Yokobus 1 - Alkitab Porjanjian Baa Ponah Bohasa Dayak Siang

Tantoke indan Yokobus 1:1

¹ Indan kokon dulun co porocaya ingkan duo balas suku umat Mohotara co makitu tosebar nyan ngolauh dunia. Surat cotuh ingkan akuh, Yokobus, polayan Mohotara hintang polayan Yesus Kristus, Tuhan to.

Ponah kosusah nyawotboh akar pikir ingkan Mohotara ina tenden borohon porocaya ma Yesus 1:2-8

² Kawan konduang, nyan waktu ikan nongkomo kokon macam tingkoh, tenden jorih jerahboh.

³ Ikan monau otuh: Kawan tingkoh co tonongkomo to yoh co nguji ito mainkah ito angar tenden porocaya ma Yesus atawa aroh. Amun ito tenden porocaya, maka ito jarin dulun co lian sasar tenden borohon ponah tingkoh.

⁴ Jadi oluboh kokuatan me ika botahan sasar botambah. Nguanbat iyoh ina ikan jarin ngongko ponah Tuhan hintang ina ikan jarin somporaka, arelu oko kongurang.

⁵ Amun oko co kurang boakar pikir, are sobulih nyawot ingkan Mohotara. Paluh, Mohotara angar mihi akar pikir cioh. Awi, Mohotara mihi ma komohian songai hintang ma komasi indan kokon dulun.

⁶ Tapi, hiah kotika dulun nyawot, are sobulih porocaya bahawa Mohotara kolu dohop are. Are aroko boraoi mulang melung. Awi, dulun co mulang melung samah isan golombang laut. Inung bahi napi golombang cioh hia tintu hantoi, Inung hia tintu hadi.

^7-8 Dulun co mulang melung isan iyoh, horoholuh borubah pikiran eh. Are aroko angar ngolandah ponah kobolum eh. Maka, aroh are bopikir are angar haba ome-ome ingkan Tuhan, Mohotara.

Nosehat indan dulun mala hintang dulun tatou 1:9-11

⁹ Dulun porocaya co mala sobulih jorih jerah amun are jarin dulun co penting.

¹⁰ Dulun porocaya co tatou sobulih jorih jerah amun are jarin dulun co aroko penting. Awi, dulun tatou angar lanyap isan dolak uru.

¹¹ Kotika matanondo sasar tohun nyan langit, kopanaieh umpi uru cioh jarin molanyu. Dolak eh paluh nokah. Aroko komok bat. Sanioh ka co angar tojadi ma dulun tatou. Hiyah waktu are dahat kaluk ma usahaeh are lanyap matoi.

Mohotara aroko nyuwah umpi dulun nompi dosa 1:12-18

¹² Sanangboh dulun co tenden borohon hiah waktu are buah tingkoh. Amun are tenden borohon, maka Mohotara angar mihi are kobolum sumong kototahieh nyan sorga. Ciohboh tombah eh co ocop tomonjanji Mohotara indan kokon dulun co mongasihi Are.

¹³ Amun dulun togoda pian tingkoh co somacam iyoh, arohboh are mantun, “Godaan cotuh korombut eh ingkan Mohotara,” awi Mohotara aroko lian togoda pian kojahatan, hintang aroko ka monggoda ico dulun mahi.

¹⁴ Tapi sika dulun toningkoh pian kojereeh tarop, awi are tonarik hintang topotimon pian kojere tioh leh co jahat.

¹⁵ Opaiyoh, amun kojere co jahat yoh tongumba maka tojadibat dosa; paluh, amun dosa ocop osak, maka akibat eh iyohco pompatoi.

¹⁶ Kawan konduang co tongasih kuh, aroh sala bopikir.

¹⁷ Mohotara mihi uras co pio hintang somporaka. Are co moncipta matanondo, bulan, hintang kokon potondu nyan langit. Are aroko piji borubah isan tontingoi bopindah-pindah. Are horoholuh pio.

¹⁸ Awi kojere-Eh tarop, Are umpi ito jarin kawan anak-Eh molalui Antun-Eh co bujur. Are nguan iyoh ina to haba ika co utama nyan halo kokon mohaluk ciptaan-Eh.

Aroh baya ngoneh Antun Mohotara, tapi nguan eh ka 1:19-27

¹⁹ Kawan konduang co tongasih kuh, porhati otuh: Sika dulun sobulih nyua ika ngoneh, tapi aroh nyua pokusit luang antun co aroko tomomikir houn. Aroh ka nyua sangit.

²⁰ Awi amun dulun nyua sangit, are aroko lian nguan ome co buah nyan tohimo Mohotara.

²¹ Jadi, umbotbat umpi aang co aroko pio hintang jahat. Norima ma korandah atoi Antun Mohotara co ocop oko nyan ponah atoi me, awi Antun-Eh yoh oko kuasa ika nyolamat ikan.

²² Tapi, ikan sobulih nguan Antun-Eh. Aroh baya ngoneh. Amun isan iyoh ikan baya nipu arop me leh.

²³ Mohampa amun oko dulun co ngoneh Antun Mohotara tapi aroko nguan eh. Dulun cioh samah isan dulun co noto tampaeh leh ponah soramin.

²⁴ Are noto tampaeh. Tapi hayak are tulak, holuh are solingo deon tampaeh.

²⁵ Tapi sanang dulun co ngoneh Antun Mohotara hintang aroko solingo nguan eh. Dulun cioh momporhati Hukum co somporaka, iyohonon ajaran co polampas. Jadi, Mohotara mihi aang co pio hinut indan dulun co nguan iyoh.

²⁶ Amun oko dulun co bopikir are tukoi sombayang, tapi are aroko mongondali luang antun co pusit ingkan bauieh. Are baya monipu arop eh. Sobujur eh, are sombayang ma komohampa leh.

²⁷ Tapi oko cara co ngonyorih Mohotara co Taman to. Amun oko dulun co tuu-tuu sombayang ma atoi co bujur harus, are angar nguan otuh: Are angar momporhati pondoritaan kawan dajan nulo ngompahan hintang kawan balu, paluh dohop iroh. Are mahi angar bojaga arop ina kawan aang co jahat nyan dunia tuh aroko mompongaruh are.