Online Bible

Luka 10 - Echilaano Chiyayaya

Yesu átuma banji banafunzi malinda na babiri mwa mulimo

¹ Era nyuma se'bi, Enawetu era kulondola banji banafunzi* malinda na babiri. Era kubatuma babiri-babiri bàmuhondorere mu chira musi na mu chira chisiki era yeine ábaa áhonda áye.

² Era kubura'bo mbu: «Emyaka yeríre inene, si ebakosi be'kuishebula bàkeire. Bushi no'ku, mwémaa ena emyaka atúme ebanji bakosi mwe'hwa lyai.

³ Muchiúmaa! Muményereraa kwa nábatuma nga byana bya mbuli mwa kachi-kachi ke'nyishibwabwa.

⁴ Mùtekaa luteya, nesi mbweka, nesi birato. Mùtakesaa na mundu mwa njira.

⁵ «Na chira nyumba era mungénde mwêngira'mo, Mukesaa besha'mo mbu: ‹Ene nyumba ibáa ne'bôlo.›

⁶ Akaba mwe'i nyumba mùngaba mundu ola wáhonda ebôlo, obu bôlo bwenyu bwánashiba nai. Si akaba bitáli bacha, obu bôlo bwenyu bwánabaalukira.

⁷ Mubéraa mwe'i nyumba, munálye ne'kumwa choshi cha besha'mo bangáberesa, bushi emukosi ěmire kwêresibwa elwêmbo lwai. Mùtatengaa mu nyumba mbu mwáya mu inji.

⁸ Na chira musi woshi ola mungêngira'mo, ebandu bakábahuukasa, mùlyaa choshi cha bangáberesa.

⁹ Ne'balwala ba bàli mo'yu musi, mulámyaa'bo na kubura besha'mo mbu: ‹eBwami bwa Ongo* bwaíkire ofu nenyu.›

¹⁰ Si chira musi woshi ola besha'mo bangánana kubahuukasa, mwánaya mwa nama sao ne'kuteta mbu:

¹¹ ‹Twabákunguchirire ne'mukungu we'musi wenyu ola wayáa kwa bihando byetu. Si chiro bacha, muményereraa kwe'Bwami bwa Ongo* bwera bùli ofu.›

¹² Kubinali, nábabura kwa mango elusuku lwe'buchinjibusi lukáika, besha mo'yu musi bakáchinjibusibwa busese kurenza besha mwa musi we'Sotomo.»

Yesu átakira emisi era yánanaa kumwemerera
( Mat 11:20-24 )

¹³ Yesu era kuhuba kuteta mbu: «Buanya ku woyo u'musi we'Korasini! Na buanya ku woyo u'musi we'Betesaita! Bushi naíraa bisomerano mwa ndanda senyu. Ebi bisomerano, akaba nyìngabiirire mwa musi we'Tiro ne'we'Sitona, besha mwe'i misi beke bàngěmbere embweka ne'kwêkala mwa lufufu kwa kulosa kwa bàbindukire kutenga mwa bibi byabo.

¹⁴ Bushi no'ku, kwa lusuku lwe'buchinjibusi, emusi we'Tiro ne'we'Sitona, ikáchinjibusibwa kueke kurenza ewe'Korasini ne'we'Betesaita.

¹⁵ Nao u'musi we'Kaperinaumu, wáanyisa mbu ukêrusibwa kuikira kwa nguba? Nânga! Kwândaasibwa ku ùngândaasibwa busese ekusimu!»

¹⁶ Kanji Yesu era kubura ebanafunzi* bai mbu: «Ola wàbômvire eri nyono nyi omvíre. Si ola wàbananyire eri nyono nyi anányire. No'la wànyinanyire eri ànanyire no'la wányitumaa.»

Ebanafunzi malinda na babiri báfuluka mwa mulimo

¹⁷ Chasinda, ba banafunzi* malinda na babiri bera kufuluka na lumoo lunene. Bera kuteta mbu: «Enawetu, anabe ne'bihwasi mango twabáa twénjire twâmbula'bi kwe'sina lyao, byábaa byénjire byánaira kwa twàbwirire'bi.»

¹⁸ Yesu kukwera kubura'bo mbu: «Nalólaa kwa Wamusimu* átoa kwa nguba nga kalimya-limya.

¹⁹ Mǔmvaa! Nàbêresaa ebuashi bwe'kuima eMusimu. Rero mwo'bu buashi, mu mungénde mwálibata enjoka ne'ngùtú, kutachiri ne'cha chingábababasa.

²⁰ Si chiro bacha, mùtamowaa bushi ebihwasi byénjire byáira bya mwàbwirire'bi. Si mumówaa bushi emasina menyu maánjikirwe kwa nguba.»

Elumoo lwa Yesu
( Mat 11:25-27 ; 13:16-17 )

²¹ Mwe'chi chihangi, Yesu era kumowa busese kurengera ebuashi bwe'Muchima Mubuya-buya. Era kuteta mbu: «Tata, wôyo u'Ena enguba ne'butala! Nàkutongire bushi ene myasi wáibishaa ebandu be'bwenge na ba banásomire. Si waíbihulire ebana batoto. Nechi Tata! Ebi byoshi binátenganyire ne'kuhonda kwao!»

