FILEMONO 1 - Echilaano Chiyayaya

Paulo álamusa Filemono

¹ Nyono Paulo, nyìri mwa buroko bushi nyìri mukosi wa Yesu Kirisito. Nyono na munyaketu Timoteo, tútwakuanjikira musiirwa Filemono, mukosi muliketu.

² Mano maruba merékere ne'bemeresi ba bénjire bábuanana mwa mwao, na mwali wetu Apiya, na Arikipo, iwénjire wálwisanya ala'uma netu mwa mulimo.

³ Ongo Tata, na Enawetu Yesu Kirisito béndaa bábaahanyira na kuberesa ebôlo!

Enzii ne'bwemeresi bwa Filemono

⁴ Chira chihangi mango néma, nénjire nákukengera, na kuteta mbu akoko era mwa Ongo bushi nao.

⁵ Bushi nômvire emwasi kwa utúla usímire ebandu ba Ongo boshi, no'kwa utúla wemérere Enawetu Yesu.

⁶ Nénjire néma Ongo, obu buuma twéte kurengera ebwemeresi bwetu, bukuase kunde wámenyerera emabuya moshi ma tutúsa mwa buuma bwetu na Kirisito*.

⁷ Rero munyaketu, ei enzii yao yatúmire ebandu ba Ongo bábona emisi. Bushi no'ku, nàmoire busese na kusesibwa emuchima.

Paulo émera Onesimo ebonjo

⁸ Rero, bushi ne'buuma bwa twěte mwa ndanda sa Kirisito*, nyéte ebuashi bwe'kukubura cha wěmire kuira.

⁹ Si chiro bacha, kusengera ku náhonda nyìkusengere kurengera enzii era twétane'ko. Nyono Paulo nera mungumwa, kanji nyìri mwa buroko bushi nyìri mukosi wa Yesu Kirisito.

¹⁰ Nákusengera bushi na Onesimo. Oyu Onesimo nera námuanja nga mwana wanyi, ola nàbuchire mwa bwemeresi, kuno nyìri mwa buroko.

¹¹ Mwa suku sa sárengaa, abáa àtakwetere chiro na mufa asibya. Si rero, era mundu ola utwètere mufa tubabiri.

¹² Rero, nákufulusisa'i, àli ngo'kwa nyìnganakweresa emuchima wanyi.

¹³ Nyìngasimire tubére nai tanga, chasiya énde ányiasa, kwe'bya woyo ungénjire wányiasa'ko. Angénjire ányiasa bacha, kuno nyichíri mwa buroko bushi ne'kuhubanganya eMwasi Mubuya-buya.

¹⁴ Si ndáhonda kuira chiro na mwasi asibya ola ùtemerere, bushi ndáhonda kukwanjirira mbu ùnyiíriraa emabuya. Si uíraa'mo, kwa kuhonda kwao weine.

¹⁵ Abunya Onesimo àlikanyisibwaa nao tanga ku suku sieke, chasiya wíre wánekala nai loshi.

¹⁶ Rero, àtachiri nga kaungu* oshâo, si era mundu ola wéte mufa kurenza ekaungu*, bushi era munyaketu musiirwa. Nyono nyimúsimire ngachi, nao ungánamusima busese. Ungámusima tanga nga mundu, kanji nga munyaketu mwemeresi.

¹⁷ Rero, akaba utúla unyítolire nga mwira wao, ùmuhúukasaa ngo'kwa ùngananyihuukasise nyeine.

¹⁸ Na akaba kùli mwasi mubi ola ákukoreraa, nesi akaba àli mu'mwinda wao, unyífusaa'o.

¹⁹ Nyono Paulo, nyi naánjikire ene myasi mwa mino yanyi nyeine kwa nyi nyingákufuwa. Si chiro bacha, nákukengesa kwa nao, ùli mu'mwinda wanyi. No'yu mwinda, kali ekalamo kao.

²⁰ Rero munyaketu, ùnyiíriraa ebi nàkwěmire bushi na Enawetu, chasiya unyísese emuchima kurengera ebuuma bwetu na Kirisito*.

²¹ Kuno nákuanjikira mano maruba, nyinêshi kwa ebi nàkwěmire bi ungánaira, ungáira na binene kurenza ebyera.

²² Kanji néma ùnyikunganyisaa ala nyingénde náonjira. Bushi nyéte emunyiiro kwa kurengera ememo menyu, Ongo angáhuba kunyifulusa eyi mwenyu.

Emyasi ye'kulaana

²³ Epafura itùminyirwe nai muno buroko bushi tùli bakosi ba Yesu Kirisito, àkulamusise.

²⁴ Bakosi baliketu, Mariko, na Arisitariko, na T=ema, na Luka, nabo bàkulamusise.

²⁵ Enawetu Yesu Kirisito éndaa ábaahanyira!