BAEBURANIYA 1 - Echilaano Chiyayaya

Ongo énde áhambala ne'bandu kurengera eMwana wai

¹ Kwa mira, Ongo éndee áhambala na bahokulu betu mbiso sinene, mu njira sinene kurengera ebarebi*.

² Si mwe'sine suku se'businda, érire áhambala netu kurengera eMwana wai. Kurengera oyu Mwana, ku Ongo ábumbaa ebutala boshi, kanji ámulondwere chasiya ábe ena ebindu byoshi.

³ Oyu Mwana, ebulangare bwe'ngulu ya Ongo, bwénde bwálorekana'ko mwa ndanda sai, kanji i'utúsa ehuhi lya Ongo kanangana. Ne'buashi bwe'chinwa chai, bu bùachirise ebutala boshi. Ákomise* ebandu mwa kubakula mwa bibi, ne'ra nyuma se'bi érire áya kwékala kwa nguba, kwa lunda lwe'malyo ma Ongo we'buashi boshi.

eMwana wa Ongo i'mukulu-kulu kurenza ebamalaika

⁴ Oyu Mwana áiribwe kuba mukulu-kulu busese kurenza ebamalaika*, kukulikana ne'sina lya Ongo ámweresaa, lya lìrenzise emasina mabo.

⁵ Bushi kutáli chiro na muuma mwa bamalaika* ola Ongo àfuraa kubura mbu: «Woyo, u'Mwana wanyi, lwarero nabére Eho.» Kanji kutáli malaika* ola Ongo àfuraa kubura mbu: «Nyono nyingába eshe, nai angába Mwana wanyi.»

⁶ Si mango Ongo átumaa eFula yai muno butala, átetaa mbu: «Ebamalaika* ba Ongo boshi, bêmire kunde bámwera!»

⁷ Kwa bya byerékere ebamalaika*, Ongo átetaa mbu: «Ongo énde áira ebamalaika* bai kuba nga mbusi. Ende áira abu baanda bai kuba nga byási bya muliro.»

⁸ Si kwa bya byerékere eMwana wai, Ongo átetaa mbu: «Woyo Ongo, endebe yao ye'bwami ikánaendekera inátula'o esuku ne'mango. Utúla wìmire mwa bwami bwao, kukulikana ne'myasi era ìtungenene.

⁹ Utúla usímire bya bìtungenene, si utúla uáire emabi. Echera chi chátumaa Ongo, Ongo wao ákulondola, mwa kukwâkaba emafuta me'lumoo, na kukwêresa etunda, mwa kukubika era luulu busese kurenza balikenyu.»

¹⁰ Kanji Ongo átetaa mbu: «Mwa ndangiriso, woyo Enawetu u wábumbaa ebutala. Emino sao si sabumbaa enguba.

¹¹ Ebi byoshi bikáirima, si woyo ukékala unátula'o. Kubinali, enguba ne'butala bikákunguwa nga luchimba.

¹² Ukábunga-bunga'bi ngo'kwa bénde bábunga ekochi, kanji bikáinganyisibwa nga njimba. Si woyo, unátula uno'yu. Ne'kalamo kao katákawe chiro na hicha.»

¹³ Ongo àtafuraa kubura chiro na muuma mwa bamalaika* mbu: «Ékalaa kwa lunda lwanyi lwe'malyo, kuikira mango nyingába naírire ebarenda bao kuba chisimachiro chao.»

¹⁴ Ebamalaika* bàli bande kasi? Boshi, inátula michima era yénde yákorera Ongo. Ende átuma'bo báye kuasa ebandu ba běmire kubona ebununusi.