Mariko 1 - Echilaano Chiyayaya

Yowani Mubatisayi ákunganyisisa Yesu enjira

¹ Anola we'Mwasi Mubuya-buya wa Yesu Kirisito, Mwenyi Ongo àtangirire

² ngo'kwa bitúla byǎnjikirwe mwa chitabo cha murebi* Isaya mbu: «Nyono nyi Ongo, nyingátuma endumwa yanyi ìkuhondorere, chasiya ikukúnganyisise enjira.»

³ «Mundu muuma àli mwa buyeye* énjire áteta na murenge munene mbu: ‹Mukunganyisisaa Enawetu enjira! Mulámbaatanyaa ala angárenga!›»

⁴ Rero, Yowani Mubatisayi era kuulukira mwa buyeye* bwe'Yuteya. Ábaa énjire áhubanganyisa ebandu mbu babíndukaa baténge mwa bibi byabo, babátisibwe, na Ongo angábabalira'bo.

⁵ Besha mwa chio che'Yuteya na besha mwa musi we'Yerusalemu boshi bera kunde báikiranga Yowani. Abu bandu, bábaa bénjire báchiaya changanama kwa bibi byabo, nai era kunde ábatisa'bo mwa lwishi lwe'Yorotani.

⁶ Yowani éndee émbala njimba sa silánjirwe mwa boya bwa nyama nguma mbu i'ngamiya. Kanji éndee émbala na mukaba wa luu mwa binji. Ne'biryo byai, byábaa emiuku ne'buki.

⁷ Ábaa énjire áhubanganyisa ebandu mbu: «Ola ùbahire era nyuma sanyi, anyírenzise ebuashi, chiro ndéte kwa nyìri kwa kùngatuma nénamirira era muhondo sai, chasiya nyibóole emirisi ye'birato byai.

⁸ Nyono nénjire nábabatisa mwa meshi, si yeke angénde ábabatisa kwa Muchima Mubuya-buya.»

Ekubatisibwa kwa Yesu ne'kuérekibwa kwai

⁹ Mwe'si suku, Yesu era kutenga eNasareti, mwa chio che'Kalilaya, Yowani era kumubatisa mwa lwishi lwe'Yorotani.

¹⁰ Ábere Yesu era átenga mwa meshi, unao-unao era kulola kwa nguba yábookala, ne'Muchima Mubuya-buya era kumwandáalira nga chiruka.

¹¹ Mwe'i nguba mwera kûmvikana murenge muuma ola wábaa wáteta mbu: «Woyo, u'Muala wanyi musiirwa, u'utúla unyísimise!»

¹² Unao-unao, eMuchima Mubuya-buya era kwêka Yesu mwa buyeye*.

¹³ Mwo'bu buyeye*, era kumala'mo suku mane áerekibwa na Wamusimu. Era kubera'mo ala'uma ne'nyama so'mwerungu, chasinda ebamalaika* bera kuika kumuasa.

Yesu âmaala ebanafunzi babere-bere

¹⁴ Era nyuma sa Yowani kúumwaa mwa buroko, Yesu era kuya eKalilaya. Ábaa énjire áhubanganyisa ebandu eMwasi Mubuya-buya wa Ongo.

¹⁵ Era kunde ábabura mbu: «Ebihangi byaíkire mira, ne'Bwami bwa Ongo* bùli ofu! Bushi no'ku, mùchiayaa kwa bibi byenyu, mwěmerere eMwasi Mubuya-buya mwa michima yenyu!»

¹⁶ Mango Yesu ábaa árenga kwa musike se'nyanja ye'Kalilaya, era kulola ku balobi babiri, Simoni na munyakabo mbu'i Andereya. Bábaa bêna ekasira mwa nyanja.

¹⁷ Yesu era kubabura mbu: «Munyíkulikiraa, nyingábaira kuba balobi ba bandu.»

¹⁸ Unao-unao, bera kureka twa tusira twabo na bámukulikira.

¹⁹ Ábere Yesu era àchifundaa era muhondo hicha, era kulola ku Yakobo na munyakabo mbu i'Yowani, benyi Sebetayo. Abu babiri, bábaa bàli mwa bwato bákunganya etusira twabo.

²⁰ Unao-unao, Yesu era kubamaala. Bera kureka eshe'wabo Sebetayo mwo'bu bwato ala'uma ne'bakosi bai, na bákukulikira Yesu.

Yesu âmbula ebihwasi kwa mundu

²¹ Era nyuma se'bi, Yesu ne'banafunzi* bai bera kuya mwa musi we'Kaperinaumu. Mango elusuku lwe'Sabato* lwáikaa, Yesu era kwêngirira mwa bushenge bwe'Bayuta* na átangirisa ákangirisa ebandu.

