Luka 4 - Echilaano Chiyayaya

Wamusimu áereka Yesu

¹ Yesu era kutenga era lwishi lwe'Yorotani, éte ebuashi bwe'Muchima Mubuya-buya. Oyu Muchima, era kumweka mwa buyeye*.

² Era kumala'mu suku mane Wamusimu ámuereka. Na mwe'si suku, atályaa kandu kasibya. Ábere esi suku sera sawáa, era kufa businya.

³ Chasinda, Wamusimu era kumubura mbu: «Akaba unáli Muala wa Ongo, bùraa line'koi lihúbe mukati.»

⁴ Yesu era kumwǎkula mbu: «Byǎnjikirwe mwa Maanjiko Mabuya-buya mbu: ‹Bya mundu álya, byeine atá bi bìngatuma ába muuma-uma.›»

⁵ Era nyuma se'bi, Wamusimu era kwêka Yesu ala àtowamire busese. Mu chihangi chiuma, era kumulósa emami moshi mwo'mwa butala.

⁶ Era kumubura mbu: «Nyingákweresa ebuashi boshi ne'buare bwa'mu mami. Bushi ebi byoshi, nêresibwe'bi, kanji nyìnganêresa'bi emundu ola nyisímire.

⁷ Rero úkafukama era muhondo sanyi kwa kunyera, ebi byoshi bingába byao.»

⁸ Yesu nai mbu: «Byǎnjikirwe mwa Maanjiko Mabuya-buya mbu: ‹Úndaa wêra Enawenyu Ongo, na kunde wámukorera yeine oshâo.›»

⁹ Chasinjire, Wamusimu era kwêka Yesu mwa musi we'Yerusalemu. Era kumwimanza kwa ngangamo se'Luhu lwa Ongo*, na ámubura mbu: «Akaba unáli Muala wa Ongo, uchíkabulaa ala'shi

¹⁰ bushi byǎnjikirwe mwa Maanjiko Mabuya-buya mbu: ‹Ongo àngábura ebamalaika* bai mbu bàkulangaa.›

¹¹ Kanji byǎnjikirwe mbu: ‹Bangákweka mwa mino sabo, chasiya ekuulu kwao kutasitalaa kwe'koi.›»

¹² Yesu era kumwǎkula mbu: «Byǎnjikirwe mbu: ‹Uténdaa wáereka Enawenyu Ongo.›»

¹³ Ábere Wamusimu àmala kuereka Yesu ekwai kwoshi, era kwire ámureka tanga kuikira lunji lusuku.

Yesu átangirisa emulimo wai mwa chio che'Kalilaya

¹⁴ Yesu era kuhuba mwa chio che'Kalilaya, éte ebuashi bwe'Muchima Mubuya-buya. Engulu yai, yera kuhandabana busese mwe'chi chio choshi.

¹⁵ Era kunde ákangirisa ebandu mwa mashenge mabo me'Bayuta*. Ebandu boshi bera kunde bámutonga.

Besha Nasareti bánana Yesu

¹⁶ Yesu era kuya mwa musi we'Nasareti, era ákuliraa. Mango elusuku lwe'Sabato* lwáikaa, era kwîngirira mwa bushenge bwe'Bayuta* ngo'kwa ábaa anátula àkomere. Era kwîmanga chasiya àsome eChinwa cha Ongo.

¹⁷ Bera kumweresa echibungo che'chitabo cha murebi* Isaya. Era kuboola'chi, na ábona ala bǎnjikire mbu:

¹⁸ «eMuchima wa Enawetu àli ala'uma nanyi. Bushi ànyilondwere mbu nyindaa náhubanganyisa ebakene eMwasi Mubuya-buya. Ànyitumire mbu nyibáliraa ebandu be'mulisi mbu bangáboolwa. Ne'bauta mbu bangálola. na bálibusibwa, kubabika mwa buhuru.

¹⁹ Na kubalira ebandu mbu emwaka aíkire, ola Enawetu angálosa ebubuya bwai kwa bandu.»

²⁰ Chasinda, era kubunga-bunga echitabo, era kuálulira'chi emukosi wo'mwa bushenge*, era kwíkala. Ebandu boshi ba bábaa bàli mwo'bu bushenge, bera kumutumbikisa busese.

²¹ Yesu era kwire ábura'bo mbu: «Mano Maanjiko Mabuya-buya mwera kûmva nábasomera, mérire máberera lwarero.»

²² Ebandu boshi bera kumowera Yesu na kusanwa bushi ne'binwa bìkomire byéndee áteta. Bera kutangirisa báteta mbu: «Si mwenyi Yosefu ono!»

²³ Yesu era kubura'bo mbu: «Nyìshi kanangana kwa mungányitea mwo'no muanyi mbu: ‹Muhake, chilámyaa weine!› Kanji mungánanyibura mbu: ‹Twômvire no'kwa myasi yoshi era waíraa eKaperinaumu, rero uíraa'i no'muno musi wenyu.›»

²⁴ Era kunaendekera áteta mbu: «Kubinali, nábabura kwa kutáli murebi* ola wénde wáhuukasibwa kubuya mwa musi wabo.

