkaliiraa!»

¹⁰ Si abu bandu babi, bénjire bákamba emyasi era bàteshi. Anabe ne'myasi era bèshi, banáishi nga nyama so'mwe'rungu, sa sìtatusa bwenge. Rero echera, chi chénjire chátuma básika.

¹¹ Abu bandu bàli bânya, bushi emyanya ya Kaini ibàkulikire. Kanji bushi ne'kuhonda ebikulo, bêngirire mwa mabi ma Balama aíraa. Rero básikire bushi ne'kutatunda Ongo, ngo'kwa Kora nai átamutundaa.

¹² Abu bandu bénde báreta ekafango ala mwálira ebiryo byenyu mwa buuma. Bénde bálya binene na kwêuta busese busira honyi, bàtanalaa kwa banji bandu. Bàli nga lumbumbu lwa lwêkibwa ne'chusi, si lùtatosa mvula isibya. Kanji bàli nga michi era ìteka bifuma, chiro angaba mbu echianyiro che'kushebula chaíkire. Bàli nga michi era yáshungulibwe mira na ya chìfira.

¹³ Kanji bàli nga mulaba munene wo'kwa nyanja. Bénde báfubula emyasi yabo ye'honyi ngo'kwa nyanja yénde yáuma emifumba ye'mulaba kwa musike. Kanji bàli nga ngununu sa sátala-tala. Rero, Ongo ábikírire'bo mira echisiki mwa musimya munene esuku ne'mango.

¹⁴ Enoki, hokulu wetu wa kalinda kutengera ku Atamu, ábaa árebire mira era luulu sabo mbu: «Mǔmvaa! Enawetu akábaha na biumbi na biumbi bye'bamalaika* bai babuya-buya,

¹⁵ chasiya áye kuchinjibusa ebandu boshi. Akáchinjibusa ebakosi be'mabi boshi kwa mabi ma bákolaa mwa kutatunda Ongo. Kanji akáchinjibusa'bo bushi ne'myasi yoshi ibi era ìkaliire, era béndee báteta era luulu sai.»

¹⁶ Esuku soshi, abu bandu bàtatusa lumoo, kuchǎnya ku bénde bánachǎnya bushi bàtamoera kwa bàli. Bénde bákulikira emyasi yabo ibi ye'buhuma-huma. Bénde báteta myasi ya kúchitonga, na kulokeresa ebunu era muhondo se'bandu chasiya babákule kwe'kandu.

Ekusimika mwa bwemeresi

¹⁷ Si mwabo banyaketu basiirwa, muténdaa mwébirira emyasi era ndumwa* sa Enawetu Yesu Kirisito sábaburaa mira.

¹⁸ Sábaburaa mbu: «Mwa suku se'businda, kukaulukira bandu ba bakénde ba bàshekera na kunde bánana kutunda Ongo, mwa kukulikira emyasi yabo ibi ye'buhuma-huma.»

¹⁹ Abola, bu bénde bátuma ebemeresi báberekana'mo. Kanji bénde bákoresibwa ne'myasi ye'mubiri, si bàtatusa eMuchima wa Ongo.

²⁰ Si mwabo banyaketu basiirwa, musímikaa busese mwa bwemeresi bwenyu bubuya-buya. Mango mwéma Ongo, mundaa mwáreka eMuchima Mubuya-buya énde ábaasa.

²¹ Emibere yenyu ibáa ya bandu ba bèshi kwa Ongo àbasimire. Bíndaa byába bacha, mwa kulinjirira Enawetu Yesu Kirisito i'ùngabêresa ekalamo ke'suku ne'mango, kurengera ebonjo bwai.

²² Mundaa mwáata muchima wa bonjo kwa'ba bachíri báhungwa-hungwa,

²³ mu banúnule baténge mwa muliro. Ebanji nabo, mundaa mwábafira bonjo, si muchilángaa kubo. Mùtaereresaa mwáuma no'kwa njimba sabo sa bakábire kwe'singa kurengera emyasi yabo ibi ye'buhuma-huma.

Ongo atóngwe

^24-25 Ongo atóngwe bushi iwátununulaa kurengera Enawetu Yesu Kirisito! Yeine éndaa ábalanga mungesha kwêngirira mwa mabi. Endaa ábemanza na lumoo lunene era muhondo sai mwa bulangere busira chibi chisibya. Endaa átongibwa na kwêresibwa etunda, ne'misi, kutengera mira, na lwarero, ne'suku ne'mango. Bibe bacha!