²² Ei myasi yai, yera kushishasa busese ebandu ba bábaa bámomvirisa, bushi yeke aténdee ábakangirisa nge'bakangirisi babo be'mwaso*, si éndee ábakangirisa nga mundu ola wète buashi.

²³ Mwo'bu bushenge*, mwábaa mùli mundu muuma ola wábaa usímbirwe ne'bihwasi. Unao-unao, oyu mundu era kúuma emurenge mbu:

²⁴ «Eu Yesu we'Nasareti, chi wátuhonda'ko? Eri wàbahire kutusikya? Nyikwîshi kubuya! Woyo u'Mubuya-buya ola Ongo átumire!»

²⁵ Yesu era kukaliira echi chihwasi busese mbu: «Sìraa, unátenge kwo'no mundu!»

²⁶ Cha chihwasi, kuna kukukumanya ola mundu busese na chámutenga'ko cháenda chálakanga na murenge munene.

²⁷ Ebandu boshi kuna kutungwa na bátangirisa bábusanya mbu: «Ewashe, bi byera bichiye bine? Kubinali, ene myasi iyayaya Yesu énjire ákangirisa ebandu, yéte buashi! Anabe ne'bihwasi énjire ánambula'bi, nabi byánamutunda!»

²⁸ Bushi no'ku, engulu ya Yesu, yera kwire yáhandabana mwa chio choshi che'Kalilaya.

Yesu álamya balwala banene

²⁹ Era nyuma se'bi, Yesu era kutenga mwo'bu bushenge* àli na Yakobo na Yowani. Bera kwîngirira mwa nyumba ya Simoni na Andereya.

³⁰ Yesu áikire'mo, bera kumubura mbu nasala wa Simoni àli kwa njingo, bushi ehushira yábaa yàmusimbire.

³¹ Yesu kukwera kuchifunda ofu nai, era kumusímbira kwa mino na ámwemanza. Unao-unao, era hushira kuna kulama. Wamukasi, era kutangirisa ábatekera ebiryo.

³² Ábere lwera loolo-olo, esuba lyàchirowire mira, ebandu bera kureteranga Yesu ebalwala boshi, na ba bábaa basímbirwe ne'bihwasi.

³³ Besha mwo'yu musi boshi, bera kuya kuchilunda kwa chiso che'i nyumba.

³⁴ Yesu era kulamya bandu banene ba bábaa bète chira bulwala. Era kwâmbula na bihwasi binene, kanji chiro ákêmerera mbu bíndaa byáteta bushi byábaa bitúla bimwîshi.

Yesu ákangirisa ebandu eKalilaya

³⁵ Ábere mwe'i mishangya lumbuli-mbuli, Yesu era kusuka. Era kutenga mwa nyumba na áya kwéma Ongo mu chisiki chai yeine.

³⁶ Chasinda, Simoni na balikabo bera kuya kumuhónda.

³⁷ Bámulolire'ko, bera kumubura mbu: «eWaliya! Ebandu boshi bákuhonda!»

³⁸ Si nai mbu: «Tuyáa mwa inji misi era iri ofu, chasiya nyihúbanganyise besha'yi eChinwa cha Ongo, bushi echera chi chátumaa nábaha.»

³⁹ Bushi no'ku, Yesu era kwire áya kusungula mwe'chi chio choshi che'Kalilaya, era kunde ákangirisa ebandu mwa mashenge me'Bayuta* na kunde âmbula ebihwasi.

Yesu álamya emubenzi-benzi

⁴⁰ Lusuku luuma, mubenzi-benzi muuma áikiraa Yesu. Oyu mubenzi-benzi, era kukoma emafi era muhondo sa Yesu na ámwěma mbu: «Akaba uhónjire, ùnganyilamya!»

⁴¹ Yesu era kumufira bonjo. Era kunánula emino, era kumuuma'ko na ámubura mbu: «Náhonda uláme!»

⁴² Unao-unao bya bibenzi, kuna kulama.

⁴³ Yesu era kumubura mbu aéndaa. Era kumuchichika mbu:

⁴⁴ «ùtaburaa mundu asibya kwe'ne'myasi! Si uyáa kuchilosa era mwa kuhanyi*. Chasinda, wánâna emitulo* ye'kulosa kwa walámire mira, ngo'kwa emwaso wa Musa atúla àtechire.»

⁴⁵ Si oyu mundu mango ábaa era àchiúmaa, era kutangirisa ábalikisa ei myasi mwa bisiki byoshi. Bushi no'ku, Yesu atáchialaa kwêngirira changanama mu musi murebe. Era kunde ábera bure ne'bandu mu chisiki chai yeine. Si chiro bacha, ebandu bera kunde bánamuikiranga bátengera mwa bisiki byoshi.