Luka 8 - Echilaano Chiyayaya

Ebakasi ba béndee báasa Yesu mwa mulimo wai

¹ Era nyuma se'bi, Yesu era kusungula mwa misi inenene no'mwa tumbara, áenda áhubanganya na kubalira ebandu eMwasi Mubuya-buya we'Bwami bwa Ongo*. Ábaa àli ala'uma ne'ndumwa* sai ekumi ne'biri.

² Kanji ábaa àli na bakasi bauma ba âmbulaa kwe'bihwasi, na kulamya'bo emalwala. Mwa'bu bakasi mwábaa mùli: Mariya, ola béndee bérika mbu we'Makatala. Oyu Mariya, Yesu ámwambulaa ku bihwasi birinda.

³ Na Shani, muka Chusa. Oyu Chusa iwábaa wìmangirire ebikulo bya Heroti. Mwábaa mùli na Susana, na banji bakasi banene. Abu bakasi, bu béndee bâna kwa bikulo byabo kwa kuasa Yesu ne'ndumwa* sai.

Emuanyi we'muinzi

⁴ Bandu banene béndee bátengera mu chira musi, báya kuchilunda ala Yesu àli. Yesu era kubaishira ono muanyi mbu:

⁵ «Muinzi muuma áyaa kuinga mbuto mwe'hwa lyai. Ábere era áinga ei mbuto, njimi siuma sera kutowera era musike se'njira. Ebandu bera kulibatanga'si, ne'milonge yera kulya'si.

⁶ Esinji sera kutowera kwa makoi. Ábere saméra, sera kûma bushi sáinaa emeshi mwa chitaka.

⁷ Esinji sera kutowera mwa mihoi-hoi. Ei mihoi-hoi yera kumerera ala'uma nasi, na yáfundeeresa'si.

⁸ Esinji njimi seke sera kutowera mwa butaka bwa bukomire. Emyaka yera kukula na yêka emifumba. Chira mufumba era kwâna njimi eyana-eyana.» Mango Yesu ábaa era àmalaa kubabura bacha, era kuteta mbu: «Ola wéte matwi me'kûmva, ǒmvaa!»

⁹ Ebanafunzi* bai bera kumubusa mbu kute oyu muanyi àtechire.

¹⁰ Yesu era kubǎkula mbu: «Mwabo mwêresibwe emuisha we'kumenya emyasi ìbishirwe yo'mwa Bwami bwa Ongo*. Si ebanji beke běmire nyinde nábura'bo mwa mianyi, chasiya ‹bénde bátumbukisa, si bàtalolaa. Bénde bômva, si bàtamenyereraa.›»

Yesu áanulula emuanyi we'mwinzi

¹¹ Kanji Yesu era kuteta mbu: «Bacha kwo'yu muanyi àtechire: Embuto chi Chinwa cha Ongo.

¹² Enjimi sa sátoweraa mwa njira, sihúhanyisibwe ne'bandu ba bénde bômva echi Chinwa cha Ongo. Chasinda, Wamusimu ánaika kukula'chi mwa michima yabo, bangesha kwêmerera na bánunulibwa.

¹³ Ne'njimi sa sátoweraa kwa makoi, sihúhanyisibwe ne'bandu ba bénde bômva eChinwa cha Ongo na kwêmerera'chi na lumoo. Si echi Chinwa, chìtasimika mwa michima yabo. Bénde bêmerera'chi ku bihangi bieke oshâo, na mango emiereko yénde yábaikira bánareka'chi.

¹⁴ Ne'sinji njimi sa sátoweraa mwa mihoi-hoi, sihúhanyisibwe ne'bandu ba bénde bômva eChinwa cha Ongo. Si emianyo, ne'buare ne'kusima emyasi yo'muno butala, byénde byáfunderesa echi Chinwa mwa michima yabo. Bushi no'ku, bàteka bifuma byerire.

¹⁵ Ne'njimi sa sátoweraa mwa butaka bwa bukomire, seke sihúhanyisibwe ne'bandu ba bénde bômva eChinwa cha Ongo na muchima mubuya kanji ola ùtungenene. Abola bu bénde bálanga echi Chinwa na bushibirisi kuikira bánêka ebifuma.»

Emuanyi we'tara

¹⁶ Kanji Yesu era kuteta mbu: «Kutáli mundu ola ùngakoresa etara na álifunyikira ne'chitonga, nesi ánabika'li mwa buhanjingo. Si énde ábika'li kwa kakondo, chasiya ba bêngirira mwa nyumba balóle kwa bulangare.

¹⁷ Chira kandu ka kàbishirwe kakábihulibwa changanama. Na chira kandu ka káiribwa mwa bubisho-bisho, kakámenyeka changanama.

¹⁸ Bushi no'ku, muchilanga-langaa kwa myasi era mwénjire mômva! Bushi emundu ola wète kandu, iwénde wêresibwa ne'kanji. Si ola utéte kandu, angányaibwa na'ka achírembire kuata.»

Banyakabo Yesu na nyina

¹⁹ Lusuku luuma, banyakabo Yesu na nyina báyaa kumutangula. Si chiro bákaala kuikirira ofu nai, bushi ne'luamba lwe'bandu.

²⁰ Ebandu bera kubura Yesu mbu: «Nyoko na banyakenyu bèmenze era butala, báhonda bàkulole'ko.»

²¹ Si Yesu era kubǎkula mbu: «Mama na banyaketu, bàli ba bénde bômva eChinwa cha Ongo ne'kuira kwa chìtechire.»

Yesu ábanda kwa mulaba

²² Lusuku luuma, Yesu érukiraa mwa bwato ala'uma ne'banafunzi* bai. Era kubabura mbu: «Tuhábukiraa kwa unji mushirirya we'nyanja.» Bera kunaénda.

²³ Ábere bera báruwa ebwato, Yesu era kuonjira. Unao-unao, emulaba era kuchihuta kwa nyanja. Emeshi mera kutangirisa máya mwa bwato, bera kuba mu bisibu bya kusika.

²⁴ Bera kuya kususa Yesu na bámubura mbu: «Mukangirisi, Mukangirisi, twáfa!» Yesu era kusuka na ákaliira busese echusi ne'mulaba na byáorera.

²⁵ Chasinjire, Yesu era kubusa ebanafunzi* bai mbu: «Ngai'u ebwemeresi bwenyu bùli?» Bera kwôbaa na kutungwa busese. Bera kutangirisa bábusanya mbu: «Mundu muchiye ono? Anabe ne'mbusi ne'mulaba, ábikaliira na byáira ngo'kwa àtechire!»

Yesu âmbula ebihwasi kwa mundu

²⁶ Era nyuma se'bi, Yesu ne'banafunzi* bai bera kuhabuka enyanja, na básiika ebwato mwa chio che'Bakerasi, mashirirya ne'chio che'Kalilaya.

²⁷ Ábere Yesu átenga mwa bwato, mundu muuma wa mwo'yu musi, era kubaha ofu nai. Oyu mundu, ábaa asímbirwe na bihwasi. Ku suku sinene, ábaa àtachěmbala luchimba, ábaa àtachitula mu nyumba, si kwa shinda ku ábaa era anáchitulira.

²⁸ Álolire ku Yesu, era kulakanga na áchihunda mwa maulu mai. Era kuteta na murenge munene mbu: «Yesu, Mwenyi Ongo, ola utúla era luulu sa byoshi, chiye chi wányihonda'ko? Nákwěma ùtanyiribusaa!»

²⁹ Átetaa bacha, bushi Yesu ábaa àbwirire echi chihwasi mbu chiténgaa kwo'yu mundu. Echi chihwasi chéndee cháshiba chámunyianga chira mango. Kanji chiro àngaba mbu ebandu béndee bámumina ne'mareure ala'uma ne'byuma chasiya àtongolokaa, si éndee ánakonolanga'bi. Echi chihwasi chéndee chátuma áya era ìtali bandu.

³⁰ Yesu era kumubusa mbu: «Esina lyao únde?» Nai mbu: «Nyono, nyi Tùli bengi.» Átetaa bacha bushi ábaa asímbirwe na bihwasi binene.

³¹ Ebi bihwasi byera kwéma Yesu mbu àtabyâmbuliraa mwa fumbi irerere ye'kusimu.

³² Aola ábaa àli buso bunene bwa ngulube, sa sábaa sákerera kwa katulungu. Ebi bihwasi byera kwéma Yesu busese mbu àbyêresaa eloso bíye mwe'si ngulube. Nai era kubyeresa'lo.

³³ Bya bihwasi byera kwire byátenga kwo'la mundu na byáya mwe'sa ngulube. Bwa buso boshi bwe'sa ngulube bwera kutenga kwa katulungu malibita sândaalira era nyanja ìri, kuna kutoeranga'mo na sásika.

³⁴ Ebangere be'si ngulube bálolire bacha, bera kulibichira mwa musi no'mwa tumbara báya kubalira ebandu kwo'yu mwasi.

³⁵ Ebandu bera kunaya kulola kwe'bya byàbere. Báikire ala Yesu ábaa àli, bera kubuana ola mundu ebihwasi byátengaa'ko, ékese mwa maulu ma Yesu. Ábaa era ěmbese enjimba, kanji era àli muuma-uma. Abu bandu, bera kwôbaa.

