Online Bible

Luka 6 - Echilaano Chiyayaya

Yesu i'Mukulu-kulu we'Sabato
( Mat 12:1-8 ; Mar 2:23-28 )

¹ Lusuku luuma lwa Sabato*, Yesu ábaa árenga mu mahwa ma bulo. Ebanafunzi* bai bera kutangirisa bápololanga ebulo, bera kunde basínganya'bo mwa mino, na bálya'bo.

² Bafarisayo* bauma bera kubusa'bo mbu: «Era! Chi chatuma mwáira bya Mwaso* wetu atúla ànanyise kuira elusuku lwe'Sabato*?»

³ Yesu era kubǎkula mbu: «Mùtafuraa kusoma bya Tauti áiraa mango yeine ala'uma ne'bandu ba ábaa àli nabo, bábaa bafíre ne'businya?

⁴ Êngiraa mwa Nyumba ya Ongo, era kutola emikati era bandu bátulaa Ongo. Era kulya'i, era kwêresa ne'bandu ba ábaa àli nabo, chiro àngaba mbu ebakuhanyi* beine bu bábaa bète eloso lwe'kulya emikati era iri nge'i!»

⁵ Yesu era kuhuba kubura'bo mbu: «Nyono, nyi Mwana we'Mundu nyi Ena eSabato.*»

Yesu álamya emundu elusuku lwe'Sabato
( Mat 12:9-14 ; Mar 3:1-6 )

⁶ Lunji lusuku luuma lwa Sabato*, Yesu êngiriraa mwa bushenge bwe'Bayuta*, na átangirisa ákangirisa ebandu. Mwo'bu Bushenge, mwábaa mùli mundu muuma ola wábaa urémere emino ye'malyo.

⁷ eBakangirisi be'Mwaso* ne'Bafarisayo* bera kutumbikisa Yesu, balóle akaba angálamya oyu mundu elusuku lwe'Sabato*. Báiraa bacha, chasiya babóne emwasi ola bàngemangira'ko kwa kumusitaka.

⁸ Si Yesu ábaa àmenyire emianyisa yabo. Era kubura oyu mundu wábaa urémere emino mbu: «Bàtukaa wǐmange mwa kachi-kachi ke'bandu.» Era kubatuka, ne'manga mwa kachi-kachi kabo.

⁹ Chasinda, Yesu era kubabura mbu: «Nábabusa: Chiye chi eMwaso* wetu atúla emérere mbu túndaa twáira elusuku lwe'Sabato*? Kuira emabuya nesi emabi? Kulamya emundu nesi kumwita?»

¹⁰ Yesu era kubasonga boshi, era kwire ábura ola mundu mbu: «Nánulaa emino yao.» Era kunanula'i, era mino kuna kulama.

¹¹ Si abu bakangirisi be'Mwaso* ne'Bafarisayo* bera kusibuka busese. Bera kutangirisa bábusanya mbu kute bangáira Yesu.

Yesu álondola endumwa ekumi ne'biri
( Mat 10:1-4 ; Mar 3:13-19 )

¹² Mwe'si suku, Yesu era kwírukira kwa ndulungu, áye kwéma Ongo. Ebutufu bwera kumuchera'ko éma.

¹³ Ábere mwe'i mishangya, Yesu era kwâmaala ebanafunzi* bai, era kulondola ekumi na babiri mubo, era kuběrika mbu: «ndumwa.*»

¹⁴ Na bu babano: Simoni, ola Yesu ásulaa esina lya Petero, na munyakabo mbu i'Andereya, na Yakobo, na Yowani, na Firipo, na Baritolomayo,

¹⁵ na Matayo, na Tomasi, na Yakobo mwenyi Alufayo, na Simoni Museloti,

¹⁶ na Yuta mwenyi Yakobo, na Yuta Isikariyota ola wárenganyaa Yesu.

Yesu ákangirisa ebandu álamya ne'balwala
( Mat 4:23-25 )

¹⁷ Yesu era kwândaala kwa ndulungu àli ala'uma ne'ndumwa* sai. Áikire kwa bulambo, era kwîmanga. Era kubuana'o chikembe cha banafunzi* bai na banji bandu banene busese ba bábaa bátengera mwa chio choshi che'Yuteya, no'mwa musi we'Yerusalemu, no'mwa bimbi bye'musi we'Tiro ne'we'Sitona, kwa musike-musike se'nyanja.

¹⁸ Abu bandu bábahaa chasiya bǒmvirisise Yesu, balámisibwe ne'malwala mabo. Na ba bábaa bálíbusibwe ne'bihwasi, nabo bera kunalámisibwa.

¹⁹ Ebandu boshi béndee báhonda bamúume'ko, bushi ebuashi bwéndee bwámutenga'mo, na bwálamya'bo boshi.

Engahanyi ne'buanya
( Mat 5:1-12 )

²⁰ Yesu era kusonga ebanafunzi* bai, era kubabura mbu: «Mwǎhanyirwe mu bakene, bushi eBwami bwa Ongo* bùli bwenyu.

²¹ Mwǎhanyirwe mu mwáfa ebusinya lwarero, bushi mungéuchisibwa. Mwǎhanyirwe mu mwálira lwarero, bushi mungásheka.

²² Mwǎhahanyirwe mango ebandu bábahomba, báchikula ku mwabo, bábakamba, na kwâmaana emasina menyu bulio, bushi nanyi nyi Mwana we'Mundu.

²³ Mango ei myasi ingénde yábaikira, mundaa mwámowa na kuchiterera, bushi mubikirirwe lwêmbo lunene kwa nguba. Kuno'ku ku bahokulu babo béndee bánalíbusa ebarebi*.

²⁴ Si mu baare, mùli bânya, bushi mwábonyire elwenyu lumoo mira.

²⁵ Nenyu mu mwìuchire lwarero, mùli bânya, bushi mungáfa businya. Nenyu mu mwásheka lwarero mùli bânya, bushi muchiri mungálira na kuba mwa chiriyo.

²⁶ Mùli bânya mango ebandu boshi bábatonga, bushi kuno'ku ku bahokulu babo béndee bánatonga ebarebi* be'bisha.»

Mundaa mwásima ebarenda benyu
( Mat 5:38-48 ; 7:12a )

²⁷ Yesu era kuhuba kuteta mbu: «Si mwabo mu munyûmvirise, chechine chi nábabura: mundaa mwásima ebareanda benyu. Na ba batúla babáhombire, mundaa mwáirira'bo emabuya.

²⁸ Ba bénde bábatakira, mundaa mwéma Ongo ǎhanyire'bo. Na ba bénde bábalibusa, mundaa mwáběmera era mwa Ongo.

²⁹ Mango emundu àngakumaasisa kwe'tama liuma, umúteaa ne'rinji. Na mango emundu àngakunyaa ekochi, ùmurekaa ěke ne'furemo.

³⁰ Mango àngakwema ekandu ùtamwîmaa'ko, nesi mango àngakunyaa ka kali kao, ùtachimwemaa'ko.

³¹ Na kwa mwáhonda ebanji bandu bàbairiraa, ku nenyu mundaa mwánairira'bo.

³² «Akaba mùngende mwánasima ba batúla babásimire, nzimwa ichiye mùngabona? Anabe ne'bakosi be'mabi nabo bénde bánasima ba babásimire!

³³ Kanji akaba mùnganairira emabuya ba bénde bánabaírira'mo, nzimwa ichiye mùngabona? Anabe ne'bakosi be'mabi nabo ku bénde bánaírirana bacha!

³⁴ Kanji akaba mùnganênjika ba mulángalire kwa bu bàngabafua, nzimwa ichiye mùngabona? Anabe ne'bakosi be'mabi nabo bénde bánênjika ba bànganabafua!

³⁵ «Si mwabo mundaa mwásima ebarenda benyu. Mundaa mwáirira'bo emabuya. Kanji mundaa mwênjika busira kulangalira mbu bangabáfua. Mwa bacha, mungábona lwêmbo lunene, kanji mungába kanangana bana ba Ongo, i'utúla era luulu sa byoshi. Bushi yeke énde áira emabuya anabe kwa bandu ba bàtateta mbu akoko, no'kwa bakosi be'mabi.