²⁵ Kanangana, nábabura kwa mwa chio che'Isiraeli mwábaa mùli báhumba-kasi banene mwa suku sa murebi* Eliya. Mwe'si suku, emvula yámalaa myaka ehatu na chimbi ìtatowa. Ne'bulio bwera kuba bunene mwa chio choshi.

²⁶ Ongo atátumaa Eliya mbu ayáa kuasa chiro na muhumba-kasi muuma mubo. Si ánamutumaa era mwa muhumba-kasi muuma wo'mwa musi we'Sarepata, mwa chio che'Sitona.

²⁷ «Kanji mwa chio che'Isiraeli mwábaa mùli babenzi-benzi banene mwa suku sa murebi* Elisha. Si kutáli chiro na muuma mubo ola wálamisibwaa kureka Namani, mwesha mwa chio che'Suriya.»

²⁸ Ebandu boshi ba bábaa bàli mwo'bu bushenge bwe'Bayuta* bômvire bacha, bera kufa bute busese.

²⁹ Bera kubatuka, bera kukolokanya Yesu mwa musi, na bámukululira kwa ngangamo se'katulungu ko'yu musi ábaa aímbirwe'ko. Bábaa báhonda bàmufumire mwa kabanda.

³⁰ Si Yesu era kurenga mwa kachi-kachi kabo, kuna kuchiendera.

Yesu âmbula echihwasi kwa mundu

³¹ Era nyuma se'bi, Yesu era kwândaalira mwa musi we'Kaperinaumu, mwa chio che'Kalilaya. Mango elusuku lwe'Sabato* lwáikaa, era kukangirisa ebandu.

³² Ebandu bera kusanwa busese mwa kulola kwa énjire ákangirisa, bushi emyasi yai yábaa yéte buashi.

³³ Mwo'bu bushenge bwe'Bayuta* mwábaa mùli mundu muuma ola wábaa usímbirwe ne'chihwasi. Oyu mundu, era kutangirisa álakanga busese mbu:

³⁴ «Eu Yesu we'Nasareti, chiye chi wátuhonda'ko? Wàbahire kutusikya? Nyikwîshi kubuya-buya. Woyo u'Mubuya-buya ola wátumirwe na Ongo!»

³⁵ Yesu era kukaliira echi chihwasi busese mbu: «Sìraa, unátenge kwo'yu mundu!» Cha chihwasi kuna kuhunda ola mundu kwa chitaka mwa kachi-kachi ke'bandu, na chamutenga'ko busira kumubabasa.

³⁶ Ebandu boshi bera kusanwa busese, bera kutangirisa bábusanya mbu: «Myasi ichiye enera? Anabe ne'bihwasi, ono mundu énjire ánâmbula'bi kwa buashi ne'misi mbu biténgaa kwa mundu, na unao-unao, byánamutenga'ko!»

³⁷ Bushi no'ku, emyasi ya Yesu yera kuhandabana mwe'chi chio choshi.

Yesu álamya balwala banene

³⁸ Yesu era kutenga mwo'bu bushenge bwe'Bayuta*, era kuya mwa mwa Simoni. Áikire'mo, era kubuana nasala wa Simoni ákukumana ne'hushira. Bera kwéma Yesu mbu àmulamyaa.

³⁹ Yesu era kwínamirira era oyu mukasi ábaa àli, era kukaliira ei hushira na yámuténga'ko. Unao-unao, ola mukasi kuna kwîmanga na átangirisa ábahondera ebiryo.

⁴⁰ Mango esuba lyábaa lyera lyàsokaa, bera kuretera Yesu ebandu boshi ba bábaa bàlakire chira bulwala boshi. Yesu era kunde ábika chira muuma kwe'mino, na álamya'bo.

⁴¹ Ebihwasi byera kutenga ku bandu banene, byáenda byálakanga mbu: «Woyo u'Muala wa Ongo!» Si Yesu era kukaliiraa'bi, kanji àtêmereraa mbu bitétaa kandu, bushi byábaa bìshi kwa i'Kirisito*.

Yesu áhubanganya eMwasi Mubuya-buya mwa chio che'Yuteya

⁴² Ábere ebutufu bwera bwacháa, Yesu era kutenga mwa musi, era kuya mu chisiki chai yeine. Eluamba lwe'bandu, bera kutangirisa bámuhonda. Mango bámulolaa'ko, bera kuhonda kumwangika, chasiya àtachibátengaa'ko.

⁴³ Si Yesu era kubura'bo mbu: «Binyěmire nyihúbanganye eMwasi Mubuya-buya we'Bwami bwa Ongo* mwa inji misi namo. Bushi echera chi chátumaa Ongo ányituma.»

⁴⁴ Yesu era kunde áhubanganyisa ebandu eMwasi Mubuya-buya mwa mashenge me'Bayuta* mwo'mwa chio che'Yuteya.