Wahyu 1 - Alkitab Porjanjian Baa Ponah Bohasa Dayak Siang

Ponjelasan tintun sangan buku wahyu 1:1-3

¹ Yesus Kristus porahan tintun kawan poristiwa co aroko tahi oni angar tojadi. Mohotara maraeh ma Yesus ina Yesus maraeh ma kawan dulun co molayan Are. Yesus Kristus nyoruhan molekat-Eh ika porahan ma Yohaneh, hamba-Eh.

² Ponah buku cotuh Yohanes nulih tintun Antun ingkan Mohotara hintang kawan aang co kitan Yohaneh ponah pongito cioh.

³ Sanangboh dulun co mombaca hintang kawan dulun co ngoneh kawan tungon ingkan Mohotara tuh. Sanangboh kokon dulun co nuhit kawan aang co tonulih nyan ponah eh. Awi, waktueh ocop jonyo.

Tontoke indan pitu jomaat 1:4-8

⁴ Indan pitu jomaat nyan propinsi Asia. Ingkan akuh, Yohaneh. Akuh bodoa ina ikan norima kopion hintang kongolandah kongolami ingkan Mohotara co oko makitu, co ocop oko ingkan sinan hintang co angar dombut. Hintang ingkan pitu roh co oko nyan muka korusi-Eh.

⁵ Hintang ingkan Yesus Kristus, co aroko borubah tenden bosaksi tintun kobujur Mohotara. Are jarin dulun co kosulak bolum hopuli ingkan pompatoi. Are iyohco Laca co bokuasa ma kokon laca nyan pindaondo. Yesus patut tonara. Are mongasihi ito. Are mombebas ito ingkan hukuman dosan to awi Are nahur ma daha-Eh leh hiah waktu Are matoi nyan kaju sompolaki.

⁶ Are umpi ito jarin anggota korojaan-Eh, bangsa husus kawan imam co molayan Mohotara, Tamai-Eh. Yesusboh tohurmat hintang bokuasa kotahi-tahieh. Amin!

⁷ Notoboh! Are dombut ma kawan hawun! Uras dulun angar kito Are, tomasuk iroh co ocop nowok Are. Uras bangsa nyan bumi angar nangih muhat tului Are. Mositi otuh angar tojadi! Amin!

⁸ “Akuboh co Kosulak hintang co tontiput,” hien Tuhan, Mohotara, co poko bokuasa, co oko makitu, co ocop oko ingkan sinan hintang co cagar dombut.

Yesus nyuhu Yohaneh ika nulih tintun pongitoeh ingkan Tuhan 1:9-20

⁹ Akuh, Yohaneh, konduang me, hokohico ma ikan ponah Yesus. Ito sama-samah monderita, sama-samah warga Korajaan Mohotara, samah-samah tenden borohon ponah ponderitaan. Akuh ocop momborita Antun ingkan Mohotara hintang kawan aang co tomara Yesus ma akuh. Poko tului iyoh, akuh tomongasing nyan ico pulo co araieh Patmos.

¹⁰ Hiah Ondo Tuhan, akuh tonguasai pian Roh Mohotara, paluh akuh ngoneh suara co muhat nain uhing torompet hopander nyan uwoi likut kuh.

¹¹ Suara cioh mantun, “Nulih ehbat nyan ponah buku kokon aang co angar tomototo ma iko. Paluh, pokatueh buku cioh hia pitu jomaat tatuh: Epesus, Smirna, Pergamus, Tiatira, Sardis, Piladelpia, hintang Laodikia.”

¹² Akuh meong arop ika noto suara co hopander ma akuh. Paluh, akuh kito pitu doroh johin lampu. Pitu johin lampu taiyoh tonguan ingkan bulou.

¹³ Nyan owang kawan johin lampu taiyoh, oko ico dulun co pongitan eh isan ico ‘Anak Kolunon’. Are hapo jubah co kombuieh dapot paai-Eh. Husuk-Eh hobabat ingkan bulou.

¹⁴ Balou kuhung-Eh bura isan bulun domba, bura lentah. Matai-Eh isan ori apui.

¹⁵ Paai-Eh mongkilat isan tombaga co tongolebur ponah apui. Suara-Eh nain uhing gorunduh ongkong kuhung co bahai.

¹⁶ Silun kontoui-Eh nantot pitu potondu. Ico usok padang co hoponyila awaieh nyoot pusit ingkan baui-Eh. Tampa-Eh molet isan matanondo co lenget-lenget.

¹⁷ Kotika akuh noto-Eh, akuh potontuot holuh nukup ngelop kalop nyan muka paai-Eh isan dulun matoi. Tapi Are mandak silun kontoui-Eh nyan akuh. Hie-Eh, “Aroh takut! Akuh-boh co Kosulak hintang co Tontiput,

¹⁸ Akuh-boh Are co Bolum. Akuh ocop matoi, tapi notoeh, Akuh bolum indan kototahi-tahieh. Akuh nantot kunci kuasan pompatoi hintang lowun lio.

¹⁹ Poko tului iyoh, nulih ehbat kokon aang co tomototo ma iko, iyohonon kawan aang co tojadi makitu hintang kawan aang co angar tojadi daai.

²⁰ Ponah pongito ingkan Tuhan niin iko kito pitu johin lampu co tonguan ingkan bulou. Iko mahi kito pitu potondu nyan silung-Kuh. Santuhboh artieh: Pitu johin lampu iyohco pitu jomaat. Pitu potondu iyohco pitu molekat kawan jomaat taiyoh.”