²² «Tata ányeresise byoshi. Kutáli mundu ola utúla unyîshi nyi Mwana kureka Tata yeine. Kutáli no'la utúla wìshi Tata kunyireka nyi Mwana, na chira mundu woshi ola nyisímire àmumenye.»

²³ Chasinjire, Yesu era kwêrekera era banafunzi* bai bábaa bàli. Era kubabura beine mbu: «Emeho ma màsene kwe'bine muséne'ko, maáhanyirwe.

²⁴ Nábabura kwa barebi* banene na bami banene báhondaa balóle kwe'ne myasi muséne'ko, si bàtabilólaa'ko. Kanji báhondaa bǒmve kwe'bine mwénjire mwômva, si batábyumvaa'ko.»

Emuanyi we'Musamariya mubuya

²⁵ Era nyuma se'bi, mukangirisi muuma we'Mwaso* era kwêmanga atéye Yesu mwasi. Era kumubusa mbu: «Mukangirisi, chiye chi nyiíraa chasiya nyibóne ekalamo ke'suku ne'mango?»

²⁶ Yesu era kumwǎkula mbu: «Kute bitúla byǎnjikirwe mwa Mwaso*? Na kute wénde wômva'o mango wásoma'o?»

²⁷ Oyu mukangirisi we'Mwaso* era kwǎkula mbu: «Usímaa Enawetu i'Ongo wao mwa muchima wao woshi, no'mwa kalamo kao koshi, no'mwa misi yao yoshi, no'mwa bwenge bwao boshi. Usímaa na mulikenyu ngo'kwa weine utúla uchísimire.»

²⁸ Chasinjire, Yesu era kumubura mbu: «Wǎkwire kubuya! Ku úndaa wáira bacha ubóne ekalamo.»

²⁹ Si oyu mukangirisi we'Mwaso* ábaa áhonda alóse kwa i'ùsinganyire. Era kwire ábusa Yesu mbu: «Na nde i'mùliketu?»

³⁰ Yesu era kumwǎkula mbu: «Mundu muuma ábaa átenga eYerusalemu ândaalira eYeriko. Ábere era àli mwa njira, era kutabalirwa na bihumusi. Ebi bihumusi, byera kumunyáa byoshi bya ábaa éte, byera kumupunda-punda na byáchiendera byàmurekire mareka-reka.

³¹ «Kwera kuulukira kuhanyi* muuma ola wábaa wândaala mwe'i njira. Álolire kwo'la mundu wápundwaa, era kwâmbuka na áchêndera.

³² Mulawi muuma nai era kuika aola. Álolire kwo'la mundu, nai era kwâmbuka na áchêndera.

³³ «Chasinda, kwera kuulukira Musamariya muuma ola wábaa ùli mwa lubalamo. Oyu Musamariya era kuika ala oyu mundu wápundwaa ábaa àli. Ámulólire'ko, era kumufira bonjo.

³⁴ Era kuchifunda ofu nai, era kumubuka ebiulu mwa kufuka kwe'tifai ne'mafuta na ámina'bi. Era kumwěrusisa kwa ndokomu yai, na ámweka mwa nyumba ye'baenyi àmulángire'mo.

³⁵ Ábere mwe'i mishangya, era kukula tinari ebiri sa buteya, era kurekera'si ena enyumba ye'baenyi na ámubura mbu: ‹Ulángaa ono mundu kubuya. Ne'bunji buteya bwa ungámuesa'ko, nyingákuálulira'bo mango nyingáfuluka.›»

³⁶ Yesu kukwera kubusa oyu mukangirisi we'Mwaso* mbu: «Mwa'bu bandu bahatu, nde i'uséne nga iwábaa mulikabo wo'yu wápundwaa ne'bihumusi?»

³⁷ Oyu mukangirisi we'Mwaso* era kwǎkula mbu: «Ola wámuasaa.» Yesu era kumubura mbu: «Uéndaa, nao ku úndaa wáira bacha.»

Yesu átambira Marata na Mariya

³⁸ Mango Yesu ne'banafunzi* bai bábaa banáchiri mwa luendo, bera kwêngira mu kamusi kauma. Mukasi muuma mbu i'Marata era kumuhúukasa mwa mwai.

³⁹ Oyu Marata ábaa éte mulumuna wai muuma mbu i'Mariya. Oyu Mariya ábaa ékese ala musike se'bihando bya Enawetu, ômvirisa bya ábaa áteta.

⁴⁰ Si Marata yeke ábaa átuba-tuba bushi ne'mulimo we'kutéka ebiryo. Era kuika ala Yesu ábaa àli, era kumubura mbu: «Enawetu, mulumuna wanyi ekunyirekera emulimo nyeine, kutakubwirire kandu? Umúburaa ànyiase.»

⁴¹ Enawetu Yesu era kumwǎkula mbu: «Marata, Marata! Woyo wátuba-tuba na kuchiribusa na bindu binene.

⁴² Si chindu chiuma chi chète mufa oshâo. Mariya yeke alóndwere cha chikomire busese. Echera atákanyaibwe'chi.»

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy