Online Bible

Bafiripi 1 - Echilaano Chiyayaya

Paulo álamusa ebemeresi bo'mwa musi we'Firipi

¹ Nyono Paulo na Timoteo, tùli baanda ba Yesu Kirisito. Nábaanjikira kurengera ebuuma bwenyu na Yesu Kirisito, mu bandu ba Ongo boshi bo'mwa musi we'Firipi, ne'bangumwa be'luhu lwa Ongo, ala'uma na ba bénde báasa'bo.

² Ongo Tata, na Enawetu Yesu Kirisito béndaa bábaahanyira na kuberesa ebôlo!

Paulo émera ebemeresi be'Firipi

³ Chira chihangi mango nénde nábakengera, nénde náteta mbu akoko era mwa Ongo wanyi.

⁴ Kanji chira chihangi mango náběmera muboshi, nénde néma na lumoo,

⁵ bushi mwénjire mwányiasa mwa kuhubanganya eMwasi Mubuya-buya kutengera elusuku lubere-bere mwômvaa kuo, kunaikira lwarero.

⁶ Nyìshi kwa Ongo iwátangirisaa oyu mulimo mubuya mwa kachi-kachi kenyu, angánaisa'o kwa businda kuikira elusuku lwe'kufuluka kwa Yesu Kirisito.

⁷ Ku binányěmire nyinde náchumva bacha era luulu senyu muboshi, bushi munyitúla kwa muchima, kanji bushi muboshi mwénjire mwábona kwa ngahanyi sa Ongo ányeresise. Abe kuno nyìri mwa buroko, abe mango nénjire nálosa tenene kwa Mwasi Mubuya-buya, análi wakanangana.

⁸ Kubinali! Na Ongo anêshi kwa nyitúla nyibasimire muboshi na nzii era yátengera era mwa Yesu Kirisito.

⁹ Cha nénjire náběmera era mwa Ongo chi chechine: muéndekeraa kunde mwásimana busese, na kunde mwámenyerera na kûmva ebindu kubuya-buya,

¹⁰ chasiya muáte ebuashi bwe'kunde mwámenyerera cha chìri chibuya busese. Mwa bacha, mungába bandu ba bàkomisibwe*, kanji ba batéte chiro na mwasi mubi ola bàngabasita'ko kuikira elusuku lwa Kirisito* akáfuluka.

¹¹ Na Yesu Kirisito éndaa áberesa ebuashi bwe'kunde mwáata myanya era ìtungenene. Na mango ebandu bangénde bálola kwe'i myanya, bangénde bálosa engulu ya Ongo na kumutonga.

eMwasi Mubuya-buya áendekera

¹² Banyaketu, náhonda muményerere kubuya kwe'myasi era yànyiikirire yàtumire eMwasi Mubuya-buya áendekera era muhondo.

¹³ Kukulikana ne'bi, ebalanzi boshi bo'mwa chikali cha mwami, ala'uma ne'banji bandu boshi, banêshi kanangana kwa nyìminyirwe bushi nákorera Kirisito*.

¹⁴ Kanji bushi no'ku kuminwa kwanyi, banene mwa bemeresi bérire bálangalira Enawetu busese. Bàachire bushiru bunene bwe'kunde báhubanganyisa ebandu eChinwa cha Ongo busira buba.

¹⁵ Kanangana, kuli bauma mubo ba bénjire báhubanganya emyasi ya Kirisito* na muchima wa mufula na wa kaimano. Si ebanji beke, bénjire báhubanganya na muchima mubuya.

¹⁶ Abola bénjire bákangirisa mwa nzii, bushi bèshi kwa emulimo wanyi enera, kuli kulosa kwa eMwasi Mubuya-buya análi wa kanagana.

¹⁷ Si abu banji bénjire bákangirisa emyasi ya Kirisito* na muchima wa kaimano, na mianyisa era ìtakomire. Bénjire báira bacha, chasiya emalibuko manyi marengerese mwo'no mulisi nyìri'mo.

¹⁸ Kutáli bwaka! Emianyisa yabo íbe ibi, íbe ibuya, eche'mutoloke kuli kulola kwa emyasi era yèrekere Kirisito* yábalibwa. Na bushi ne'chi, nyìmoire kanji nyingánaendekera námowa,

¹⁹ bushi nyinéshi kwa kurengera ememo menyu na kurengera ebuashi bwe'Muchima wa Yesu Kirisito nyingáboolibwa.

²⁰ Kukulikana no'kwa nálinjirira busese ne'munyiiro ola nyéte, kutáli mwasi asibya ola ungányita honyi. Si lwarero anabe ne'suku soshi, nyilángalire kubuya-buya kwa Kirisito* angátongibwa mwa kalamo kanyi, ábe mwa kulama kwanyi ábe mwa kufa kwanyi.

²¹ Rero ku nyono, Kirisito* ku kalamo kanyi. Ne'kufa kunyiberere mutoloke.

²² Si akaba ekuba'o kwanyi muno butala kuchiri kwéte mutoloke bushi ne'mulimo wanyi, aola ndàchimenyire chiye cha nyilóndolaa.

²³ Ene myasi ebiri yénjire yányisungulisa ebwenge: nyìngasimire nyichífire nyíye kwekala ala'uma na Kirisito*, echera chi chikulu.

²⁴ Si bushi nenyu, kwémire nyiéndekere kuba muno butala.

²⁵ Rero nyìshi kwa kubinganaba bacha, nyinéshi kanangana kwa nyichíri nyingáendekera kuba'o. Nyingába ala'uma nenyu muboshi, nyinde nábaasa chasiya muéndekere kulangalira Ongo, na kuata lumoo bushi mùmwêmerere.

²⁶ Aola, mango nyingáhuba kuika eyi mwenyu, mungámowa busese bushi nanyi, kurengera ebuuma bwenyu na Yesu Kirisito.

Emibere era ìkulikene ne'Mwasi Mubuya-buya

²⁷ Rero cha náběma chi chechine: mundaa mwáata myanya era ìkulikene ne'Mwasi Mubuya-buya wa Kirisito*. Abe nyiíke, abe ndaíkire, náhonda nyinômve kwa munásimikire na muchima muuma, kanji mwálwisa ala'uma bushi ne'bwemeresi bwa bùtenganyire ne'Mwasi Mubuya-buya.

²⁸ Muténdaa mwôbaa ebarenda benyu chiro na hicha. Echera chi chingálosa'bo kwa beke bàerire, si mwabo, kununulibwa ku mwánunulibwe. Ne'bi byoshi era mwa Ongo yi'bitengire.

²⁹ Bushi Ongo àtabêresise engahanyi se'kwêmerera Kirisito* oshâo, si kanji mungénde mwálola no'kwa malibuko bushi nai.

³⁰ Rero, ebita bya mwalólaa nénjire nálwa, nenyu bi mwera mwálwa'ko. Na ngo'kwa mwénjire mwánômva, anabe na lwarero, kúlwisa ku nyináchiri nálwisa.

Wycliffe Bible Translators, Inc.

Následuj nás:

Sponzorované odkazy

Reklamy