Matius 8 - Alkitab Porjanjian Baa Ponah Bohasa Dayak Siang

Yesus pomambuh ico dulun co hoboro 8:1-4

¹ Opah Yesus nosuloh ingkan lungkuh, orong dulun ngonulu Are.

² Oko ico dulun co hoboro dombut hia Yesus. Are ngelop kalop nukup haluh nyawot ma Yesus, “Tuan, dohop pomambuh akuh. Amun kolu, Tuan boraoi leh.”

³ Yesus ngoncamak dulun cioh samir mantun, “Akuh kolu. Mambuhbat!” Hanyih iyoh ka toroeh niho.

⁴ Paluh Yesus mantun maeh, “Aroh ngesah aang cotuh hia ome bewe. Tapi, tulakbat hia imam hintang nyawot are momastieh iko ocop mambuh. Paluh mihibat porsembahan sosuai ma porentah Musa ika jarin bukti indan dongan, iko bujur-bujur ocop mambuh.”

Yesus pomambuh polayan ico kopala pasukan Romawi 8:5-13

⁵ Yesus tulak hia kota Kapernaum. Hiah waktu Are muntam hia kota cioh, oko ico kopala pasukan Romawi co dombut hia-Eh.

⁶ Hien kopala pasukan cioh, “Tuan, akuh oko ico polayan co korinah mondorita. Are kaling nyan lopo hintang aroh liai monggarak betieh.”

⁷ Hien Yesus, “Akuh angar tulak pomambuh are.”

⁸ Tapi kopala pasukan cioh museh, “Akuh aroh patut norima Tuan ponah lopokuh. Tapi mantun eh boh mambuh nyan intoi leh, Mositi polayankuh angar jarin mambuh, awi Iko leh co bokuasa.

⁹ Akuh mahi iyohco ico dulun bawahan hintang akuh mahi oko bawahan kawan tontara. Amun akuh nyuhu ico dulun ika tulak, maka mositi are tulak. Amun akuh nyuhu dulun cotuh ika dombut, maka mositi are dombut. Amun akuh nyuhu polayankuh ika monggawi aranaang, mositi are nguan eh.”

¹⁰ Yesus kagum ngoneh antun kopala pasukan cioh. Yesus mantun ma iroh co ngonulu Are. Hie-Eh, “Ngoneh yoh, ingkan bangsa-Kuh tarop dulun Israel Akuh arinai piji sopopak iman kahan otuh.

¹¹ Ngoneh eh yoh otuh: Orong dulun co bokon ma Yahudi angar dombut ingkan ngolauh dunia. Iroh angar tuot kuman homboh-homboh Abraham, Ishak hintang Yakup nyan ponah Korojaan Sorga.

¹² Sobalik eh oko kawan dulun co sobujur eh bohak muntam ponah ika cioh, tapi iroh malah angar tomende hia luar nyan ponah kopindong nyan noraka. Nyan intin iroh angar nangih hintang angar ngoritet kosing awi korinah mondorita.”

¹³ Paluh Yesus mantun ma kopala pasukan cioh, “Bulibat. Ome co tomorocaya mu angar tojadi.” Hanyih iyoh ka polayan eh yoh mambuh.

Yesus pomambuh umpu Petrus co bawe kawun kawan dulun bokon 8:14-17

¹⁴ Yesus tulak hia lopo Petrus. Nyan intin, umpu Petrus co bawe mondam. Jadi, are kaling nyan ika poniruieh. Yesus noto paluh hia are,

¹⁵ hintang ngoncamak silun bawe cioh. Hanyih iyoh, bawe cioh jarin mambuh. Are tonyok paluh molai molayani Yesus.

¹⁶ Hiah ondo cohit, orong dulun hotoro tomehen hia Yesus, tomasuk co tomorasuk pian kawan roh jahat. Ma antun-Eh leh, Yesus ngomuho kawan roh jahat taiyoh. Are mahi pomambuh uras dulun co hotoro taiyoh.

¹⁷ Poristiwa cioh tojadi ina antun Mohotara jarin nyata. Hiah jaman sinan nabi Yesaya nulih antun Mohotara yoh co santuh naii: “Areboh co monanggung pondoritaan to hintang pomambuh toro to.”

Kawan sarat ika jarin murid Yesus 8:18-22

¹⁸ Kotika Yesus kito orong dulun yoh toliut-Eh, maka Are nyuhu kawan pongikut-Eh ina cakat jukung mitah danau.

¹⁹ Sorinai tulak, oko guru agama Yahudi dombut. Hie ma Yesus, “Pa Guru, akuh angar horoholuh ngonulu Iko, hia omoh bewe iko tulak.”

²⁰ Maka Yesus mantun maeh, “Ongih oko luwang eh. Beleu oko salah eh. Tapi Anak Kolunon, arelu oko ika nondo olai.”

²¹ Ico beti bokon, iyohonon ico ingkan murid-Eh, mantun ma Are, “Tuhan, akuh nyau ngonulu Iko. Tapi kuhan akuh tulak ngolowong tamang kuh houn.”

²² Tapi Yesus mantun maeh, “Umba bat Akuh makitu. Olueh kawan dulun co matoi ngolowong kawan dulun co matoi.”

Yesus poranai bahi lowut 8:23-27

²³ Opah iyoh, Yesus cakat hia ponah jukung. Kawan murid-Eh ngonulu-Eh.

²⁴ Waktu iroh nyan tohun danau cioh, nongkocok oko bahi lowut nampuh danau cioh. Kawan umbak bahai mohantam jukung doh dapot jonyo dotong. Tapi Yesus potontirui.

²⁵ Jadi, kawan murid-Eh tulak hia-Eh paluh monyun Are. Hien doh, “Tuhan! Dohop! Ito angar colaka!”

²⁶ Hien Yesus ma iroh, “Ikan kurang porocaya ma-Akuh!” Sobulih eh ikan aroh takut! Yesus tonjok holuh ngorangat bahi hintang danau. Maka, lansung danau cioh jarin ranai lau.

²⁷ Kawan dulun taiyoh kagum. Hien doh, “Ome boh Dulun cotuh? Bahi hintang danau mahi tuhit ma-Eh.”

Yesus pomambuh duo beti co tomorasuk pian kawan roh jahat 8:28-34

²⁸ Opaiyoh, Yesus homboh kawan murid-Eh dapot nyan pohoi danau nyan derah Gadara. Nyan intin, oko duo dulun co tomorasuk kawan roh jahat co nukui nyan kawan guha ika kolowong. Dulun duo iyoh korinah ngobohaya dapot arelu oko dulun co bohanyi buah calan cioh. Dulun duo iyoh dombut hia Yesus,

²⁹ paluh noriak, “Heeh Anak Mohotara! Ome urusan-Mu ma kaih? Mainboh Iko dombut ika mohukum kaih sorinai waktu eh co tonantu Mohotara?”

³⁰ Aroh ocu ingkan iroh oko orong lau bulo rahat nganyap kanon nyan beloi lungkuh.

³¹ Jadi, kawan roh jahat taiyoh nyawot ma Yesus, “Amun Iko ngomuho kaih pusit ingkan dulun duo otuh, nyuhu kaih muntam kawan bulo tanon.”

³² Yesus mantun ma kawan roh jahat taiyoh, “Buhobat!” Lansung pusitbat iroh paluh muntam kawan bulo taiyoh. Kawan bulo taiyoh tongkoru tajun ingkan beloi lungkuh co hobilah yoh hia ponah danau, matoi dotong.

³³ Kawan ponjaga bulo taiyoh kito poristiwa cioh. Jadi, iroh tongkoru hia kota. Nyan idi, iroh ngesah kokon aranaang co tojadi, tomasuk ome co tojadi ma dulun duo iyoh co batuh tomorasuk kawan roh jahat.

³⁴ Paluh, kokon ponduduk kota pusit ika nyopopak Yesus. Iroh monggasak nyawot ina Are naat derah doh.