³⁶ Ebandu ba báchilóreraa kwa bya byàbere, bera kwire bábalikisisa ebanji kute kwo'yu mundu wábaa usímbirwe ne'bihwasi alámisibwaa.

³⁷ Besha mwa chio che'Kerasi boshi bera kwôbaa busese. Bushi no'ku, bera kubura Yesu mbu abátengeraa mwa chio chabo. Yesu era kwire érukira mwa bwato, ahúbe era àtengeraa.

³⁸ Ola mundu ebihwasi byátengaa'ko, era kwéma Yesu busese mbu àendaa nai. Si Yesu era kumuálusa ne'kumubura mbu:

³⁹ «Hùbaa kwa wao, ùbalikisise ebandu, byoshi bya Ongo àkuiririre.» Oyu mundu era kunaya mwa musi woshi áenda ábalikisisa ebandu, byoshi bya Yesu àmuiriraa.

Yesu ômola mwali wa Yairo álamya na mukasi muuma

⁴⁰ Mango Yesu ábaa era àfulukaa, bandu banene bera kuya kumuhúukasa, bushi boshi bábaa bámulinjira.

⁴¹ Mwe'chi chihangi, mukulu-kulu muuma we'Bushenge bwe'Bayuta* mbu i'Yairo, era kuika ne'kukoma emafi era muhondo se'bihando bya Yesu. Era kwéma Yesu busese mbu ěngiriraa mwa mwai,

⁴² bushi mwali wai ábaa àli mareka-reka. Ábaa mwana wa chihwa, wa myaka ìngaika ku ekumi ne'biri. Mango Yesu ábaa era áya era mwa Yairo, luamba lwa bandu banene bábaa báenda bámufundeeresa.

⁴³ Mwo'lu luamba, mwábaa mùli mukasi muuma ola wábaa wamála myaka ekumi ne'biri álibuka ne'bulwala bwe'kutenga emikira. Ábaa ámalire ebikulo byai byoshi era mwe'bahake. Si kutali ola wáalaa kumulamya.

⁴⁴ Oyu mukasi, era kuulukira era nyuma sa Yesu na áuma kwa musike we'luchimba lwai. Unao-unao, obu bulwala bwai bwe'kutenga emikira, bwera kulama.

⁴⁵ Yesu era kubusa mbu: «Nde iwànyiumire'ko?» Ebandu boshi bera kuchǎkana mbu bàtamuumire'ko. Petero kukwera kumubura mbu: «Ewashe Mukangirisi, ùtasene kwo'luno luamba loshi lwe'bandu bakúsungwire na kukufundeeresa?»

⁴⁶ Si Yesu era kuteta mbu: «Kuli mundu ola wanyíumire'ko, bushi nàchûmvire nga kuli misi era yanyítengire'mo.»

⁴⁷ Oyu mukasi álolire kwa aményekire, era kuya era Yesu ábaa àli áenda ákukumana ne'buba. Era kukoma emafi era muhondo sai. Era kubalikisa mwa kachi-kachi ke'bandu boshi cha chàtumaa ámuuma'ko na kute ku àlamaa unao-unao.

⁴⁸ Yesu era kumubura mbu: «Mwali wanyi, ebwemeresi bwao bwàkulamise. Ùchienderaa ne'bôlo.»

⁴⁹ Mango Yesu ábaa anáchiri áteta, kwera kuika mundu muuma ola wábaa wátenga era mwo'yu mukulu-kulu Yairo. Era kumubura mbu: «Aaye waliya! Mwali wao era àtowaa emuchima. Ùtachitamyaa eMukangirisi.»

⁵⁰ Yesu ômvire bacha, era kubura Yairo mbu: «Ùtobaaa, unáataa ebwemeresi oshâo, angálama.»

⁵¹ Yesu era kuika ala mwa Yairo. Chiro ákêmerera kwîngirira mwa nyumba na unji mundu, kureka Petero, na Yowani, na Yakobo, ne'she na nyina we'mwana.

⁵² Ebandu boshi bábaa bálira ne'kuchinyiyanga, bushi ne'lufu lwo'yu munyere. Si Yesu era kubabura mbu: «Mùtaliraa, bushi ono munyere àtafire, si kuonjira ku àonjire!»

⁵³ Bômvire bacha, bera kumushekera, bushi beke bábaa banêshi kwo'yu munyere àfire mira.

⁵⁴ Si Yesu era kusimbira ola munyere kwa mino na ámubura na murenge munene mbu: «Emwa, sukaa!»

⁵⁵ Ola munyere era kuhuba kuba muuma-uma, kuna kwêmuka. Yesu era kubura ebandu mbu běresaa oyu munyere ebiryo.

⁵⁶ Ebasere bo'yu munyere bera kusanwa busese. Yesu era kubachichika mbu bàtaereresaa bábura mundu asibya kwa myasi era yàrengire.