Matayo 1 - Echilaano Chiyayaya

Elubuto lwa Kirisito áshokaa'mo

¹ Yesu Kirisito, elubuto lwa áshokaa'mo lu'loluno: yeine ábaa wo'mwa lubuto lwa mwami Tauti. Tauti nai, ábaa wo'mwa lubuto lwa Aburahamu.

² Aburahamu ábutaa Isaka. Na Isaka era kubuta Yakobo. Na Yakobo era kubuta Yuta na banyakabo.

³ Na Yuta era kubuta Peresi na Sera ku'Tamari. Na Peresi era kubuta Hesironi. Na Hesironi era kubuta Aramu.

⁴ Na Aramu era kubuta Aminatabu. Na Aminatabu era kubuta Nasoni. Na Nasoni era kubuta Salumoni.

⁵ Na Salumoni era kubuta Bowasi ku'Rahabu. Na Bowasi era kubuta Obeti ku'Ruta. Na Obeti era kubuta Yese.

⁶ Na Yese era kubuta mwami Tauti. Na Tauti era kubuta Solomono ku'mukasi muuma, ola wábaa muka Uriya.

⁷ Na Solomono era kubuta Rehobowamu. Na Rehobowamu era kubuta Abiya. Na Abiya era kubuta Asa.

⁸ Na Asa era kubuta Yosafati. Na Yosafati era kubuta Yoramu. Na Yoramu era kubuta Usiya.

⁹ Na Usiya era kubuta Yotamu. Na Yotamu era kubuta Ahasi. Na Ahasi era kubuta Esekiya.

¹⁰ Na Esekiya era kubuta Manasi. Na Manasi era kubuta Amoni. Na Amoni era kubuta Yosiya.

¹¹ Na Yosiya era kubuta Yekoniya na banyakabo mango eBaisiraeli básimbibwaa mwa bita, na kwêkibwa mwa chio che'Babiloni.

¹² Na mango bábaa bera bekíbwaa'yi, Yekoniya, era kubuta Salatiyeri. Na Salatiyeri era kubuta Sorobabeli.

¹³ Na Sorobabeli era kubuta Abihuti. Na Abihuti era kubuta Eliyakimu. Na Eliyakimu era kubuta Asori.

¹⁴ Na Asori era kubuta Satoke. Na Satoke era kubuta Akimu. Na Akimu era kubuta Elihuti.

¹⁵ Na Elihuti era kubuta Eliyaseri. Na Eliyaseri era kubuta Matani. Na Matani era kubuta Yakobo.

¹⁶ Na Yakobo era kubuta Yosefu. Oyu Yosefu, iwábaa eba wa Mariya. Na Mariya iwábutaa Yesu ola wěrikirwe mbu i'Kirisito*.

¹⁷ Rero, kutengera ku Aburahamu kuikira'ku mwami Tauti, kwábaa nyibuto ekumi ne'ne. Na kutengera ku'Tauti kuikira mango eBaisiraeli bêkibwaa eBabiloni, kwábaa sinji nyibuto ekumi ne'ne. Na kutengera kwa kwêkibwa bêkibwaa eBabiloni, kuikira kwa kubutwa kwa Kirisito*, kwáhubaa kuba sinji nyibuto ekumi ne'ne.

Ekubutwa kwa Yesu Kirisito

¹⁸ Ekubutwa kwa Yesu Kirisito, bacha ku'kwábaa: Mariya i'nyina ábaa áhambalirwa na Yosefu. Na mango Yosefu ábaa àtasa kumuísa, Mariya era kulorekana'ko kwa éte bukure. Obu bukure, êkaa'bo kurengera ebuashi bwe'Muchima Mubuya-buya.

¹⁹ Yosefu iwábaa wámuhambalira, ábaa mundu mubuya era muhondo sa Ongo, na atásimaa mbu ěchise Mariya honyi. Bushi no'ku, era kuhonda àmureke kwa bubisho-bisho.

²⁰ Ábere Yosefu anáchiri áanyisa kwe'i myasi, malaika* muuma wa Enawetu era kumupamukira mwa biroto. Era kumubura mbu: «Yosefu, Mwenyi Tauti! Ùtobaa kuisa Mariya, bushi ebukure bwéte, àbwêkire kurengera ebuashi bwe'Muchima Mubuya-buya.

²¹ Angábuta mwana wa busana. Oyu mwana, ungámwěrika mbu i'Yesu bushi i'ukánunula ebandu bai mwa bibi byabo.»

²² Ebi byoshi byábaa bacha, chasiya echinwa chibérere cha Enawetu ábaa átechire mira kurengera emurebi* wai mbu:

²³ «Mǔmvaa! Emunyere ola ùtafuraa kumenya mulume àngêka bukure. Na mwo'bu bukure, angábuta mwana wa busana! No'yu mwana, bangámwěrika esina lya Emanuweri.» Emanuweri, kukuteta mbu: «Ongo àli ala'uma netu.»

²⁴ Ábere Yosefu ásuka, era kunáira ngo'kwa malaika* wa Enawetu ánamuburaa, era kunaísa mukai.

²⁵ Si atáonjiraa nai kuikira mango Mariya ábutaa oyu mwana we'busana. No'yu mwana, Yosefu era kunámwěrika esina lya Yesu.