³⁶ Mundaa mwáfirana bonjo ngo'kwa Eho énde ábafira'bo.»

Muténdaa mwáchinjibusa ebanji

³⁷ Yesu era kuhuba kuteta mbu: «Muténdaa mwáchinjibusa ebanji, na Ongo atábachinjibuse nenyu. Muténdaa mwáteta mbu ebanji bachiíjibusibwaa, na Ongo àtatete mbu nenyu muchinjibusibwaa. Si mundaa mwábabalirana, na Ongo àngabababalira nenyu.

³⁸ Mundaa mwêresa ebanji na Ongo àngaberesa nenyu. Na cha mungêresibwa chingába chiréngirwe kubuya na kusindairwa na kwêhusa ehao senyu kwana meno. Kwa mwénde mwárengera ebanji ku Ongo akánabarengera.»

³⁹ Kanji Yesu era kubaishira ono muanyi mbu: «Emuuta àngaala kutandaisa muuta mulikabo? Nânga! Akaba àngaira bacha, kwa banáli babiri kuika banátowere mwa fumbi!

⁴⁰ Emwanafunzi* àtangarenza emukangirisi wai. Si chira mwanafunzi* ola wamálire kukangirisibwa kubuya-buya, iwera ùngaba nge'mukangirisi wai.

⁴¹ «Chi chátuma wálola kwa kaaha ke'muchi ka kàli mwa liho lya mulikenyu, si ùtalaire kwa muchi ola ulí mwa lyao?

⁴² Chi chìngatuma wábura mulikenyu mbu: ‹Iraa nyikúkule ekachi ka kàli mwa liho lyao›, no'ku mwa lyao weke muchiri muchi? E umutebanyi! Ukúlaa tanga emuchi ola ulí mwa liho lyao, eri walóla kubuya kwa ùngakula ekachi ka kàli mwa lya mulikenyu!»

Emundu énde ámenyeka kurengera emyanya yai
( Mat 7:16-20 ; 12:33-35 )

⁴³ Yesu era kuhuba kuteta mbu: «Kutáli muchi mubuya ola ùngeka bifuma bibi, nesi kutáli muchi mubi ola ùngeka bifuma bibuya.

⁴⁴ Chira muchi énde áményeka kurengera ebifuma byáo. Ebandu bàtaokola byambamba nesi ngobya kwa katenge-tenge.

⁴⁵ Kuno'ku, emundu mubuya énde áteta ebibuya bya byátenga mwa muchima wai. Ne'mundu mubi, emabi ma énde áteta, ménde mátenga mwa bubi bwa bwèhwire mwa muchima wai. Bushi ebunu bwa mundu bwénde bwáteta bya byèhwire mwa muchima wai.»

Emuanyi we'nyumba ebiri
( Mat 7:24-27 )

⁴⁶ Yesu era kunaendekera áteta mbu: «Chi chátuma mwénjire mwányěrika mbu: ‹Enawetu, Enawetu›, mutánaira na bya nénjire nábabura?

⁴⁷ Nábalosa kute emundu ahúhanyisibwe ola wénjire wányikulikira, na kûmva emyasi yanyi na kuira ngo'kwa ìtechire.

⁴⁸ Ahúhanyisibwe ne'mundu ola wáimbaa enyumba. Era kuchima busese tanga mwa chitaka kuikira kwe'koi. Kwe'ri koi, era kubika kwe'musingi ola áimbiraa kwe'nyumba. Mango emvula inene yátowaa, elwishi lwera kwêhula, emwihuso era kuchihuta kwe'i nyumba, si chiro íkahaala bushi yábaa iserire.

⁴⁹ Si emundu ola wénjire wáchiremba kûmva emyasi yanyi àtanaira ngo'kwa ìtechire, ahúhanyisibwe ne'mundu ola wáimbaa enyumba yai kwa chitaka buha-buha, busira kuchima musingi. Mango emwihuso áchihutaa kwe'i nyumba, unao-unao yera kukunduka, na yáhandukala yoshi.»

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy